المقادير اللى هقولها مش كتير وانتى زودى على حسب الافراد
المقادير والطريقة :
اولا :البصل (الورد):
هنجيب البصل ونقشرة ونقطعة حلقات رفيعة ونفككها من بعضه
نجيب حبة نشا او دقيق ونرشها على البصل ونقلبة كويس
نسخن زيت لقى البصل ونضعة بية ونقلبة لغاية ما يوصل لللون البنى المطلوب نطلعة على ورق مطبخ ونسيبة يبرد هنلاقية بيقرمش وطهمة جميل جدااااااا
بالنسبة للزيت هيبقى هو الزيت المستخدم معانا فى باقى الكشرى
ثانيا : المكرونة :
هنجيب مكرونة صغيرة او اسباجتى او الاتنين مع بعض ونسلقها فى ماية مع شوية ملح وزيت وبعدين نصفيها
ونجيب حلة نحط فيها حبة زيت من بتاع البصل فاكرينة هنحط حبة ونقلب فيها المكرونة على النار مش كتير ثوانى ونطفى عليها ونسبها على جنب
ثالثا: الشعرية :
هنجيب الشغرية نحمرها فى الزيت لغاية ما توصل لللون البنى الجميل دة وعندنا فى طريقتين وهى انك بعد ما تحمريها تسلوقيها زى المكرونة اوتزوديها ماية وتخليها تتشرب زى الرز وانا بفضل الطريقة الاولى لانها بتخلى الشعرية مش لازقة فى بعضها وبتبقى حلوة اوى بتسلوقيها بعد التحمير وتصفيها وتركنيها على جنب
رابعا: العدس ابو جبة والحمص :
بنغسل العدس كويس ونحطة فى ماية على النار لغاية ما يتسلق وبعدين نصفية ونركنة على جنب
الحمص هننقعة قبلها ب12 ساعة ونسلقة زى العدس
خامسا:الصلصة :
هنحط حبة زيت فى حلة ونحط عليها3 فصوص توم مفروم ونقلب لغاية ما ريحة التوم تطلع ويبقى لونة دهبى نحط حبة كسبرة ناشفة مطحونة وحبة شطة وكوب عصير طماطم وخل ونسبها لغاية ما تتسبك ونزودها شوية ماية بس مش كتير علشان تبقى تقيلة وطعمها حلو واول لما تغلى نطفى عليها
سادسا:الارز بالعدس الاصفر والعدس ابو جبة واختارو اللى يعجبكوا انا عن نفسى بفضل العدس الاصفر بيبقى طعمة احلى
رز بعدس اصفر:
هنحط حبة زيت فى حلة ونحط عليهم نص كوب من العدس الاصفر وكوب من الرز وبيكونوا مغسولين ومتصفين ونقلب كويس ونفض نشوحة شوية على النار لغاية ما هنلاقى لونهم اتغير شوية نضيف الماية هتبقى حوالى كوب وربع ماية ونظبط الملح ونسيبة لغاية ما يتشرب وبعدين نحط الشياطة ونسيبة يكمل سوا على نار هادية جداااااااا
رز بعدس ابو جبة :
كوب رز وكوب عدس اسمر
هنحط فى الحلة حبة زيت ونحط علية الرز والعدس الاسمر المسلوق نص سليق ونشوح شوية وبعدين نزود الماية ونظبط الملح ونسيبة يستوى
سابعا: الدقة:
عندنا طريقتين :
الاولى:
هنجيب حلة ونحط فيعا معلقتين زيت ونحط عليها حتة توم مفروم حوالى معلقة كبيرة واول لما التومة ريحتها تطلع بس قبل ما تتحمر نضيف عليها خل كتير ومعلقة صلصة كشرى وبعدين نحط شطة وكمون وكسبرة وعصير لمون ونسبها تغلى دقيقتين وبعدين نرفعها من على النار
الطريقة التانية :
هنحط برضوة معلقتين زيت وتوم واول لما التوم رحتة تطلع بس هنضيف الخل وكمون وكسبرة وشطة وبعدين نزودة حبة ماية ونسبها تغلى ونظبط الملح ونرفعها من على النار
ثامنا: الشطة :
نسحن زيت على النار و نحط عليه معلقتين شطه حاميه و معلقتين مايه عشان الزيت ميتحرقش
و بعدين نقلبها شويه و نحط عليها معلقه صلصه و نطفى عليها وكدة تكون جاهزة
واخيراااااااااااااااا التقديم :
هنجيب الطبق نحط اول حاجة المكرونة (المحلات بتعمل كدة )بس ممكن نخلى اول حاجة الرز مفيش مشكلة وبعد كدة المكرونة وبعدين الشعرية وبعدين العدس وبعدين الحمص وبعدين الورد
الصلصة والدقة والشطة بتتقدم جانب الطبق بالاضافة للليمون طبعا بيخلى طعمة روعة
لو عايزين تعملوا معاة سلطة بتبقى مكونة من طمطاط وكسبرة خضرا وماية وشطة وخل وملح وممكن نضيف خيار
لو اى حد عندة استفسار انا موجودة
جربوة ومتنسوش تدعولى لو عجبكوا وهيعجبكوا باذن الله
.
.
.
