طريقة كشرى المحلات

جربوا و اوعوا تنسوا تدعولى

المقادير الي هقولها مش كتير و انتي زودي على حسب الافراد

المقادير و الكيفية :


اولا :البصل (الورد):


هنجيب البصل و نقشره و نقطعة حلقات رفيعه و نفككها من بعضه


نجيب حبه نشا او دقيق و نرشها على البصل و نقلبه كويس


نسخن زيت لقي البصل و نضعه بيه و نقلبه لغايه ما يوصل للون البني المطلوب نطلعه على ورق مطبخ و نسيبه يبرد هنلاقيه بيقرمش و طهمه رائع جدااااا

بالنسبة للزيت هيبقي هو الزيت المستخدم معانا فباقي الكشرى

ثانيا : المكرونه :


هنجيب مكرونه صغار او اسباجتي او الاتنين مع بعض و نسلقها فما يه مع شويه ملح و زيت و ثم نصفيها


و نجيب حله نحط بها حبه زيت من بتاع البصل فاكرينه هنحط حبه و نقلب بها المكرونه على النار مش كتير ثواني و نطفي عليها و نسبها على جنب

ثالثا: الشعريه :


هنجيب الشغريه نحمرها فالزيت لغايه ما توصل للون البني الرائع ده و عندنا فطريقتين و هي انك بعد ما تحمريها تسلوقيها زي المكرونه اوتزوديها ما يه و تخليها تتشرب زي الرز و انا بفضل الكيفية الاولي لانها بتخلي الشعريه مش لازقه فبعضها و بتبقي روعه اوي بتسلوقيها بعد التحمير و تصفيها و تركنيها على جنب

رابعا: العدس ابو جبه و الحمص :


بنغسل العدس كويس و نحطه فما يه على النار لغايه ما يتسلق و ثم نصفيه و نركنه على جنب


الحمص هننقعه قبلها ب12 ساعة و نسلقه زي العدس

خامسا:الصلصه :


هنحط حبه زيت فحله و نحط عليها3 فصوص توم مفروم و نقلب لغايه ما ريحه التوم تطلع و يبقي لونه ذهبي نحط حبه كسبره ناشفه مطحونه و حبه شطه و كاس عصير طماطم و خل و نسبها لغايه ما تتسبك و نزودها شويه ما يه بس مش كتير علشان تبقي تقيله و طعمها حلو و اول لما تغلي نطفي عليها

سادسا:الارز بالعدس الاصفر و العدس ابو جبه و اختارو الي يعجبكوا انا عن نفسي بفضل العدس الاصفر بيبقي طعمه احلى

رز بعدس اصفر:


هنحط حبه زيت فحله و نحط عليهم نصف كاس من العدس الاصفر و كاس من الرز و بيكونوا مغسولين و متصفين و نقلب كويس و نفض نشوحه شويه على النار لغايه ما هنلاقي لونهم اتغير شويه نضيف المايه هتبقي حوالي كاس و ربع ما يه و نظبط الملح و نسيبه لغايه ما يتشرب و ثم نحط الشياطه و نسيبه يكمل سوا على نار هاديه جداااااا

رز بعدس ابو جبه :


كاس رز و كاس عدس اسمر


هنحط فالحله حبه زيت و نحط عليه الرز و العدس الاسمر المسلوق نصف سليق و نشوح شويه و ثم نزود المايه و نظبط الملح و نسيبه يستوى

سابعا: الدقة:


عندنا طريقتين :


الاولى:


هنجيب حله و نحط فيعا ملعقتين زيت و نحط عليها حته توم مفروم حوالي ملعقه كبار و اول لما التومه ريحتها تطلع بس قبل ما تتحمر نضيف عليها خل كتير و ملعقه صلصه كشري و ثم نحط شطه و كمون و كسبره و عصير لمون و نسبها تغلي دقيقتين و ثم نرفعها من على النار

الكيفية التانيه :


هنحط برضوه ملعقتين زيت و توم و اول لما التوم رحته تطلع بس هنضيف الخل و كمون و كسبره و شطه و ثم نزوده حبه ما يه و نسبها تغلي و نظبط الملح و نرفعها من على النار

ثامنا: الشطه :


نسحن زيت على النار و نحط عليه ملعقتين شطة حامية و ملعقتين ما ية عشان الزيت ميتحرقش


و ثم نقلبها شوية و نحط عليها ملعقة صلصة و نطفي عليها و كده تكون جاهزة

واخيرااااااااااا التقديم :


هنجيب الطبق نحط اول حاجة المكرونه (المحلات بتعمل كده )بس يمكن نخلي اول حاجة الرز مفيش مشكلة و بعد كده المكرونه و ثم الشعريه و ثم العدس و ثم الحمص و ثم الورد


الصلصه و الدقه و الشطه بتتقدم جانب الطبق بالاضافه لليمون بالتاكيد بيخلي طعمه روعة

لو عايزين تعملوا معاه سلطة بتبقي مكونه من طمطاط و كسبره خضرا و ما يه و شطه و خل و ملح و يمكن نضيف خيار

لو اي حد عنده استفسار انا موجودة


جربوه و متنسوش تدعولي لو عجبكوا و هيعجبكوا باذن الله


طريقة كشرى المحلات