يوم الأحد 1:34 مساءً 22 سبتمبر 2019



طريقة تحضير الكبة السورية

طريقة تحضير الكبه السورية

مقادير عجينه الكبة
– كيلو برغل ناعم
– نصف كيلو لحمه مفرومه ناعمة
– بصله صغيرة
– بهارات كمون ملح خفيف
و الملح الخفيف لانو احيانا بيبقى البرغل اصلو مملح

الآن مقادير الحشوة
– كيلو لحمه اما ناعمه مفرومه او ناعمه فقط على السيخ
– صنوبر
– لوز
– جوز
– سمنة
– بصلة

=======================
نبدا الآن بتحضير العجينه تبع الكبة
شوفوا
كل كيلو برغل ناعم بدو نصف كيلو لحمه ناعمه مفرومه على الماكينة
اوكي
هلا بتجيبى البرغل فقط
و بتنقعية بماء بحدود الثلاث ساعات و الزمن بيرجع لنوعيه البرغل )
يعني مو تكتريلو مي
انتبهى يعني تتبيل
حتى فقط البرغله تصير طريه و مو تبقى خشنه و صلبة

———————-
هلا بعد مو مضو الثلاث ساعات تبع البرغل
انتي لح بتلاقى انو البرغل صار طري
بتجيبى البصله و بتفرميها ناعم جدا او بتبرشيها
و بعدين بتجيبى البرغل و بتخلطى البصله معاه
و بتحطية بالماكينه الخاصة للكبة
و اللى هي مو موجوده عندي للاسف
و بتفرميه
بيطلع عندك متل العجينه طرية
هلا
بتاخدى العجينه و بتضيفى عليهم التوابل المذكوره بالمقادير
و بتظبطي ملحهم كويس
لانو سبق و قلت لك انو احيانا بيجى البرغل من اصلو مملح
و بتعجنى كويس بايدك
بتعجنى بتعجنى بتعجني
حتى لو تعبتى اتحملي
و بعدين غطى العجينه حتى مو تنشف
هيك خلصنا من العجينه و ارتحنا

======================
هلا بنعمل الحشوة
و اكيد الحشوه لازم تكوني عاملتيها بالوقت يلى بيكون البرغل فيه منقوع
الحشوة
بتفرمى البصله ناعم كتير
و بتهوسيها على الغاز حتى تحمر بسمنة
و بتضيفى عليها اللحمه و بتبقى عم تهوسى حتى تستوى اللحمة
هلا صارت اللحمه جاهزة اوكي
بتجيبى الصنوبر و بتقلية و بتهوسية حتى يشقر
و اللوز نفس الشئ
اما الجوز بتخلية ناشف بدون تهويس
او اذا بتحبى هوسيه
بس نحنا بنخلية ناشف
هلا ضيفى كل اللحمه فقط فقط فقط
و بتحطيها بداخل مصفاة
حتى فقط تصفى كل السمنه يلى فيها
لسبب

 


و اللى هو انو اذا بقت السمنه بقلب اللحمه لح تخلى الكبه تفلش و تخرب

هلا بعد مو صفت اللحمه كل سمنتها
و اكيد اكيد بتكون اللحمه سخنه مو باردة لما صفيتيها
صارت اللحمه جاهزة بدون سمنه بتضيفى عليها اللوز و الصنوبر و الجوز
و بتحطى البهارات يلى بدك ياها و بتظبطي ملحها كويس
و بتحطى الها ملعقتان كبيرتان دبس رمان
هذا بيعطيها طعمه حامضه )
و على حسب مو بتحبى الحمض حطي
يعني 2 ملعقة او اكتر حسب االى بتحبيه
هلا صارت الحشوه و لله الحمد جاهزة و تمام التمام
=====================

صار وقت الكبكبة
بتكوري القرص و بتحشة بالحشوة
و لازم كل فتره و فتره تغسلى ايديكي
و ادهنى باطن كفك بماء مضاف الية نشاء
حتى يتماسك قرص الكبة
و من بعدها اقلى الكبات
بزيت يكون حار جدا جدافى البداية
بعد مو تحطى القرص بالزيت بعد بشويه نوصى الغاز
حتى مو تستوى الكبه من برا و تبقى من جوة نية
و لا تكترى بالمقلآه عدد كبير
يعني خليهم من اثنين الى ثلاث كبات
=========================
ملاحظة
1 لازم العجينه تكون كل فتره عمل الكبه مغطايه حتى مو تنشف
2 و الكبات يلى كورتيهم حطيهم بصينية و غطيها بكيس نايلون من بداية الصينية
يعني مو تعرضيهم للهواء ابدا
حتى مو ينشف القرص و يفلش بالقلى لاسمح الله
3-اذا حسيتى انو القرص قبل مو تحطية بالزيت مفلش شوي
ظبطية بايدك و تكون مبلوله بماء نشاء عادي
و بيركز و حطية بالزيت
==================================
اما الكبه المشوية
فقط الحشوه تبعها هي لية
و بتشويها على المنقل
و اكيد طريقة تكويرها بتختلف
========================

تعبتوا مو هيكي
هي الكبه بدها شغل كتير
و مشهورين نحنا السوريين بمساواتها
على كل الف صحة و هنا
و يا رب تكونوا فهمتوا كويس عليي
————–
و اي سؤال جاهزة بالرد
لانو الطريقة هي طريقتنا و مو منقولة
و هيكى كلنا بنعملها
و يا رب الكل يستفيد
و ادعولي
بالتيسير و تحقيق يلى في بالى بما يرضى الله
و هلا فيكم

 

Terms

  • الكبه السورية
  • طريقة الكبة
  • كبه البرغل

1٬492 views

طريقة تحضير الكبة السورية