خالد الفيصل شعر

بعض القصائد و الاشعار المشهورة للشاعر الكبير خالد الفيصل

كفاني عذاب

كفاني عذاب الله يجازيك بافعالك

جرحت الضمير ولا طرالك تداويني

مريض المحبه داه ودواه بوصالك

الا كيف تبخل وانت نظرتك تشفيني

الا عذابي كيف ما عاد يهنالك

سوى انك تشوف الموت بيديه يطويني

انا يوم احبك ماتذكرت غربالك

ولا قد خطر في بالي انك تجافيني

تفرغت لك يا ساكن القلب بحالك

تقل غيرك من الناس ماهم بحيين

انا قام يطرا لي بلاحلام مرسالك

وطيفك حبيبي بي الاحلام ناسيني

ارفعي سهم المنايا يالعيون

مابقى فيني مكان(ن) للطعون

كل شبر(ن) في حياتي انجرح

و الذي شقوا خفوقي يشتكون

يا العيون الطاغيه خفي علي

كبرت اللي باول ايامي تهون

في عيوني دمعتين واقفه

ردت الايام دمعي بالجفون

بالغت فيني تباريح الهوى

واستبدت بي المواجيع الظنون

خبريني يا غرام العاشقين

كيف يستهوي هل العشق المنون

ارحمي قلب(ن) تجاريبه قست

في زمان(ن) ماعرف يوم(ن) حنون

اللسان يخون و البسمه كذوب

واصدق التعبير نظرات العيون

ارفع راسك انت سعودي

ارفع راسك انت سعودي…طيبك جاوز كل حدودي

مالك مثيل(ن) بالدنيا…غيرك ينقص وانت تزودي

فارس و اجدادك فوارس…و اصبحت لبيت الله حارس

مغروس بالمجد و غارس…في ميدان العز شهودي

علمك غانم وجارك سالم…يخشى من هيبتك الظالم

راعي صمله دايم والم…سيف و قلب وفعل زنودي

بالعالم ما مثلك مسلم…دايم بالفضيله محرم

الخايف بدارك منعم…وعن دخيل حماك تذودي

دايم سيفك بيدك سله…ما تغمد سيفك منذله

و حجاجك دايم منفله…وانت بنصر الله موعودي

فهد القائد فهد الرائد…فهد الصقر الحر الصايد

و العيد بعون الله عايد…وسعودك ياوطني سعودي

البقية: روائع خالد الفيصل <<<<<قصائد مؤثرة جدا

هلت

هلت دموع السما عند الوداع وارسلت غيومها شوق وحنين

مد لي يمناه وانهى الاجتماع والهنا تبدل بدمع حزين

قال ودع ما يفيد الامتناع الشقا مقسوم مير الله يعين

رمشه الفتاك وعيون وساع صوروا بالقلب له رسم حسين

شوفتي له ساعة متاع متعة الدنيا نظر عين لعين

لي ذكرت اللي حدر هاك القناع مبسمه والخد مع نور الجبين

لو بغيت الصبر قلبي ما استطاع يا سعد يا كود فقدان الظنين

كل ما لاح بسما حبي شعاع اظلمت دنياي واشتد الونين

ياحسايف وقتنا والعمر ضاع نجتمع يومين والفرقا سنين

من يقول الزين

من يقول الزين مايكمل حلاه كل شي(ن) في حبيبي اكتمل

الله اللي كمله والله عطاه مابقى للزين في خلي محل

العيون احلى من عيون المهاه شافها قلبي و صفق و احتفل

نظرته من فتنته شعلة حياه والجفون من الحيا فيها كسل

ساهم(ن) رمشه على الخد وسناه كن لمعة وجنته ورد(ن)وطل

الشفايا كنها جمر الغضاه تحرس الريق المحلى بالعسل

والشعر ليل(ن) نقل حمرة مساه اجعد(ن) حول على صدره همل

مايج من فوق متنه ماطواه لون شلال(ن) مع المغرب نزل

وانطلق جيده يماري في بهاه فوق مياس(ن) تعزل واعتدل

بالرشاقه فيه من ظبي الفلاه لي مشى كنه على الروح انتقل

ريحته من كل زهر(ن) منتقاه والزياده للخزامى والنفل

صافي(ن) مثل المطر فوق الصفاه باسم مثل البشاير بالامل

جامع(ن) من كل زين منتهاه مستحيل الوصف في خلي سهل

كايد(ن) ماهو يلين لمن بغاه يرتفع عن كل سقطات الزلل

 

لا هنت يا راس الرجاجيل لا هنت

لا هان راس في ثرى العود مدفون

والله ما احطك بالقبر لكن امنت

باللي جعل دفن المسلمين مسنون

منزلك يا عز الشرف لو تمكنت

فوق النجوم اللي تعلت على الكون

سكنت دار المجد يا شيخ واسكنت

شعبك معك في منزل العز ممنون

صنت العهد يا وافي العهد ما خنت

علمتهم وش لون الاشراف يوفون

كم ظالم عاداك واعفيت واحسنت

واخلفت ظن جموع ناس يظنون

شلت الامانة حافظ ما تهاونت

شفنا بك رجال على النفس يقوون

يا اللي طلبه الملك بالحب زينت

عرشك بتاج قلوب شعب يحبون

لونت تاج الملك ما قد تلونت

ما غرتك دنياك ما صرت مفتون

بالزهد والمعروف والصبر كونت

منهاج فيصل منهج اللي يعدلون

تلفتت روس المخاليق وين انت

وين العظيم وعود الشوف مطعون

كم خافق وقف عقب ما تكفنت

وكم ناظر ذوب سواداه محزون

لو شفت حال الناس عقبك تبينت

مقدار حب الناس للي يودون

مما بقلبي قلت يا بوي لا هنت

والا انت فوق القول مهمايقولون