هاذي بعض قصايد بندر بن سرور اللة يرحمة
انا الذي ما ابدي على الناس سري .. . من خوف سودان الوجيه تحكي به
اصبر على ظيم الدهر و التعري .. . من شان من يرضى علي الغليبة
و ابعد مجالي عن عيال التزري . .. من لا هوى قلبي دواه المغيبة
واخاف لي من مجلس ما يذري … في جانبه بوم حساسه صليبه
و سوالف مابين بحث و تحري .. . يجرح فؤادي عيه و ابتلي به
يرضيني المقسوم خيري و شري . .. سبحان من لا تعلم الناس غيبه
احد على ربعه يحب التحري . .. للشر بلاس و خيره بجيبه
هذاك يالربع انا منه متبري .. . لو عضني ناب الدهر ما انتخي به
من خوف يضحك لي و هو يستغري … يفتل حبال السو ما يندري به
يفرح علي بكل شي يمري .. . و ان شاف يمي خير عني نهيبه
===================
قصيدة يتوجد فيها على معشوقته بفرت :
الا وا وجودي وجد من صك دونه باب .. . بقفل اعجمي مغلقات مساميره
عدو به على اللي كنه النسر بالمرقاب … على الجمس الاصفر كاملات شراشيره
معه فرت خمسة طن ياخذ مية ركاب .. . من المال عين ينقلنه تغاييره
دخل هو و حمله للحكومة بغير حساب .. . و راعيه عشر سنين و يعاد تقريره
على اللي كواني كية العظم بالمشهاب … على اقصى عراو القلب محمي مناشيره
عشيري ورا الكوده وانا من ورا مشعاب … بعيد قريب تعيب يا هون تيسيره
ولا يوصله كود ” فرت ” عليه اسطاب .. . ليا حاسب السواق تقدح مواخيره
صنايع بياطير الكفر لابسين الكاب .. . عصاة اليهود اللي مشاريبها البيرة
الا يا نديبي فوق فرت ورد من شرق … على راس قيره للعليمي تعاشيقه
من الوارد اللي جمركه عند راعي عرق … على المطرق مجبور ياخذ قماريقه
===================
قصة خط على فرت من الشام :
من بلاد الشام جينا بالمكينة … فوق فرت ما تخثع بالطماني
يحتدي مثل الجمل تسمع رطينه .. . مع طمان القاع مثل الثعلباني
والشفير من المدارس مطلعينه .. . عن ظلام الليل شب الكهرباني
كل ما جاه تل يلعن والدينه.. . باليمين اللي على كل اليماني
ما تجيه يسار رجله شوف عينه .. . غير يسرى الطار شي بالاماني
يوم قال له الخوي عاشت يدينه . .. شد رجله للكمك واحد و ثاني
يالله انك تنصره من نصر دينه .. . ان عطى له مع غبا ولا بياني
قلت يالمطنوخ انا عيني حزينه.. . من شراب اللف ابيه و عنك كاني
قد رمى بالكيس قدمي قال وينه … دوك ما بالجيب عن شي لهاني
قلت ثالث قال يالله لا تهينه . .. قلت خامس قال يطلب نقل ثاني
قال واحد و الكمك واسمع حنينه … كيف ما ترضى عليه بالهواني
قلت واحد و الكمك ضام المكينة … قال لي من يرحم القاسي لياني
قلت والله يرحمونه صانعينه . .. قد زعلت من اللهيب اللي حداني
قال ما ناثق بمن هم متقنينه … عن مشاور غير عرفي قد كفاني
قاطع عرقين مادري وين وينه … قد وصلت الارض و اسمع صوت ثاني
قلت دوك اللف خابوا شاربينه … غطني عن شوف شي ما خفاني
راكب اللي مخ رجليه خنزير و هوا . .. اشهب في مقدمه باقين و عكس تاج
متر في مترين مستبرم كله سوا .. . حايفه حطاب ما سمكره راعي الكراج
ان نعشته بالثلاثة مع اللفة عوا .. . عوي ذيب محتدينه مربية النعاج
ثابت ما يختلف كلما لف انزوا .. . و ارتفع ثم ارتخى مثل طايرة المراج
كن ضرب المرو في الويل قدام و ورا . .. ضرب هملول البرد و ان تقفاه العجاج
منوة اللي مشفقن لهله و لهم نوا . .. من بعد طول المسافة يبي فلة الحجاج
===================
من القصائد المشهورة لبندر , و كلها حكمة, و كل بيت منها يحتاج لصفحات
يالله يا جال الامور المهمة . . تجلى وهق قلب برى حال راعيه
البر دجته و البحر رحت يمه . .. ادرج سبب حظ على الله مساعيه
يوم ان ولد اللاش رزقه على امه … رزقي على اللي ميت القشع يحييه
ماني وانا بندر ببياع دمه . .. يقطعك يا بياع دمه و مهفيه
اللي يبيع لابسات الازمه .. . ثور يبي بيض العماهيج تغنيه
يزعل ليا جت ليلة الدول يمه … يرضى بسوق المال باخيه و ابيه
خطو البخيل اللي يكبر معمه … يقرا الكتاب و واجب الله مخليه
اما هرج له في رفيقه بنمه .. . والا عطا و امه تضيع هقاويه
يا مل قلب كل ما مات همه . … دارت دواليب الدهر لين تحييه
فراق شمل الناس عيا يلمه .. . وقتن يشيب الراس من شاية فيه
احدن ينام و حط راسه بكمه . .. و احد تخم النوم عينه و تخطيه
و احدن يحاول بالردى بنت عمه … و احدن يحاول ستر عذرا عوانيه
تخالف الانظار شرقن و يمه .. . كل هدف رايه من الناس مرضيه
انشدك ياللي كل شي تتمه .. تقرا الكتاب كل فرض تصليه
ويش القليب اللي عميق مجمه … ما سر غرسه ماه عطشى سوانيه
سم السبب يا عارفن عنه سمه .. . سم السبب يا عارفه قبل اسميه
والله يا لا لا كلمة قيل ذليت .. . لاترك مقاصى اللاش نقص و مهونة
لا شك ضراب المثل به تقديت …. من حرك المجنون ناطح جنونه
===================
قال يوصي رشيد :
يا رشيد يوم اتعبتني بالتناشيد .. . خذ لك من الدرويش زبدة قصيده
ليا عبدت الله ولا اشركت تعبيد .. . ترى محمد صفوة الخلق سيده
و ترى ابرك الحاجات يوم صدف عيد … جمعة اسبوع و صادفت يوم عيده
و اذكر لك الاجواد صد و صواميد .. . و انذال لا صدت ولا من صميده
و اذكر لك اقشر ما على السيد و البيد … اللي طمع بنت القصير الحديده
فضح قصيره عنده انه كسب فيد .. . سولف بها للناس خطو البليدة
سولف بجرح ما لجرحه تضاميد .. . زود لجرحه جرح ينزف صديده
ليا وطاك اللي وطاني تراديد .. . رد السؤال ولا تخبر بريده
اضرب ثلاث بعشر و اجمع تفاريد . .. و فرق على العشر القليد بقليده
واللي بقى لو تفرقه للمواديد . .. كم تفرقه بين الوديد و وديده
انا الذي قد مرني سلك تجنيد . .. خدمت به سنين عديده
مرحول هم و كل شي له اجيد . . اجيد زين و شين و الهم اصيده
اسمع صرير القلب بين الجواريد . .. حدنه الاضلاع و اسمع صريده
صرير فرخ حده اقطم صواريد .. . اول طرد قرناس ثاني حريده
هذا و انا شفت الوزا و التزاهيد .. . لا اقول حي ولا تحت قبر ريده
والله ما اهني قاضي العمر ترغيد … ابن اللئيم اللي حياته رغيده
اهني القلب الخطا بالمراقيد .. و ضب الخلا لو ياكل رديده
ما يطلع القرناس من عش بطه .. . و الجبو ما يحيي النوامي شفيطه
ليا صار من ربعك اقيشر و نطة .. هز المحالة لين يفرط شريطه
تراه ما ينفع عساها تلطه . .. خيال دجل و مثل عنز ربيطة
===================
وهاذي بعض المقاطع حصلت عليها ايضا
يا بجاد لو صادفت ورع صدفناه 000 على طلوع صفوف ثاني اعدادي
ابو جديل يوم تدلج زواياه .. . سباح غبات مع الموج غادي
يمكن يصبون الذهب من شفاياه . . والا بخده يزرعون الزبادي
———
يا بنت ياللي عينها عين شيهان .. . حر قطامي فعوله عطيبه
والقرن ذيل اللي تشعشع للاكوان .. . بنت الاصيل اللي طويل سبيبه
و الردف يطوي الثوب و العود ريان … و الخد بارق مزنة مستجيبة
اسايلك بالله خلاق الانسان . .. الله عليتس انتي من ايا عتيبة ؟؟؟
——
يا زين فنجال على نومة الناس .. . زرع اليمن و اللي مسويه عيده
يبري العماس اللي فضى خوتة الراس … روابع يقفي و يقبل بريده
—-
يا بنت ياللي عمرها صدر و ردوف . .. بيض محاجرها و حلو نباها
ودي بشوفك مير يوم اقصر الشوف .. . عيني بعد هاك الرمد قل ماها
