2:37 صباحًا الخميس 21 فبراير، 2019








انواع الشوربة- السلطات اللذيذة

ازيكوا ياطعمين
جيبالكوا شويه شوربات و سلطات هتدعولي عليها و كمان متنسوش التقيم لاحسن ازعل منكم
نبدا ياعسلات

سلطه البطاطس بالزبادي
المقادير:

  • 2 ثمره بطاطس مسلوقه و مقشرة
  • 2 ملعقه خل
  • كوب زبادي
  • ملح

الطريقة:

1 تبرد البطاطس بالماء بعد ما تتسلق، و بعد كده نقطعها لشرائح صغيره و نضيف عليها الزبادى و الخل و الملح، و بعد كده نشيل السلطه في الثلاجه و عند التقديم ممكن نزينها بالبقدونس المفروم.. و بالهنا و الشفا.

شوربه بالشوفان

المقادير:

  • كيس شوربه جاهزه “موجوده في السوبر ما ركت”
  • 3 ملاعق لبن بودرة
  • 3 ملاعق شوفان
  • 2 كوب ماء ساخن
  • 1/4 كوب كريمه طبخ

الطريقة:
1 نضرب كل المكونات في الخلاط، لغايه ما نحصل على خليط متجانس، و بعد كده نصب كل المكونات في اناء و نحطه على النار، مع التقليب من وقت للتاني، و نسيبها على النار لمده 10 دقايق او لغايه ما الشوربه تغلي.

2 بعد كده ممكن نضيف بعض قطع الفراخ المقطعه و المسلوقه و نصبها في اطباق الشوربه و ممكن نقدم معاها بعض قطع الفراخ

سلطه الحمص
المقادير:

  • كوب حمص مسلوق
  • 1/2 كوب طحينة
  • عصير ليمونة
  • كمون
  • ملح
  • ماء

الطريقة:
نفرم كل المكونات دى في الخلاط لغايه ما تبقي ناعمه تماما، و مفيش فيها اي قطع صحيحه و بعد كده نشيل طبق السلطه في الثلاجه علشان يبرد و بعد كده نقدمه، و ممكن نزين الطبق عند التقديم بكميه من الحمص المسلوق و زيت الزيتون.

شوربه كريمه البروكلي
المقادير:

  • 1/4 كيلو بروكلي
  • ثمره بطاطس مقشرة
  • 2 كوب كريمه لبانى او قشطة
  • 6 اكواب شوربه فراخ
  • بصله متوسطه مفرومة
  • 1/4 كيلو كرفس مفروم
  • ملح و فلفل و كمون

الطريقة:
1 نجيب البروكلى و نقطعه لقطع صغيره و نقطع البطاطس لمكعبات صغيره و نضيفهم على الشوربه و نضيف معاهم البصل المفروم و الملح و الفلفل و رشه الكمون، و نسيبهم على النار لغايه ما يغلوا، و بعد كده نقلل النار على الشوربه و نسيبهم لغايه ما يستووا.

2 بعد ما نتاكد ان البروكلى استوى، نضرب الشوربه في الخلاط لغايه ما كل مكوناتها تتجانس، و نضيف معاها كميه من الكريمه اللباني، و بعد كده نرجع الشوربه على النار و نضيف عليها باقى كميه الكريمه اللبانى و الكمون.

3 بعد كده نصب الشوربه في اطباق التقديم، و نزينها بقطع البروكلى الاخضر.. و بالهنا و الشفا

سلطه التونه بالكرفس و الفجل
المقادير:

  • 3 اكواب تونه مصفاه من الزيت
  • 8 ثمرات فجل صغيره مقطعه لشرائح
  • 2 عود كرافس مقطعين لقطع صغيرة
  • 1/4 كوب بقدونس مفروم
  • 2 معلقه كبيره عصير ليمون
  • معلقه كبيره زيت زيتون
  • ملح و فلفل

الطريقة:
1 هاتى طبق غويط، و اخلطى فيه التونه و الفجل و البقدونس و الكرافس و عصير الليمون و زيت الزيتون و الملح و الفلفل، و قلبيهم مع بعض كويس.

2 حطى طبق السلطه في الثلاجه و طلعيه عند التقديم و ممكن تقدمى معاها عيش محمص.. و بالهنا و الشفا.

شوربه السمك و الجندوفلي
المقادير:

  • 1/2 كيلو سمك فيليه مطقع لمكعبات
  • 1/4 كيلو جندوفلي
  • معلقه كبيره زيت زيتون
  • 2 عود كرات مقطع لشرائح صغيرة
  • فصين ثوم مفرومين
  • كوب بقدونس مفروم
  • راس بصله خضراء صغيره مقطعه لشرائح
  • عصير نصف كيلو طماطم
  • 3 معالق كبيره صلصه طماطم
  • 1/4 معلقه فلفل احمر مطحون
  • 1/2 كوب زيتون للتقديم
  • زنجبيل
  • ملح

الطريقة:
1 شوحى الكرات و الثوم و البصل الاخضر في الزيت على نار متوسطه مع التقليب لمده 3 او 4 دقايق لغايه ما تحسى انهم استووا.

2 بعد كده ضيفى الطماطم وصلصله الطماطم و الفلفل الاحمر و الملح و الزنجبيل، و سيبيهم على النار لغايه ما يغلوا، و بعد كده و طى النار، و سيبيهم على نار هاديه لمده 15 دقيقة.

3 بعد كده بتضيفى السمك و الجندوفلي، و قلبيهم بالراحه لغايه ما تحسى ان السمك استوي و الجندوفلى فتح معاكي، بعد كده ضيفى البقدونس و قلبى الشوربه كويس على النار، و بعد
كده قدميها مع الزيتون.. و بالهنا و الشفا.

شوربه الخضار و الفراخ و المشروم
المقادير:

  • 1/4 كيلو صدور فراخ مسلوقه مقطعه قطع كبيرة
  • 3 بصلات مقطعه قطع صغيره جدا
  • كوب لبن
  • 3 اكواب شوربه فراخ
  • كوب دقيق
  • 1/4 كيلو مشروم مقطع شرائح
  • 3 ملاعق كبيره زبدة
  • عصير ليمونة
  • 1/2 حزمه بقدونس مقطعه قطعا صغيرة
  • ملح و فلفل
  • 3 اكواب خضار مشكل و مقطع مكعبات صغيرة

الطريقة:
1 سيحى الزبده على النار، و بعد كده ضيفى اليها البصل مع استمرار التقليب لغايه ما لون البصل يبقي ذهبي.

2 لما تلاقى ان لون البصله بقي ذهبى ضيفى اليها الدقيق مع استمرار التقليب لمده خمس دقائق او لغايه ما الدقيق يحمر.

3 بعد مرور الخمس دقائق ضيفى اليه اللبن تدريجيا مع التقليب المستمر علشان الدقيق ما يكلكعش.

4 بعد كده ضيفى شوربه الفراخ مع استمرار التقليب لغايه ما تلاقى ان العجينه بقت متجانسه و سمكيه و مش مكلكعه ضيفى اليها الخضار و المشروم.

5 سيبى الخليط على النار لمده ربع ساعه و بعد كده ضيفى اليه عصير الليمون و البهارات و الملح، و سيبيه على النار لمده ربع ساعه كمان، او لغايه ما تلاقى الخضار و المشروم استوى، اطفى البوتاجاز و حطى الشوربه في اطباق التقديم، و زينى الاطباق بالبقدونس.

سلطه عيش الغراب
المقادير:

  • علبه عيش الغراب
  • فص ثوم مفروم
  • 2 ملعقه كبيره عصير ليمون
  • ملعقه صغيره زعتر مجفف و مطحون
  • 1/2 ملعقه كبيره زبدة
  • ملعقه كبيره زيت زيتون
  • 2 ملعقه كبيره بقدونس مفروم ناعم
  • ملح

الطريقة:
1 اغسلى عيش الغراب كويس، و بعد كده قطعيه الى قطع صغيرة.

2 ذوبى الزبده في طاسه على نار هاديه و بعد كده ضيفى اليها عيش الغراب و قلبيه لمده دقيقه و بعد كده ضيفى الثوم و قلبيهم مع بعض لمده 5 دقائق او لغايه ما تلاقى ان عيش الغراب استوى.

3 حطى عيش الغراب في طبق التقديم، و ضيفى اليه الملح و عصير الليمون، و زيت الزيتون و البقدونس و الزعتر المطحون، و قلبيهم مع بعض.

سلطه بقدونس
المقادير:

  • 2 حزمه بقدونس
  • عصير ليمونة
  • 3 فصوص ثوم مفرومين
  • ملعقه كبيره طحينة
  • ملح و فلفل
  • شرائح ليمون
  • اوارق بقدونس
  • ثمره طماطم مقطعه شرائح

الطريقة:
1 هاتى البقدونس، و اغسليه، و قطعيه قطعا صغيره جدا.

2 اخلطى الثوم مع الملح و الفلفل، و ضيفيهم للطحينه و قلبيهم مع بعض كويس، و ضيفيهم للبقدونس، و قلبيهم مع بعض، و حطيهم في طبق السلطة.

شوربه الماكولات البحريه بالليمون
المقادير:

  • 1/4 كيلو سمك فيليه مقطعا قطعا صغيرة
  • 1/4 كيلو جمبري
  • 1/4 كيلو سبيط “اختياري”
  • كرات
  • كرفس
  • بصل
  • ثوم
  • عصير ليمون
  • ملح و فلفل اسود
  • قرنفل
  • حبهان

الطريقة:
1 نظفى السمك و الجمبرى و السبيط و اغسليهم كويس، و بعد كده اسلقيهم في حله عميقه مع الكرات و الكرفس و البصل المقطع و الحبهان و القرنفل.

2 خدى بالك و انت بتسلقى السمك انك تشيلى الريم اول باول، بعد كده ضيفى الملح و الفلفل الاسود و الثوم المفروم و البقدونس، و خليه يغلى على نار هادئه لمده نصف ساعة.

3 بعد كده صبى الشوربه في اطباق الشوربه و للتجميل ممكن انك تضيفى البقدونس المفروم و ترشى عليها عصير ليمون.

شوربه الجبنه الشيدر
المقادير:

  • 1/2 كيلو جبنه شيدر مبشورة
  • 3 ملاعق كبيره زبدة
  • 3 ملاعق كبيره دقيق
  • ملح و فلفل و بهارات
  • 3 اكواب لبن
  • ثمره بصل مقطعه قطع صغيره جدا
  • 3 اكواب شوربه فراخ او لحمة

الطريقة:
1 ذوبى الزبده في اناء على النار، و ضيفى اليها البصل و قلبيه كويس لمده 5 دقائق او لغايه ما تلاقى ان البصل لونه بقي ذهبي.

2 لما تلاقى ان البصل لونه بقي ذهبى ضيفى اليه الدقيق مع التقليب المستمر لغايه ما الدقيق لونه يبقي ذهبي، بعد كده ضيفى الشوربه و اللبن بالتدريج مع استمرار التقليب علشان الدقيق ما يكلكعش منك، و سيبيهم على النار لمده 5 دقائق او لغايه ما يغلوا.

3 اطفى البوتاجاز و سيبى الخليط علشان يبرد، بعد كده اضربيه في الخلاط كويس، بعد كده حطيه في حله و رجعيه على النار مره اخري و ضيفى اليه الجبنه مع استمرار التقليب لمده 5 دقائق علشان الجبنه تذوب مع اضافه الملح و الفلفل و البهارات.

السلطه البلدي
المقادير:

  • بصله مقطعه قطعا صغيرة
  • ثمره فلفل اخضر حار مقطع قطعا صغيرة
  • فص ثوم مفروم
  • ملعقه صغيره خل
  • 2 ملعقه صغيره عصير ليمون
  • حزمه بقدونس مقطعه قطعا صغيرة
  • 2 ثمره طماطم مقطعه مكعبات صغيرة
  • 2 ملعقه كبيره زيت ذرة
  • حزمه جرجير مقطعه قطع صغيرة
  • 2 ثمره خيار مقطع مكعبات صغيرة
  • ملح و فلفل
  • خس مقطع قطع صغيرة

الطريقة:
دى ما فيش ابسط منها كل اللى هتعمليه انك هتخلطى كل المقادير مع بعضها، و تحطيهم في طبق السلطة.

شوربه اللحمه بالبروكلى و الفاصوليا الخضراء
المقادير:

  • 1/4 كيلو لحمه مقطعه قطعا صغيرة
  • بصله متوسطه مقطعه قطعا صغيرة
  • 1/2 كوب كرفس مقطع قطعا صغيرة
  • 1/2 كوب بروكلى مقطع قطعا صغيرة
  • 1/2 كوب فاصوليا خضراء
  • 1/2 جزره مقطعه قطعا صغيرة
  • ملعقه كزبره خضراء
  • ملعقه ملح
  • رشه بهارات
  • ملعقه زبد
  • كوب مية

الطريقة:
1 سخنى الزيده و شوحى فيها اللحمه لغايه ما تحمر و بعد كده ضيفى اليها الملح و البهارات و البصل و قلبيهم مع بعض، و بعد كده ضيفى اليهم الخضار و الجزر و الفاصوليا و البروكلى و الكرفس و قلبيهم مع بعض لمده خمس دقائق.

2 بعد مرور الخمس دقائق ضيفى اليهم الميه و سيبيهم على النار لمده نصف ساعه او لغايه ما تلاقى ان الخضار و اللحمه استوت بعد كده حطى الشوربه في اطباق الشوربه و ضيفى اليها الكزبره الخضراء.

السلطه اليونانية
المقادير:

  • 4 ثمرات طماطم
  • 2 ثمره خيار
  • ثمره فلفل اخضر
  • بصله متوسطة
  • 1/2 علبه جبنه ثلاجة
  • 1/2 ربطه خس
  • 2/1 كوب زيتون اسود منزوع البذر
  • 2 ملعقه كبيره زيت زيتون
  • عصير ليمونة
  • ملح و فلفل

الطريقة:
1 قطعى الطماطم الى قطع طوليه و قطعى الخيار و البصل و الخس الى شرائح و قطعى الفلفل الاخضر الى مربعات و قطعى الجبنه الى مكعبات صغيرة.

2 حطى الخيار و الطماطم و البصل و الفلفل الاخضر في طبق السلطه و ضيفى اليهم الملح و الفلفل و عصير الليمون و معلقه زيت الزيتون و قلبيهم مع بعض.

3 بعد كده ضيفى اليهم الجبنه و الزيتون الاسود و من فوقهم ملعقه زيت زيتون.

سلطه الجزر و الفجل
المقادير:

  • 1/2 حزمه بقدونس مقطع قطعا صغيرة
  • 1 كوب جبنه بيضاء مقطعه مكعبات
  • 4 فجلات كبيرة
  • 3 جزرات متوسطة
  • عصير ليمونة
  • ملعقه صغيره ملح
  • 1/2 كوب زيتون اسود
  • فصين ثوم مفرومين
  • 1/4 كوب زيت زيتون

الطريقة:
1 اغسلى الجزر و الفجل كويس، و بعد كده ابشريهم.

2 دقى الثوم مع الملح، و ضيفى اليهم عصير الليمون و الزيت، و قلبيهم مع بعض كويس، و بعد كده ضيفيهم الى الجزر و الفجل، و قلبيهم مع بعض كويس، و بعد كده ضيفى اليهم الجبنه و البقدونس و الزيتون الاسود.

شوربه البنجر
المقادير:

  • 5 ثمرات بنجر
  • 5 ثمرات بطاطس مقطعه مكعبات
  • 2 ثمره جزر مقطعه مكعبات
  • مكعب مرقه دجاج
  • 3 فصوص حبهان
  • 1/2 كوب كريمه لباني
  • ورق لاورا
  • ملح و فلفل

الطريقة:
1 اسلقى البنجر كويس اوى لمده ساعتين في اناء عميق، بعد كده اطفى البوتاجاز و سيبى البنجر لغايه ما يبرد و قشريه و قطعيه مكعبات صغيرة.

2 اسلقى الجزر مع البطاطس، و ضيفى اليهم اثناء السلق مكعب مرقه دجاج و ورق اللاورا و الحبهان و الملح و الفلفل.

3 لما تلاقى ان الجزر و البطاطس بدات تستوى ضيفى اليهم البنجر و الكريمه اللبانى و سيبيهم مع بعض على النار لمده 5 دقائق مع التقليب المستمر، بعد كده اضربى الشوربه في الخلاط لغايه ما كل المكونات تتجانس، و بعد كده رجعيها مره تانيه على النار و سيبيها لمده خمس دقايق، و بعد كده حطى الشوربه في اطباق الشوربة.

سلطه الجرجير و البصل
المقادير:

  • 2 حزمه جرجير
  • عصير ليمونة
  • 3 ملاعق كبيره خل
  • 2 ملعقه كبيره زيت زيتون
  • ثمره بصل مقطعه قطعا صغيرة
  • ملح و فلفل
  • 2 ثمره جرز مبشورة

الطريقة:
1 اغسلى الجرجير كويس، و قطعيه الى شرائح رفيعة.

2 اخلطى كل المكونات مع بعضها البعض و قلبيهم كويس و حطيهم في طبق السلطة.
بالصور انواع الشوربة  السلطات اللذيذة 20160907 1037

بالصور انواع الشوربة  السلطات اللذيذة 20160907 1038

بالصور انواع الشوربة  السلطات اللذيذة 20160907 1039

بالصور انواع الشوربة  السلطات اللذيذة 20160907 1040

 

275 views

انواع الشوربة- السلطات اللذيذة