هما الرجالة اتعموا ولا ايه ؟؟ ! انا مش عاوزه ابشر على حد من اخوانا في الجهاد اقصد الرجال .. وخصوصا ان امرهم يهمنا الكام سنه دول – شوية دلع لحد ما رجلهم تطب – بس الجمله دي بسمعها اكتر ما بسمع كلمة ازيك من الاهل والاحباب والاصحاب وميضرش عبده البواب او مريض جي يحنن قلبي عشان اكتبله على اجازه .
وعليه قعدت افصص السؤال الرجاله اتعموا – بعد الشر لحد ما ربنا يتمم على خير – وتوصلتلعدة احتمالات :
1 – يمكن بيغضوا البصر وساعتها يبقى كل الرجال محترمين وملهمش اخر والفيلم كداب .
2- يمكن مش عاجبهم الخلق الي بيشوفوها وبلاش احراج اكتر من كده .
3- يمكن نظرهم فعلا على قدهم والافضل اني اتخصص رمد يمكن اعالج حد فيهم ويكسب فيا ثواب قصدي العكس طبعا .
4 – يمكن عنيهم اندب فيها رصاص من كتر فرجتهم على قناة مولتي والتانيه الي مقدروش يغمضوا فيها عنيهم لحد ما تقرحت القرنيه .
5 – يمكن دي تلكيكه كل راجل بيقولها عشان يهرب بجلده قبل ما يتكلبش على اساس انه بيتكلم عن جنس تالت او على اساس ان البنات حلقة مفقودة بين الانسان والقرد .
