يا رجم عديتك وعدابي البين
والقلب في راسك تبيح كنينه
الله لا يسقي مفاليك عامين
ذكرتني براعي الطباع الحسينه
مرحوم يا اللي جهزوا يوم الاثنين
العصر من فوق النعش شايلينه
حطوا على خلي من الطين زافين
حطوا عليه اللبن وملحدينه
يا ليت كفي حدر خده عن الطين
والكف الاخر فوق صافي جبينه
او ليت يومي قبل يومه بيومين
ولا المرض ما بيننا قاسمينه
لا يا حياة الشر عقب اريش العين
لا وهني من شافنا تابعينه
قالوا علامك عشرك اليوم ثنتين
قلت اعذروني زين الاطباع وينه
قالوا تخير بالبنات المزايين
قلت كل العذارى غيرها منكرينه
قالوا عجوز وقلت وافالكم شين
الخمس والعشرين قيمة سنينه
وجدي عليها وجد راعي بعارين
امسى خلاوي والسرق حايفينه
هن راس ماله واشلعوهن شياطين
واصبح على الجرة يفرك يدينه
او وجد من لحقوه طلابة الدين
صكت عمي القايله لاحقينه
لحقوه عصمان الشوارب مغنيين
وتشاوحوه بكل شلفا سنينه
