حاكون صريحه معاكم نظام افراحنا جدا جدا ممل ممل ممل ممل ممل و تكاليف غالية على الفاضى لعده سبب :
1_ اولا نظام الزفه ههة محبط جدا جدا العروسة ما تطلع الااخر الليل و لمدة الزفة مو اكثر من 30 او ازا كترت 40 دقائق و يصبح فستانها مو اقل من 10 الالاف ريال يعني حرام و الله تكلفة على الفاضى و بالنهاية اتحدا لواحد من المدعوين بعد العشا يتزكر موديل الفستان لسبب بسيط انهم ما شافوها الا نص ساعة او اربعين دقيقه
2- الدقاقة و ما ادراك ما لدقاقة اقل واحدة تاخود 7 الالاف ريال و الصوت بشع و الحمدالله من عدل الاغاني الي حتغنيها يعني من غير زعل ما فدقاقة سعودية يستاهل ادفع عليها مبلغ 1000 مو 7000 و لا بعضهم بيبالغ بياخود 12 و 14 الف مدة 3 الى 4 ساعات و بصراحة انا كمعزومة اشعر بالممل نفسي اسمع اغاني عراقي و لبناني و مصري و مغربي و خليجي و اغاني اجنبية مو بس دق خليجي و ياريتها متقنة الايقاع الا جدا جدا سيء
3_ البوفية ما عمري دخلت بوفية عجبنى امرهم غريب مجتمعنا يالبوفية الواحد يشمل كل الحضارات الذبايح الي تكلفتها الشى الفلانى غير طعام هندي على صيني على شامي على مغربي على ما كولات بحرية بصراحه نظام مجاعة ما فتنسيق و ياحرام تلاقيهم دافعين مو اقل من 15 الى 20 الف<<<والطعام و انتم بكرامة خساير على الفاضى و اتحدا لواحد خرج يمدح بالطعام و يفيض و يزيد كتير من الاكل
4_ التوزيعات انا ما نى ضد التوزيعات ازا كانت حتشمل عدد المدعوين فردا فردا لاكن الي لاحظتو بيسير العكس بيجبو توزيعات فخمة جدا جدا تكلفه الواحده مو اقل من 15 الى 10 ريال و ما ياخود منها الا 40 فرد من المدعوين و ناس ما تاخود تتفرج بس انا اعتبر به قله للذوق و التاليكيت العام طالما الي ربنا كرمكم تصرفو على التوزيعات مبلغ كبير بحبوحها شوية و خلو كل المعازيم ياخودو او من اصل الشى لاتجيبو توزيعات و الشى الي يضحك بالمقال التوزيعات و سطها حبه شوكولا فاخرة من باتشى و لا شوكولاين اعطيهم 5 دقايق فقط و تلاقى 20 % بالميه من المدعوين الي معاهم التوزيعات فكو العلبة و اكلو الشوكولا و رمو العلبة بوسط القاعه
5_ قاعه الحفله مو اقل من 15 الف سعودي طبعن خير الاضافات التانية زي الكوشة و المدخل خير فين عايشين ندفع 15 الف ريال او اكثر عشان اعمل فرح و بالنهاية يطلع الفرح ممل و الله لو كانت القاعة ايش لو حنمشي باعراسنا بالسلبيات الي ذكرتها فرح فاشل و ديون و تكلفة على الفاضي
6_ اغرب شي عندنا بيسير غياب اهم شخصيه محورية بحفل الزفاف الاهيا العروسة مسكينه تكون محبوسة بالجناح الملكي و ما تدرى و لاعن شي لا تسمع الدقاقة ام صوت نشاز و لاتشوف التوزيعات الي بتتوزع و لا تدرى عن موديل و تصميم القاعة و لا حاجة بينما يصبح العريس دافع مو اقل من 40 الف لتكلفة الفرح و هيا ما تنبسط و ترقص و تحلل الفلوس ما يبدا ظهورها الا احدث الليل نص ساعة و تروح و لا ازيدكم من الشعر بيت =تكون حايسة بزفتها و الاضواء خافتة يعني منجد ظلم و الله حرام فلوس بتنرمى على الفاضى بينما فالدول العربية المجاوره العروسة تحلل القاعة و الفستان و الكوشة مسنترة من اول الحفل بالقاعة و ترقص منجد هادى اعتبرها عروسة عندكم قناة مسايا خير دليل شوفواكيف العرايس محللين فساتنيهم و مكياجهم و قاعتهم و جميع شي
7_ توقيت الافراح عندنا بصراحة ما يتفق مع مجتمعنا المحافظ يعني اغلب المناطق تبداء الافراح عندهم 11 او 12 و تنتهى بعد الفجر و الله اتحد لو العروسة لما رجعت مع عريسها للجناح ما فصخت فستانها و نامت من التعب
8_ عدد المدعوين انا اتفاجاء لما احضر فرح و احصل انو المدعوين يتجاوز عددهم ال 300 شخص و بعد الاحيان يوصل 500 فرد و تحصلى نصفهم ما هم من العيلة و لا الاقارب عازمين الجيران و جيران الجيران و جيرانهم جميع واحدة جايبة صحبتها و جارتها لفرح البنت الي معزومة عشانو و تلاقى لاصحبتها و لاجارتها تعرف البنت و لا اهل العريس من باب الفشخرة مع انو فقاعدة جميع ما كتر عدد المدعوين زاد الصرف على البوفية و كميه الطعام و بتزيد تبعات على دى الزياده
9_ سعر الفستان المبالغ بسعرو جدا جدا جدا جدا جدا و بالنهاية تلاقيها بعد شهر عارضتو للبيع طيب لية من الاساس و رطتى نفسك به حرام تبيعى احلى ذكري للى ليلة العمر ما هو لو فستانها بسعر معقول كان خلتو و ما باعتو
10 _ الذهب انا مستغربة ففتيات بمجتمعنا تحط 3/4 مبلغ المهر بطقم ذهب لزوم عادات و بعد فتره ما تلبسو لسبب يانو جاتها عين و لا حساسيه من الاكسسوار و تضطر تبيعو فشخرة على الفاضى مع انو فحاجات اهم من الذهب تحط ميزانيتها فيلو
هادى هيا الحاجات الي مزعجتنى كواحدة بتحلم بليلة العمر
انا طبعن فكرت بالمقال و اتبحثت و شفت اغلب الاوربين و الا مريكان ما عندهم دى الافكار الرجعية الي تفقر الواحد بالعكس هما ناس عمليين راح اقولكم كيف
نتكلم عن مكان اقامه الفرح ياجماعة اصحو تدفعو 15 الف و لا 20 الف على قاعة لساعات غيرو و انا عن نفسي جبت بدائل
الاستراحات الي بمسبح مرت عليا استراحات تصمايمها جدا جدا فخمة و روعه ما تتجاوز تكلفتها ال 3000 ريال و اطلالة بانورامية على مسبح و هادا ما يتوفر بالقاعات الكبيره
طبعن انتو الي حتضيفو استئجار طاولات و كراسي اللافراح على حسب عدد المدعوين
فى ناس ما تعجبهم الاستراحات
فى حاجة احلا منها الشاليهات الخاصة بمسبح خاص و شاطيء رملى خاص المطلة اطلالة مباشرة على البحر طبعن دا خاص لسكان المناطق الساحلية افخم شالية تاخدية 4000 الاف ريال فكرة حديثة غير مستهلكه
ملاحظه : فحال توفر فيلا يفضل اقامه حفل الزفاف به بدل الاستراحة و الشالية لانو هادى البدائل خاصة للناس الي بيتهم صغير و ما فمكان لاقامه حفلة زفاف
نيجى للفساتين مو شرط انك تدفعى 10 الالاف ريال حق فستان بامكانك تلاقى نفس الموديل بسعر ارخص بحدود 2000 الى 3000لاتقولى ما لقيت حلو و الله السوق مليان بس مشكلتنا ما نجرى الا و را الغالى و الفشخرة لزوم مظاهر
دورو بالنت حتلاقو فساتين اشكال و الوان و باقل الاسعار و فحالة ازا كانت الماديه ما تسمح بشراء جديد يوجد الاستئجار فستان
نيجى للتوزيعات ازا الميزانيه تسمح انو نجيب توزيعات الاروع انها ما تكون توزيعات طعام او توزيعات بداخلها شوكولا
الاروع انها تكون حاجات عملية و مفيدة مثال
ملاحظه : هادى التوزيعات تعتبر غالية نسبيا تتراوح سعرها 10 الى 15 ريال للواحدة للبعض فالاروع يصبح عدد المدعوين محدود على الاقارب و الاصدقاء المقربين يعني بحدود 70 الى 100 شخص كحد اقصي لانو زي ما قولنا مو همنا العدد بل الكم بل بالكيف يصبح عدد المدعوين قليل عشان ما نتعرض للاحراج انو ناس تاخود و ناس ما تاخود و الي ما عندهم ميزانية للتوزيعات مو شرط يجيبو
بالنسبة للدقاقة الاروع توفير فلوسكم و تجيبو ديجيية يشغلك جميع نوعيات الاغاني الي بالموسيقي او بدون مع التحكم بعلو الصوت او انخفاضها و التحكم بنوع الاغاني يعني تحطى الاغاني على كيف كيفك هندي خليجي مصري عراقي شامي مغربي الاسعار تتراوح من 800 الى 1000 حسب حجم السماعات و عددها سعر معقول و منخفض نسبيا بالنسبة لسعر الدقاقة الي تاخود مو اقل من 7000 ريال
البوفية بدل ما نخلط الحابل بالنابل و يسير البوفية كانو مهرجان للاطعمة =العالمية نكون زي الاوربيين و الامريكان يختارو نوع معين من المنيو مثال :يصبح البوفية طعام صيني فقط لاغير يعني بدون مفاطيح و خرابيط
مايصبح مرا كتير الطعام و لاحجم الطاوله يصبح البوفية حجم معقول
و المنيو متنقى نقاوة
| اضغطى هنا لمشاهدة الصورة بحجمها الاصلي |
ملاحظة : فناس يحبو يصبح العشا تقليدى دبيحة فدى الحالة يكتفى فقط بالدبيحة او المفطح لاغير
نيجى لتوقيت الفرح يبداء من بعد صلاه العشا لحد 12 و الساعة 12 يدخلو المعازيم يتعشو يسير الاستراحة او الشالية يبداء يفضي من المعازيم و العريس يكمل فرحتو مع عروستة و يرقص سلو لحد ما يقولو امين 
و على فكرة فميزه انو الفرح يبدا بدرى و ينتهى بدرى عشان لما العروسة ترجع المنزل مع عريسها يمديها تعمل برامج رومانسية معاة لانو طاقتها ما استهلكت زي لما يصبح الفرح ينتهى 4 الفجر ترجع المنزل ما تشوف دربها
الدهب و طقم اللازوردى و لا داماس بامكانكم استبدالو بالدهب المقلد التاجرات بكل المنتديات يبيعو و ازا كان التقليد درجه اولي محد حيعرف الفرق بينو و بين الاصلي الا الصايغ
نيجى لنظام الزفة بدل ما لعروسة تجلس محبوسة بالجناح حقها تحت نظام عادات و تقاليد ما انزل الله فيها من سلطان تكون موجوده بكوشتها بعد اكتمال عدد المدعوين يعني تجلس ساعة فقط علبال ما تتجهز و يتبداء زفتها ما فاحلا من العروسة تكون مع صحباتها و ترقص معاهم و مع امها و مع اخواتها بجد تكون عروسة حقيقيه الفرح مو بتكلفتو الفلانية و لا اقامتو بالقاعة العلانية مهما صرفو على الفرح ملايين تظل افراحنا ناقصة طالما العروسة تظهر احدث الليل
وبالنهاية ابغا تجاربكم و افكاركم الاقتصادية لعمل زفاف بسيط و عصري و غير مكلف عشان نفيد الكتير و اعتبروها صدقة جارية فاللى عندها اسم محل يبيع فساتين رخيصة و روعه تكتب اسمو او عنوانو او اي معلومة تفيدنا مهما كانت بسيطة اسرديها بموضوعى اتمني محد يحدف موضوعى او يلغية لانو من اجتهادى الشخصى و ليس منقول و ازا كان مكرر اعذرونى و الرجاء الي حابة تنقل المقال لمنتدي تانى تذكر المصدر الكاتب و المنتدي الرجاء ما حلل و لا اسامح الي ينقل بدون ذكر المصدر
