كان يا ما كان
كان فى شهيد فاكرينه مات
واقف يتفرج علينا من سكات
يدخل علينا زى نور المشربيه
ويزيدله شوقتا من حديث الذكريات
يسمع دموع الامهات
حمال اسيه
والصبر غيه
صوت المظاهره يلهمه
طالع لجنة ربنا على سلمه
والكام رصاصه الدفيانين جواه معدتش بتالمه
ايوه ماعدتش بتالمه
الا اما واحد صاحبه يبكى عليه ويتشحتف بكلمة زى
* الله يرحمه *
———————————
خلفتى يا مصر ومن خلف شهيد ما مات
سبع تلاف عام مواكب خير بتتوالى
خلفتى فرحه وفرحه غيرنا لسا ما جات
خلفتى كلمه لامه لسا قواله
خلفتى راجل بيهزم جيش من الاوغات
نعلى بافعلنا ونفوسنا ما تتعالى
بننحسب بالغلط فى لستة الاموات
واحنا اللى ما عشنا فوق ظهر الوجود عاله
———————————
كان ياما كان كان فى شهيد
كانت نهايته او بدايته لما يوم حفروا القتال
خلف شهيد كانت حكايته لما يوم عبروا الطريق
خلف شهيد عاش كالراجل
حربه اسمها اللقمه الحلال
كان فى شهيد عايز سؤال
مين اللى ماسك دفة المركب وحادف ليه شمال ؟؟؟؟؟!!!!
مين اللى خرب مركبك يا مصر ???
مين اللى داس الكوخ برجل القهر ???
————————————–
كان ياما كان كان فى شهيد رافع علامة النصر
يوم كان فى عباره ويوم كان فى القطر
وليله بايت فى الدويقه جوا بيت من سخر
وليله جوا القسم او فى المعتقل راضى وسعيد
خالد سعيد عاش كالراجل بسيد بلال
———————————-
كان ياما كان كان فى شهيد
خلف شهيد جاور شهيد
كان جد جده كمان شهيد
صاحب شهيد ناسب شهيد
جوز بناته الخمسه لولاد الجيران
طلعوا ولاد عم الشهيد
جابم شهيد
عاشم وما عاشوا يقاوموا القتل فى الطوابير
ماشين على المسامير
والكل بيعظم سلام لعصابة الخنازير
والظلم فاض
هات طوبه ياض
داخلين علينا البلطجيه طوال عراض
راكبين جمال شبه القراض
هات طوبه ياض
حصلى دغرى عند عبد المنعم رياض
بتقولى عبد المنعم رياض !!!!!!!
مش قولتلك
كان فى شهيد خلف شهيد
طب ايه الجديد
ربك يريد
انت الشهيد اللى جنبك ضى
واخد 3 رصاصات على شومه ماقولت الاى
زينة ولاد الحى
وانتاى الشهيده عروسه ملهاش زى
انت الشهيد وقصدتى ماشى فى موكبك بتزك
انت اليقين لامه عاشت عمرها بتشك
ماشى فى طريقك محترم والكل ماشى يعك
نزلتنا باسلوبك انت لزحمة الميدان من زحمة الفيس بوك
——————————————–
انت الشهيد ابن الشهيد اللى اتولد عشان يكون ابنه شهيد وابنه شهيد وابنه شهيد
طب ايه الجديد ربك يريد
وحياة كنايس ردت صوت الازان
وحياة شجاعة شعب ضد رئيس جبان
وحياة ما دمعنا وكحينا من بقنابل من دخان
وحياة سلاح الامريكان ضد الشعب
وحياة ما شاف الكون على اديان العجب
وحياة ما قداسنا وصلاتنا وحدوا كل مكان
وجمدوا جرى الزمان
وحياة مازيناك يا سور البرلمان
وحياة جرايت هلست واتريقت
وحياة فدادين الغلابه اللى على اهل القصور اتبعزفت
وحياة اراده اتجرات
وحياة عنين انخزفت
وحياة عنين تانيه فى وشوشنا برقت
الثوره دى مش ملكنا
احنا اللى ملك الثوره يا جدعان
وحياة نومتنا على الرصيف وسط الميدان
دم الشهيد اب الشهيد اللى اكيد ابنه شهيد
لازم ينور درب مستقبل جديد
—————————————
منصوره بينا يا مصر منصوره
رسمنا ثورتنا بالون العدل
وعملنا ما الدبابه سبوره
نكتب عليها راينا فى الندل
ونجيب ولادنا لاجل ياخودو جمبها صوره
ماشين بقدرة ربنا على الحبل
مايهمناش السجن ولا القتل
نايمين على الاسفلت شوكه فى حلق اى عصابه محشوره
منصوره بينا يا مصر منصوره
