ازاى ارسم حواجبى

بقولكم قصتي  .. بالاول ماكنت اهتم بالحواجب ولما اشوف ماركات الميك اب ينزلون شي للحواجب اقول وش هالمبالغه يعني نرتب حواجبنا وخلاص خصوصا ان حواجبي خفيفه ومرتبه وهذا اللي خلاني ماهتم للفكره ابد  .
باخر سنه بالجامعه صرت اركز بحواجب البنات ههههه وصرت افرق بين المرسومه وبين الشهباء زي حالتي وقررت اشتري علبه الحواجب من بودي شوب ومن بعد ماكان رسم الحواجب شي ثانوي صار عندي شي اساسي واول ما ابتدي بالميك اب ابتدي بحواجبي > سبحان مغير الاحوال ♡♡♡.
اتوقع كثير منا نفس الشي و كل ماتوسعنا واطلعنا بالميك اب كثرت اساسياتنا بالنسبه لي  الحواجب المرتبه تجمل الوجه وتعطيه الايطار الرائع للعيون خصوصا وللوجه بشكل عام .
اول شي لازم نتعرف على شكل حواجبنا الاساسي بعدين ندور الرسمه المناسبه بعض البنات مشاء الله حواجبهم الطبيعيه جميله من خلقه ربي وبعضهم يبي لها تعديل سواء بالتشقير او اي شي ثاني .
لما تحددين الرسمه المناسبه تشرتين المنتج اللي يناسب سواء قلم او باودره عن نفسي افضل الباودره القلم مايعطي الامتلاء الطبيعي .
نجي للرسم فيه اربع نصايح مهمه بقولها لكم  :
١- اللون اهم شي يكون مقارب للون شعرك .. مثلا شعرك بني فاتح اختاري بني افتح او اغمق بدرجه انتبهي يكون مخالف بشكل تام .
٢ الغرض من الرسم هو الامتلاء بين الشعيرات لاترسمين رسمه تكون كانها لصق او ستيكر حاطته على حواجبك حاولي قد ماتقدرين يكون طبيعي .. شوفي حواجب العارضات من قريب تقدرين تشوفين الجلد بس  من بعيد يكون الحاجب ممتلئ باللون .
٣- انتبهي يطلع اللون برا الحواجب مهما كنتي مستعجله لايطلع اللون لبرا او يكون نازل لاخر شي .
٤- ابتعدي عن رسمات الحواجب اللي مره حاده اللي توحي بالشر وابتعدي عن الرسمات المقوسه اللي كانها افلام كرتون : )

شكل الاوجه مع رسمه الحواجب المناسبه :
رسمه وجهك مهم تكون متناسقه مع رسمه حواجبك ويصير فيه توازن .. ضروري تعرفين رسمة وجهك فيه ست اشكال للوجه راح اذكرها مع الشكل المناسب للحواجب لها نبدا على بركه الله :
١- الوجه البيضاوي يعتبر هالشكل من اجمل الاشكال ويقبل عليه كثير من الرسمات واجمل رسمه تكون فيه زاويه ناعمه بالاخير او اخر الوسط مثل وجه الممثله قريس كيلي شوفوا كيف التناسق :

٢- الوجه الدائري اذا كان وجهك دائري لازم ترسمين رسمه تخليه اطول شوي وهي انسب شي لهالنوع من الاوجه فاحسن رسمه راح تكون المقوسه بشكل حاد شوي بالزاويه شوفي صوره هالممثله وكيف التناسق:

٣- الوجه الطويل بما ان الوجه طويل يفضل تكون الرسمه تعطيه قصر شوي اذا اخترتي رسمه تطوله ماراح يبين الجمال ويصير ملفت بشكل سيئ  انصحك تكون حواجبك مسطحه او مستطيله هاذي اجمل رسمه راح تضفي جمال على وجهك وعيونك مثل جسيكا البا بهالصوره شوفوا كيف حواجبها وهي وجهها يعتبر من الاوجه الطويله :

٤- الوجه المربع يعتبر من اكثر الوجه حده لان الفك يكون حاد وبارز افضل رسمه هي رسمه حواجب حاده بالزاويه مثل شكل كاميرون دياز لاحظو كيف التناسق وتخيلوها بحواجب دائريه او مستطيله ماراح تكون بنفس الجمال:

٥- الوجه القلب شكل الوجه القلب يكون الذقن دقيق وعريض م عند الجبهه يناسب له رسمتين اما تكون خط مستطيل مرتفع بشكل ناعم ونحيف بالاخير او مقوس بشكل لكن ناعم بالزاويه ريز ويذرسبون يعتبر وجهها بشكل القلب ولو تشوفون بقوقل صورها ترسم برسمتين مختلفات مره مقوسه ومره مستطيل ناعم مرتفع شوفوا الصوره هنا :

٦- الوجه الجوهري من اصعب الاوجه لانه حاد وعريض والجبه صغيره هو اقل الاوجه شيوعا اذا كان وجهك جوهري اهم نقطه ماترسمين رسمه حاده وراعي تكون ناعم عشان تعطي التوازن المطلوب شوفي هالي بيري يتتميز وجهها بالشكل الجوهري وترسم رسمه حواجبها بشكل ناعم مرتفع من الزاويه بشكل خفيف جدا:

بالنهايه كل ماتعرفتي على شكل وجهك كل ماعرفتي الرسمه المناسبه وحتى القصات المناسبه واختاري المنتج اللي يناسبك سواء قلم اوبودره او شدو وبفتره بسيطه راح تتقنين الشكل الجميل اللي يناسبك ويطلع شكلك اجمل بكل شي حتى لو رسمه كحل بسيطه وروج يطلع شكلك مرتب ومتناسق .

نجي لكيفيه الرسم:
بعد ماتختارين القلم او البودره اللي تناسبك اختاري الفرشه مع البودره وانا استخدم سماش بوكس من اجمل فرش الحواجب اللي جربتها ميزتها مب ناعمه مره وهذا هو النوع المثالي للحواجب لانها منطقه خشنه نوعا ما فيبي لها شي يمسك عليه اللون .
ابدي خوذي كميه وارسمي من الوسط لحتى النهايه بعدين ارجعي للبدايه وحددي بشكل متناسق بعد ماتخلصين مشطي حواجبك بمشط الحواجب الخاص عشان يندمج اللون الموضوع بسيط جدا جدا ومع الممارسه ماراح ياخذ وقت .
بالنسبه للبودره ممكن تستخدمين شدو اذا كان ماعندك الا هو يفضل مايكون بودره مره ومتناثر .. مثلا حق بودي شوب ميزته انه صلب ومايتطاير اذا اخذتي منه .
بعد ماعرفنا اشكال الوجه والرسمات المناسبه حابه اوريكم هالمغنيه قبل وبعد مازينت حواجبها وكيف تغير شكلها بعد ماكانت بشعه صارت تهبل

يالله الجنه فرررق ..♡♡♡
بالنهايه هاذي ادواتي بالحواجب منذ الازل البودره متوفر في محلات بودي شوب هاذي العلبه الثالثه اللي بخلصها والفرشه متوفره في محلات وجوه وكتبت عنها هنا فرشه حواجب من سماش بوكس .