عيد الام

عيد الام ، عيد سنوى بيحتفل بيه فى مصر و اوروبا و امريكا و بلاد كتيره فى العالم. فى مصر بيحتفل بيه فى يوم 21 مارس لتكريم الامهات بدا الاحتفال بيه سنة 1956. اول دعوه لعيد الام فى مصر قام بيها الصحفى و الكاتب المصرى مصطفى امين سنة 1943 فى كتابه “امريكا الضاحكه” لكن ما حدش وقتها اخد باله من الفكره لكن بعدها بعشر سنين راحت واحده ست لمصطفى امين فى مكتبه فى “اخبار اليوم” و حكت له عن قصة كفاحها فى تربية ولادها بعد ما اتوفى جوزها و ما اتجوزتش و كرست حياتها لتربية عيالها. و بقى ابنها دكتور و بعد ما خطب واحده دفعت له المهر و فرشت له الشقه لكن للاسف لما عزل لبيت الزوجيه مشى من بيت امه من غير حتى ما يقولها ميرسى.

اتاثر مصطفى امين بالقصه و فكر فى جحود الاولاد فابتدا ينادى تانى بفكرة الاحتفال بعيد الام لتكريم الامهات. اياميها كانت افكار العروبه لسه مسيطره فى مصر عن طريق الپروپاجاندا اللى النظام الناصرى كان مدورها وقتها و مالى بيها روس المصريين ، فهاجمت الجرانيل مصطفى امين و اتهمته بانه بيشغل المصريين عن موضوع غزو تركيا لسوريا، و جمال عبد الناصر نفسه اللى كان وقتها ملهى و لاهى المصريين فى مشاكل العرب بدل ما يشوف مشاكل مصر و ينهض بيها اعتبر فكرة الاحتفال بالام و تكريمها فكره سخيفه، لكن مصطفى امين استمر فى دعوته و راح لكمال الدين حسين اللى كان وقتها وزير التعليم و عرض عليه الفكره. كمال الدين حسين كان بيحب امه قوى فقبل الفكره و رحب بيها و اتكلم مع جمال عبد الناصر فى الموضوع و قدر يقنعه لان عبد الناصر كان بيحبه.

نجحت الفكره و بدا الاحتفال بعيد الام فى مصر فى 21 مارس 1956. و استمر الوضع على الحال ده لغاية سنة 1965 لما عبد الناصر اعتقل مصطفى امين و سجنه، و خاف النظام الناصرى ان الاحتفال بعيد الام كل سنه ممكن يخلى المصريين يفتكرو صاحب الفكره مصطفى امين، فراح مغير اسم عيد الام لعيد الاسره، لكن برقيات الامهات من كل النواحى انهالت على الديكتاتور فاضطر انه يرجع اسم عيد الام.

فى عيد الام بيهنى الاطفال و الكبار امهاتهم و بيهدوهم هدايا و ساعات بيتعمل احتفال اسرى صغير مليان بجو الحب و بتنتشر فى هوا مصر اغانى بتمجد الام و من اشهر الاغانى دى اغنية ” ست الحبايب ” من الحان الموسيقار المصرى محمد عبد الوهاب.

اتعرض عيد الام و اسم عيد الام لهجوم من المتطرفين الظلاميين عدوين الفرحه الانسانيه و الحب و بهجة الاعياد و بحقوق الستات وبالتالى الامهات ، فقالو انه بدعه و ان كلمة “عيد” المفروض تبقى “يوم” بس عشان يفضو محتوى الفكره الجميله من معانيها و يقضو عليها، لكن العيد و اسمه استمرو و فضل المصريين يحتفلو بيه و يكرمو امهاتهم كل سنه فى 21 مارس مع بداية فصل الربيع رغم كل المحاولات الاستبداديه و الظلاميه اللى اتعرض لها العيد.

• أجمل مقالات مصطفى أمين عن الأم
• عيد الامهات