المقادير :
نص كيلو مكرونه – 4 فصوص توم مفرومين و معاهم زنجبيل مفروم برضو – 5 طماطم معصورة و مصفاه من القشور – ملح و فلفل و رشه كاري
الكيفية :
– نضع مقلاه على النار و بها 4 معالق زيت
– نضع التوم و الزنجبيل فالمقلاه و نحركهم “لو مفيش زنجبيل فريش حطى باودر”
– نحركهم على نار هادئه عشان التوم بيحمر بسرعه و احنا عايزينة مصفر بس
– نروح ضايفين الطماطم
ونتركة على نار عاليه لحد ما يغلى كويس نروح مهديين النار و سط و نسيبة يستوي
ونروح نسلق المكرونه بتاعتنا بقي :
– نحط اناء على النار و نضع به كميه مناسبه من الماء و عليه 3 معالق زيت و معلقه ملح
– لما تغلى المايه نضيف المكرونه و بالتاكيد من غير ما تتغسل
ملاحظين المايه مغطيه المكرونه ازاااى لازم المكرونه تكون مش باينه بالمنظر دا عشان تستوى براحتها و ما تتعجنش و ما تتهريش
نسيبها لحد ما تغلى كويس و نروح مهديين النار و سط بحيث تكون بتغلى برضو و احنا مهديين و نحسبلها 6 دقيقة بالضبط و ثم نروح
نختبر استواءها لو لسه نسيبها دقيقه كمان و نشوفها عشان ما تتعجنش و تبقي رائعة و سايبه بعضها عند الغرف .
.
– بعد ما ستوت نحطها فالمصفي فالحوض بس نسمى الله الاول عشان المايه السخنه و نروح قالبينها فالمصفاة
– نشطفها بالماء البارد و هي فالمصفي زي ما هيه عشان نتخلص من النشا الزايد عليها و عشان تتفكك من بعضها
و نروح مرجعينها الحله تانى و نحط عليها الصلصه بعد ما ستوت
– نقلب المكرونه بالصلصه كويس و نضيف عليها ملح و فلفل و الكارى كمان و نحط معلقتين سمن بلدى و نقلبهم كويس
ولو عايزه المكرونه بصلصه اكتر ابقى زودى فالطماطم من الاول .
.
