روايات غرام لا تبكي

في سيارة خالد..
سحر ابتسمت يوم شافت قطيع من الجمال ترعى على جنب الطريق… منظر خيالي .. رمال ذهبية .. سحاب ابيض… وصبح بارد ما بعد طلعت الشمس لفوق.. وقطيع من هالحيوانات العجيبة بخلقتها .. سبحان الله..!!
كانت السيارة صمت في صمت.. خالد ساند يد وحدة على الدركسون.. واليد الثانية على الباب.. وعيونه تغطيها نظارات شمسية سودا.. وامها كانت تكلم ابوها تلفون.. وسكرت من مدة..
التفتت ل بيان اللي بدورها كانت حاطه راسها على رجل اختها.. ونااايمة بكل براءة الدنيا..

قطع الصمت يوم قالت ام خالد : بيان مالها حس؟؟
سحر : نايمة يمه.. صاحيه من بدري..احسن لها تنوم عشان تكون نشيطة اذا وصلنا
ام خالد : بعد عمري.. مافيه اطفال على قدها بتروح الحين وتلعب لحالها قلبي بنيتي
ابتسمت سحر : اهم شي تغير جو الحين.. ما دام فيه تراب على قولها احسن شي.. بتغوص فيه كل الايام اللي بنجلسها هناك
ام خالد بحنية لطفلتها الصغيرة : حبيبتي..

تذكرت سحر ابوها ورفعت عينها : الا ابوي ليش ما جا معنا؟؟
ام خالد : توه مكلمني.. يقول ساعتين بالكثير وبيجي مع احد هالسواقين.. عنده شغله مع ابو راهي بيخلصونها وبيجي
تذكرت “ابو راهي”.. اسم قاله ابوها قدامها مرة : وما قدر ياجل هالشغلة؟؟
ام خالد : والله انا ما افهم بسالفة شغله كل اللي قاله مارح يتاخر..

سكتت… ورجعت تناظر الرماااال الممتدة قدامهم الى ماله نهاية..
تذكرت مشاعل.. وقررت تتصل فيها تسالهم هم وين؟!

في سيارة محمد،،
دق الجوال بشنطة مشاعل ولانها كانت نايمة ..مدت شادن يدها وسحبت الشنطة من الطرف الثاني وطلعته.. شافت اسم ” سحوره” .. ابتسمت وهي ترد : اهلا بسحوووورة ..
رفع محمد عينه بالمراية..
سحر : هلا بك شدون .. وينها البومة ليش ما ردت؟
شادن وهي تناظر وجه اختها النايم.. اللي اذا نامت تصير وديعة وبريئة عكس الشيطانة اللي تخطط وتمكر : هذي هي نايمة العمة ماخذة رجولي وسادة

سحر : ليش اجل سهرانة ؟؟؟
شادن : تعرفينها بنت عمك ما تنام الليل اكيد انها نايمة متاخر
سحر : حمارة هذا وانا قايلة لها نامي عشان نستغل الوقت هناك .. الحين بتروح هناك تنام وتضيع وقتها كله بالنوم..
شادن : خليها تنام وتصحى تساهر الحيايا والعقارب
سحر : هههههههههههههه طيب نشوفكم هناك كنت بس بسال وينكم ؟؟
شادن : لنا ساعة ماشين ..
سحر : اوكي نشوفكم

سكرت شادن وهي تبتسم… وناظرت من الشبااك.. وشافت نفس ما شافت سحر .. قطيع من الجمال.. بمختلف الاحجام…
زادت ابتسامتها النقية..خلف روح تتمزق..

تنتظر.. ويا صعب كلمة “تنتظر”.. تنتظر.. كلمة منه… تجدد اللي كان بينهم!!
كان يقولها… افرحي.. ولا تخلين ابتعادنا.. حاجز يمنع ابتسامتك..

وهي رغم كل قلقها.. وكل الضغوط.. والكوابيس اللي تعيشها… وزادت فوقها مكالمة البنت “نهى”… بتحاااول اليوم.. تعيش وتبتسم.. وتنسى كل همومها.. من حقها تنسى اللي شاغلها فترة.. وتعيش حاضرها..
وهالرحلة يمكن تكووون فرصة لتجديد النفسية.. والاحساس بالحياة واللعب.

بعد ساعتين وعالساعة 8 الصبح ،،..

في سيارة خالد … بدت ارض معسكر التخييم تظهر لهم واضحة للعيان ،، كل شي من بعيد يشير انه مرتب ..الخيام منصوبة.. الارض ندية مخضرة في بعض البقع خلال هالفترة من السنة ،،،..

وهم يمشون وسط التراااب ناحية المخيم البعيد .. فتحت سحر الشباك وطلعت راسها تخلي الهوا يلاعب خصل شعرها ..تنفست بعمق وهي تطلع يديها برا وتضحك مثل طفلة …
خالد : هههههههههههههههه عن البزارة..
سحر لانها وراه ناظرت انعكاس وجهه بالمراية الجانبية.. وقالت وهي تصرخ عشان يسمعها : ياخي الجووو نقي ليت جو الرياض كذاااااااا ..
خالد : باحلامك ان شالله ..
سحر : نقول يارب ليش التحطيم

وصلوا اخيرا … وهدت السيارة من سرعتها ..
سحر استغربت .. كل شي مرتب وباتقان بفعل فاعل.. لكن المخيم هااااادي مرة ما يشير لوجود احد !!

لكن يوم طفى خالد محرك السيارة … طلع شخص غريب من احد الخيام وهو مبتسم .. لابس جينز ازرق غامق.. وتي شيرت رمادي .. ونظارة شمسية على جبينه ..
التفت خالد وهو بينزل من السيارة… وانصدم من اللي شافه ..
سحر تنحت لانها اول من شافه يطلع.. وما عرفت منهو.. بس كانت تحس انها شافته من قبل !!