منيو افطار رمضان

 

منيو افطار اليوم الاول رمضان: فراخ محشية ارز وخضروات.. عصير زبادي بالاناناس.. سلطة حمص بزيت الزيتون وام علي

العصير
زبادي بالاناناس

المقادير:-
• كوب زبادي منزوع الدسم
• كوب عصير اناناس
• 1معلقة صغيرة فانيليا
• كوب مية كبير
• 4 مكعبات ثلج “اختياري”

الطريقة:-
اضربي كل المكونات دي مع بعضها في الخلاط، وبعد كده صبيها في كاسات العصير، وضيفي اليها مكعبات الثلج.

طبق الشوربة
شوربة الفاصوليا البيضا بالخضار

فيه ناس كتير ما بتحبش تاكل الفاصوليا البيضا دي على الرغم ان ليها اهمية غذائية كبيرة؛ فايه رايك لما تجربي تعملي منها شوربة طعمها هيبقى احلى واحلى، ودي الطريقة..

المقادير:-
• 1/2 كوب فاصوليا بيضا
• كوب بطاطا او بطاطس مقشرة ومقطعة مكعبات متوسطة الحجم
• 1 ثمرة فلفل اخضر مقطعة قطع متوسطة الحجم
• 1 ثمرة فلفل احمر مقطع قطع متوسطة الحجم
• 1 ثمرة جزر مقطعة قطعا متوسطة الحجم
• 3 معالق سمنة او زيت
• 3 اكواب مية + مكعب مرقة دجاج”اختياري”
• 3 اكواب شوربة فراخ او لحمة
• ملح وفلفل
• اوراق بقدونس للتجميل

الطريقة:-
1. هاتي الفاصوليا وانقعيها في مية لمدة يوم او اسلقيها في المية، وبعد كده اغسليها كويس بمية باردة وحيطها في المصفاة.

2. هاتي صينية وحطي فيها السمنة او الزيت، وبعد كده ضيفي الفاصوليا وباقي الخضار، وقلبيهم مع بعض كويس، وبعد كده ضيفي اليهم باقي المقادير، وسيبيهم على النار لغاية ما الخضار والفاصوليا تستوي، اغرفي الشوربة في طبق الشوربة وجمليها باوراق البقدونس.

طبق السلطة
حمص بزيت الزيتون

المقادير:-
• كوب حمص جاف
• 1/2 كوب زيتون اسود مقطع شرائح
• بصلة مقطعة قطعا صغيرة جدا
• 2 معلقة طعام اوراق كزبرة، مفرومة فرما ناعما
• فص ثوم مدقوق مع معلقة ملح
• 1/8 معلقة صغيرة فلفل احمر مطحون
• 1 معلقة طعام زيت زيتون
• 2 معلقة عصير ليمون

الطريقة:-
1. هاتي الحمص واغسليه كويس وبعد كده انقعيه في المية لمدة 5 ساعات.

2. بعد مرور الخمس ساعات هاتي الحلة واغلي فيها الحمص بس خدي بالك ان النار تكون متوسطة الحرارة، سيبي الحمص على النار لمدة ساعتين او لغاية ما تلاقي ان الحمص بقى طري.

3. صفي الحمص من المية وسييبه لغاية ما يبرد، وبعد ما يبرد ضيفي اليه باقي المقادير وقلبيهم مع بعض كويس، واضربيهم كلهم مع بعض في الخلاط، حطي الخليط السابق في طبق السلاطة، ورشي عليه من على الوش زيت الزيتون.

الطبق الرئيسي
فراخ محشية ارز وخضروات

المقادير:-
• فرخة كاملة
• 1/2 كوب ارز
• 1/2 كوب بسلة
• جزرة مقطعة قطعا صغيرة
• 1/2 حبة فلفل اخضر مقطعة قطعا صغيرة
• 1/2 حزمة بقدونس مقطعة قطعا صغيرة
• معلقة كبيرة زبدة او 2 معلقة كبيرة زيت
• بصلة متوسطة
• معلقة كبيرة نعناع اخضر
• 2 معلقة صغيرة زعتر اخضر او جاف
• 2 معلقة كبيرة زيت ذرة
• بصلة مقطعة شرائح
• 1 معلقة صغيرة ثوم مفروم

الطريقة:-
1. اغسلي الفرخة كويس قوي من جوه ومن بره، وادعكيها من جوه ومن بره بالملح والليمون وبعد كده اغلسيها كويس بالمية، وسيبيها في المصفاة علشان تنشف.

2. افرمي البصلة مع الجزرة مع الفلفل مع البقدونس مع النعناع كويس قوي.

3. هاتي صينية وسخني فيها الزيت على نار هادية، وبعد كده ضيفي ليه مزيج الخضروات وقلبيه لمدة خمس دقائق، وبعد كده ضيفي ليه البسلة والارز والملح والفلفل، وقلبيهم مع بعض لمدة عشرة دقائق وبعد كده اطفي البوتاجاز.

4. هاتي الفرخة واحشيها بالخليط السابق بس خدي بالك انك ما تمليهاش قوي علشان الرز بيزيد، وهو بيستوي بعد ما تخلصي حشوها اربطي رجليها.

5. سخني الفرن الى درجة حرارة متوسطة واخلطي الزبدة بالثوم والملح والفلفل، وادهني بيهم الفرخة من جميع الجوانب ورشي عليهم من على الوش زعتر.

4. هاتي صينية الفرن وحطي فيها شرائح البصل المتبل بالملح والفلفل وحطي الفرخة وضيفي اليهم المية لتغطي ثلث طول الدجاجة فى الصينية.

5. غطي الصينيه بورق فويل وحطيها في الفرن لمدة ساعتين، وبعد كده خريجها، وشيلي الورق ودخليها تاني لمدة نص ساعة كمان علشان الفرخة تحمر من جميع الجوانب.

طبق الحلو

ام علي

المقادير:-

• 5 اكواب لبن حليب محلى
• 5 رقائق جلاش
• 2 معلقة كبيرة زبد
• 3 معالق كبيرة كريمة لباني
• 1/2 كوب زبيب
• 1/4 كوب بندق
• 1/4 كوب لوز

الطريقة:-
1. حطي الجلاش على صاج او صينية للفرن وحمصيه في فرن.

2. هاتي البندق واللوز وحطيهم على صاج او صينية للفرن، وحمصيهم في الفرن لمدة 4 دقائق.

3. في الوقت اللي انت بتحمصي فيه المكسرات سخني اللبن.

4. قطعي رقائق الجلاش الى قطع متوسطة وحطيها في طاجن كبير، وضيفي ليها البندق واللوز والزبيب، وبعد كده حطي اللبن في الطاجن.

5. سخني الفرن حتى درجة حرارة متوسطة (200 مئوية). وحطي الطاجن في الفرن لمدة 15 دقيقة او لغاية ما تلاقي ان الرقائق بدات في امتصاص اللبن.

6. خرجيه من الفرن وضيفي اليه الزبدة والكريمة من على الوش، ودخليه الفرن تاني لمدة 20 دقيقة اخرى او لغاية ما تلاقي لونه بقى ذهبي خرجيه.

صوما مقبولا
وافطارا شهيا باذن الله

 

 

 

 

• منيو فطار رمضان