ول خطوه بالزواج في بلاد الشام عامه وفي الاردن وفلسطين
خاصه هي ذهاب ام العريس واخواته لزيارة بيت اهل العروس
لمشاهدتها واذا ما اعجبتهم بينسحبوا بهدوء وكانها زيارة عاديه
واذا اعجبتهم بتكلموا مع امها في الموضوع وبطلبوا من الام تكلم الاب
عشان يعطوهم موعد للنضره الشرعيه
وهذي عنا امر ضروري جدا لايتم الزواج من غيره وهون بيجي دور الاب
بيبدء عمل تحريات وجمع معلومات عن العريس
واذا عجبه بيعطي موافقته على النضره الشرعيه
وفي اليوم المتفق عليه اول شئ بيجي العريس مع
امه واخواته فقط من غير رجااال بس في بعض الاحيان ابو العريس بيجي معهم
وبيجلس العريس مع والد العروس لوحدهم والنساء لوحدهم وبعدين
بتدخل ام العريس وام العروس وبيجلسوا معهم وهذي عادة عنا وبعرف امهات بيدخلوا منتقبين
وما بيتكلموا ولا كلمه بس بيتواجدوا كدعم نفسي للعروس بسبب
الخجل اما لبس العروس اثناء النضره الشرعيه يختلف حسب بيئتهم
ودرجة تدينهم في بتدخل بقصير وشعرها وفي بتدخل بحجاب
شرعي وما بضهر منها الا الوجه والكفين
وبعد شوي بتدخل العروس وبتقدم القهوة وهون بتكون اول
نضره وبتقعد العروس شوي يعني من 10 الى 15 دقيقه وبعدين بتطلع
واذا عجبوا بعض ابو العريس بكلم ابو العروس في الموضوع واذا ابوه مو موجود
ام العريس بتطلب من ام العروس
تحديد موعد لزيارة العريس وابوه وهون بيرجع ابو العروس يعمل بحث اوسع
واشمل عن العريس واذا ما اعجبه بعتذر
الوووو ما الكم نصيب عنا > وانتهي
واذا اعجبه الوضع بحدد يوم
وفي اليوم المتفق عليه بيجي العريس مع ابوه وامه
وهذي الزياره بتكون للاتفاق على التفاصيل مثل المهر
والشبكه والحفله يعني كل شئ واذا تم الاتفاق
بيحددوا يوم تيجي فيه الجاهه وهي بتتكون من عدد
كبير من الرجال والنساء
وطبعا ابو العريس بكون خبر كبير الجاهه بالمهر المتفق
عليه وبعد ما يقعدوا شوي بيجي احد اخوان العروس
وبقدم القهوة العربيه للجاهه واول شئ بيبدء بكبير
الجاهه >> الشيخ يعني
طبعا الكبير هون دوره بمسك فنجان القهوه وبيحطه
على الارض او الطاوله وبقول التالي
يا ابو فلان ما بنشرب قهوتكم الا تعطونا طلبنا
وابو العروس مباشرة بقول طلبكم اجاكم والبنت بنتكم
وبقوم كبير الجاهه بشرب القهوة وبعدوا الباقين
وبعدين بيبدء النقاش حول المهر >> منظر لانهم متفقين من اول
المهم بيقول ابو العروس مبلغ اكبر من المتفق عليهاذا كان قليل او بقول نفس المبلغ اذا كان كبير
وهون ببدء شغل كبير الجاهه
نزلونا مبلغ كذا لاجل الجاهه
ومبلغ كذا لاجل ابو فلان
وهيك لغاية لما يوصلوا للمبلغ الى بيرضي جميع الاطراف
وبعد الاتفاق بيقراوا الفاتحه وبيعطوا الضوء الاخضر للنساء تم الاتفاق >> وبتشتغل الزغاريد
وتوزيع الكنافه والبارد والشوكولا
والمهور عنا في الاردن بتتفاوت حسب الطبقة الاجتماعيه والبيئه >> والاهم الالتزام
ببدء المهر عنا من 1500 دينار الى 5000 الاف دينار :
والشبكه عباره عن طقم ذهب كامل اذا كان العريس مقتدر ماديا
او خاتم ودبله وسلسله بسيطه وساعه وحلق
وفي ناس ما بيشترطوا شبكه يعني حسب اهل العروس ووضع العريس المادي ”
وبتتفق الجاهه مع ابو العروس على يوم لكتب الكتاب
واول لازم الفحص الطبي هلا لا يتم عقد من غيره :
وكتب الكتاب بكون اما في المحكمه الشرعيه او في بيت العروس
وبعد كتب الكتاب العروس بتلبس فستان حلوو وبتروح الصالون >> اسمه المشغل في الخليج
او بتجيها كوافيره في البيت واذا كانت حلووه
ومو محتاجه مكياج وصالون
في البيت بتستشور شعرها وبتلبس فستانها وبس
وبعدين بتبدا الحفله وبتواجد اهل العريس واهل العروس
والجيران المقربين جدا جدا يعني بتكون حفله على صغير
وبيشرف العريس وبيقعد جنب عروسته وبيلبسها الشبكه وبيرقص معها كله هذا قدام النساء
والرجال بكونوا مجتمعين بالمجلس وبتم توزيع القاتو واحيانا الكنافه والشكولا والبارد
وقبل الزواج بيوم بتكون سهرة في بيت العروس اسمها>> ليلة الحناء او حفلة الوداع
وبيجي العريس واهله وقرايبه وجيرانه والاصدقاء وبيجيبوا معهم الاتي :
حنه — مكسرات — شوكولا وملبس — والحلو والبارد الى بتوزع بالحفله
وبيجلس جنب عروسته وبيلبسها باقي الذهب وكمان مره برقصوا
مع بعض وبعد حوالي ساعة اهل العريس بيروحوا بيتهم
واهل العروس بكملوا السهره وبتستمر للفجر بسهروا صاحبات
العروس واهلها معها بين ضحك ورقص وبكي ووداع
وهلا بنروح لبيت العريس كمان بيكون عندهم سهرة بس في شغله اهل العريس
ما بيعملوا حفله وحده لا مثلا العرس الجمعه بتبدا الافراح والليالي الملاح والسهرات
من يوم الاثنين او الثلاثاء وبتكون خاصه بالنساء فقط
ويوم الخميس يعني قبل العرس بالليله بتكون حفله للشباب وحفله للنساء
حفلة الشباب بتكون غير شكل فرقة ومطرب ورقص ودبكه وكمان في حنه بس العريس
ما بيحني الا ايد وحده بس واصحابه مثله وكمان السهره بتبقي
للفجر بس مو مثل سهرة العروس كلها فله لا فيها تعب كتيييير
والسبب انه الغداء عنا بكون يوم العرس بعد صلاة الضهر
مباشرة وهو عباره عن منسف ولازم بالليل يجهزوا الذبائح
وهلا بيجي وقت الغداء وببدا المعازيم بالتوافد على الخيمه المعده لهذا الغرض
ومن عاداتنا المعازيم كل واحد بيجي لازم يقدم شئ حسب طاقته ووضعه المادي
في ناس بتجيب معها خروف او ماعز وفي ناس اكياس كبيره من الارز والسكر
ونااس بس بتكتفي بتقديم النقوط >> عباره عن فلوس وكل شخص ووضعه
وفي نااس بتعمل كل الامور السابقة من هدايه ونقوط ”
وبهذا الوقت العروسه بتكون في الصالون من الصبح للعصر
وبعد العصر بيجتمعوا اقارب العريس واصحابه من الشباب وبياخدوه في بيت واحد منهم
عشان الحمام هم بيحمموه وبيعملوا حفله صغيره وبعدين وبيعملوا الزفه وهي عباره
عن طبل وفرقة شباب بتدبك >>> الدبكه نوع من الرقص التراثي في بلاد الشام
وبحملوا العريس على الاكتاف طول الزفه مع الاغاني الشعبيه المتعارف عليها عنا
اهل العريس بيتوجهوا لبيت العروس عشان ياخدوها لبيتهم او لصالة الافراح حسب البيئه
عنا في الباديه والقرى مافي صالة الا نادرا ”
وبيتوجهوا بموكب كبييير من السيارات تتوسطهم سياره خاصه للعروسين مزينه بالورد بكل انواعه وقلوب الحب الى بيت العروس
وهون بتكون المعاناة لحظات الفراق صعبة كتير خروج العروس من بيت اهلها كتير صعب
وكله بكي وعنا اغاني خاصه برددوها اهل العريس لما يدخلوا ياخدوا العروس
وبيردوا عليهم اهل العروس كمان باغاني خاصه
وما بيبقوا كتير من ربع الى نص ساعه فقط وبياخدوا العروس واهلها وقرايبها ليكملوا الحفله
اما في البيت او الصالة
اذا في البيت بتستمر الحفله لمنتصف الليل واذا في الصاله بس ساعتين
وثاني يوم عنا شئ اسمه الصباحيه بيجوا اهل العروسه وقرايبها من نساء ورجال
لبيت الزوجيه ومعهم الغدا وهو خارووف او اكثر حسب وضعهم وممكن بس حلو
والحلوو عباره عن كنافه >> كمياات كبيره
وعنا العروس ما بتزور اهلها الا بعد اسبوع من الزواج >> بس في ناس ما بتلتزم بهذا الامر
- لبس منتقبين
