شبكة شام

 


ول خطوه بالزواج ببلاد الشام عامة و بالاردن و فلسطين

خاصة هي ذهاب ام العريس و اخواته لزيارة بيت =اهل العروس

لمشاهدتها و اذا ما اعجبتهم بينسحبوا بهدوء و كانها زيارة عاديه

واذا اعجبتهم بتكلموا مع امها بالمقال و بطلبوا من الام تكلم الاب

عشان يعطوهم موعد للنضره الشرعيه

وهذي عنا امر ضروري جدا جدا لايتم الزواج من غيره و هون بيجي دور الاب

بيبدء عمل تحريات و جمع معلومات عن العريس

واذا عجبه بيعطي موافقته على النضره الشرعيه

وفي اليوم المتفق عليه اول شئ بيجي العريس مع

امه و اخواته فقط من غير رجاال بس ببعض الاحيان ابو العريس بيجي معهم

وبيجلس العريس مع و الد العروس لوحدهم و النساء لوحدهم و بعدين

بتدخل ام العريس و ام العروس و بيجلسوا معهم و هذه عادة عنا و بعرف امهات بيدخلوا منتقبين

وما بيتكلموا و لا كلمه بس بيتواجدوا كدعم نفسي للعروس بسبب

الخجل اما لبس العروس خلال النضره الشرعيه يختلف حسب بيئتهم

ودرجة تدينهم ببتدخل بقصير و شعرها و ببتدخل بحجاب

شرعي و ما بضهر منها الا الوجه و الكفين

وبعد شوي بتدخل العروس و بتقدم القهوة و هون بتكون اول

نضره و بتقعد العروس شوي يعني من 10 الى 15 دقيقه و ثم بتطلع

واذا عجبوا بعض ابو العريس بكلم ابو العروس بالمقال و اذا ابوه مو موجود

ام العريس بتطلب من ام العروس

تحديد موعد لزيارة العريس و ابوه و هون بيرجع ابو العروس يعمل بحث اوسع

واشمل عن العريس و اذا ما اعجبه بعتذر

الووو ما الكم نصيب عنا > و انتهي

واذا اعجبه الوضع بحدد يوم

وفي اليوم المتفق عليه بيجي العريس مع ابوه و امه

وهذي الزياره بتكون للاتفاق على التفاصيل مثل المهر

والشبكه و الحفله يعني كل شئ و اذا تم الاتفاق

بيحددوا يوم تيجي به الجاهه و هي بتتكون من عدد

كبير من الرجال و النساء

وبالتاكيد ابو العريس بكون خبر كبير الجاهه بالمهر المتفق

عليه و بعد ما يقعدوا شوي بيجي احد اخوان العروس

وبقدم القهوة العربية للجاهه و اول شئ بيبدء بكبير

الجاهه >> الشيخ يعني

بالتاكيد الكبير هون دوره بمسك فنجان القهوه و بيحطه

على الارض او الطاوله و بقول الاتي

يا ابو فلان ما بنشرب قهوتكم الا تعطونا طلبنا

وابو العروس مباشرة بقول طلبكم اجاكم و البنت بنتكم

وبقوم كبير الجاهه بشرب القهوة و بعدوا الباقين

و ثم بيبدء النقاش حول المهر >> منظر لانهم متفقين من اول

المهم بيقول ابو العروس مبلغ اكبر من المتفق عليهاذا كان قليل او بقول نفس المبلغ اذا كان كبير

وهون ببدء شغل كبير الجاهه

نزلونا مبلغ هكذا لاجل الجاهه

ومبلغ هكذا لاجل ابو فلان

وهيك لغاية لما يوصلوا للمبلغ الى بيرضي جميع الاطراف

وبعد الاتفاق بيقراوا الفاتحه و بيعطوا الضوء الاخضر للنساء تم الاتفاق >> و بتشتغل الزغاريد

وتوزيع الكنافه و البارد و الشوكولا

والمهور عنا بالاردن بتتفاوت حسب الطبقة الاجتماعيه و البيئه >> و الاهم الالتزام

ببدء المهر عنا من 1500 دينار الى 5000 الاف دينار

والشبكه عبارة عن طقم ذهب كامل اذا كان العريس مقتدر ما ديا

او خاتم و دبله و سلسله بسيطة و ساعة و حلق

وفي ناس ما بيشترطوا شبكه يعني حسب اهل العروس و وضع العريس المادي ”

وبتتفق الجاهه مع ابو العروس على يوم لكتب الكتاب

واول لازم الفحص الطبي هلا لا يتم عقد من غيره

وكتب الكتاب بكون اما بالمحكمه الشرعيه او ببيت العروس

وبعد كتب الكتاب العروس بتلبس فستان حلوو و بتروح الصالون >> اسمه المشغل بالخليج

او بتجيها كوافيره بالبيت و اذا كانت حلووه

ومو محتاجه ميك اب و صالون

في المنزل بتستشور شعرها و بتلبس فستانها و بس

و ثم بتبدا الحفله و بتواجد اهل العريس و اهل العروس

والجيران المقربين جدا جدا جدا يعني بتكون حفله على صغير

وبيشرف العريس و بيقعد جنب عروسته و بيلبسها الشبكه و بيرقص معها كله ذلك قدام النساء

والرجال بكونوا مجتمعين بالمجلس و بتم توزيع القاتو و احيانا الكنافه و الشكولا و البارد

وقبل الزواج بيوم بتكون سهرة ببيت العروس اسمها>> ليلة الحناء او حفلة الوداع

وبيجي العريس و اهله و قرايبه و جيرانه و الاصدقاء و بيجيبوا معهم التالي

حنه — مكسرات — شوكولا و ملبس — و الحلو و البارد الى بتوزع بالحفله

وبيجلس جنب عروسته و بيلبسها باقي الذهب و كمان مره برقصوا

مع بعض و بعد حوالي ساعة اهل العريس بيروحوا بيتهم

واهل العروس بكملوا السهرة و بتستمر للفجر بسهروا صاحبات

العروس و اهلها معها بين ضحك و رقص و بكي و وداع

وهلا بنروح لبيت العريس كمان بيصبح عندهم سهرة بس بشغله اهل العريس

ما بيعملوا حفله و حده لا مثلا العرس الجمعة بتبدا الافراح و الليالي الملاح و السهرات

من يوم الاثنين او الثلاثاء و بتكون خاصة بالنساء فقط

ويوم الخميس يعني قبل العرس بالليلة بتكون حفله للشباب و حفله للنساء

حفلة الشباب بتكون غير شكل فرقة و مطرب و رقص و دبكه و كمان بحنه بس العريس

ما بيحني الا ايد و حده بس و اصحابه مثله و كمان السهرة بتبقي

للفجر بس مو مثل سهرة العروس كلها فله لا بها تعب كتييير

والاسباب =انه الغداء عنا بكون يوم العرس بعد صلاة الضهر

مباشرة و هو عبارة عن منسف و لازم بالليل يجهزوا الذبائح

وهلا بيجي وقت الغداء و ببدا المعازيم بالتوافد على الخيمه المعده لهذا الغرض

ومن عاداتنا المعازيم كل واحد بيجي لازم يقدم شئ حسب طاقته و وضعه المادي

في ناس بتجيب معها خروف او ما عز و بناس اكياس كبار من الارز و السكر

ونااس بس بتكتفي بتقديم النقوط >> عبارة عن فلوس و كل شخص و وضعه

وفي نااس بتعمل كل الامور السابقة من هدايه و نقوط ”

وبهذا الوقت العروسه بتكون بالصالون من الصبح للعصر

وبعد العصر بيجتمعوا اقارب العريس و اصحابه من الشباب و بياخدوه ببيت واحد منهم

عشان الحمام هم بيحمموه و بيعملوا حفله صغار و ثم و بيعملوا الزفه و هي عباره

عن طبل و فرقة شباب بتدبك >>> الدبكه نوع من الرقص التراثي ببلاد الشام

وبحملوا العريس على الاكتاف طول الزفه مع الاغاني الشعبية المتعارف عليها عنا

اهل العريس بيتوجهوا لبيت العروس عشان ياخدوها لبيتهم او لصالة الافراح حسب البيئه

عنا بالباديه و القرى ما بصالة الا نادرا ”

وبيتوجهوا بموكب كبيير من السيارات تتوسطهم سيارة خاصة للعروسين مزينه بالورد بكل نوعياته و قلوب الحب الى بيت =العروس

وهون بتكون المعاناة لحظات الفراق صعبة كتير خروج العروس من بيت =اهلها كتير صعب

وكله بكي و عنا اغاني خاصة برددوها اهل العريس لما يدخلوا ياخدوا العروس

وبيردوا عليهم اهل العروس كمان باغاني خاصه

وما بيبقوا كتير من ربع الى نصف ساعة فقط و بياخدوا العروس و اهلها و قرايبها ليكملوا الحفله

اما بالبيت او الصالة

اذا بالبيت بتستمر الحفله لمنتصف الليل و اذا بالصاله بس ساعتين

وثاني يوم عنا شئ اسمه الصباحيه بيجوا اهل العروسه و قرايبها من نساء و رجال

لبيت الزوجية و معهم الغدا و هو خارووف او اكثر حسب و ضعهم و يمكن بس حلو

والحلوو عبارة عن كنافه >> كمياات كبيره

وعنا العروس ما بتزور اهلها الا بعد اسبوع من الزواج >> بس بناس ما بتلتزم بهذا الامر

4٬400 views