استحمام متكامل

اولا كده فى ثلاث خطوات اساسية سواء للعناية ببشرة الجسم او الوجه, هما:
1.ازالة الشعر (اكيد كلنا عارفينها)
2.التقشير (لازالة الخلايا الميتة والجلد الميت والبدء على نظافة)
3.التنظيف العميق (لازالة الاوساخ اللى بتتراكم على الجسم او الوجه وفتح المسامات لتهيئتها لعملية الترطيب)
4.الترطيب (ودى خطوة اساسية ومهمة جدا للحفاظ على عملية التنظيف عشان تغلق المسامات وتمنع دخول الملوثات, وايضا لازمة اذا كنا عملنا تقشير)

اولا: ازالة الشعر الزائد حاجة كلن بنعملها لكن الاختلاف بس هو الطريقة اللى بنعمل بيها, يعنى لو بنحب نشيل الشعره من الجذور يبقى يا اما بينعمل بالشمع يا اما بالسويت يا اما بالسيلك ابيل او ماكينات ازالة الشعر المختلف الماركات. لكن لو مش بنستحمل نشيله من الجذور يبقى بنعمل بالكريم او ماكينات الحلاقة النسائية.

ثانيا: التقشير ده عملية مهمة جدا, خصوصا اذا كانت طبيعة جسمنا من النوع اللى بيقشر او بتراكم عليه الجلد الميت, لكن اذا كنا من اصحاب البشرة الحساسة يستحب بلاش تقشير او التقشير يكون براحة جدا, لان اصحاب البشرة الحساسة بشرتهم بتلتهب من اى حاجة.

واذا كنا من اصحاب البشرة الدهنية التقشير مهم لانه بيعمل على تقليل الافرازات الدهنية واللى كلنا عارفين يا فتوكات اد ايه بتبئى مزعجة, وكمان لو احنا من اصحاب البشرة الجافة بتبئى مهمة لانه بيزيل الخلايا الميتة اللى بتقشر من جسمنا واللى كل اصحاب البشرة الجافة بيعانو منها, اما اذا كانت بشرتنا عاديه (وده احسن نوع من انواع البشرة لانه بيوازن الافرازات الدهنية فى جسمنا) فده بيعتبر نوع من انواع العناية الاساسية مش اكتر.

دلوقتى اتعرفنا على اهمية التقشير طيب ايه النتيجة اللى ممكن نحصل عليها لو عملية التقشير دى تمت بشكل صحيح؟1.الافرازات الدهنيه فى جسمنا بتتوازن.2.ساعات يا فتوكات بيبقى بعد الحساسية ما بتروح بيفضل مكانها كده زى قشور, التقشير بيزيلها.3.لو احنا بطبيعتنا جسمنا غامق شوية, التقشير بيساعد على انه يفتحنا, لانه بيعمل براحة على انه يزيل الطبقات الاولية من الجلد وده بيساعد على انه بشرتنا تفتح وحده وحدة لانه طبقة الجلد السمرة بتبقى اتشالت خلاص.4.ودى نقطة مهمة اوى, لازم لازم لازم بعد التقشير ترطيب عشان جلدنا ميلتهبش لانه الترطيب بيعطى طراوة للجسم (وده لسه هنتكلم عنه فى خطوة الترطيب), ولازم التقشير يتعمل والجلد مندى (يعنى يكون مبلول ميه, وممنوع منعا بتا تقشرى جسمك او وشك وهوا ناشف مش مبلول)

طب بعد الرغى الكتير ده يا عطر الجمال اذا نقشر جسمنا براحة من دون ما يسبب التهاب؟ انا اقولك يا فتوكة………. كل فتوكة ليها طريقة بتحب تعمل بيها يعنى فى ناس بتستخدم منتجات معبئة وفى ناس بتستخدم حاجات طبيعية, يعنى:لو انتى بتحبى تستخدمى الطرق الطبيعية احسن وسيلة تقشير بتبقا هيا الملح, وانتى داخلة تاخدى دش خدى فى ايدك شوية ملح كدة وبعد ما تبلى جسمك تدعكى جسمك بيه لمدة 3 دقائق مش اكتر عشان جلدك ميلتهبش وبعدين تشطفى جسمك بميه عادى. يا اما بنعمل بالمنتجات اللى فى الاسواق اللى مالية الدنيا زى “نيفياNivea ” و”اولاىOlay ” و “كلين اند كليرClean&Clear ” انا عن نفسى بحب اوى “كامينا شاور سكربCamina Shower Scrub ” بحسه فعال اوى, وكل منتج ليه طريقة استخدام مكتوبه عليه.

ثالثا: التنظيف (واكيد مش محتاجه اشرح ايه التنظيف ده!!!!!) انما هشرح طرق التنظيف السليمة. انا عن نفسى شايفة التنظيف لازم يبقى بعد مش قبل التقشير لان خلاص الجلد الميت بيكون كلو نزل ومش محتاجة غير انك تنظفى جلدك بعمق, لانك هتشيلى كل الاوساخ المتراكمة والمتبقيه دى وهتحسى بانتعاش فى جلدك, انما طرق التنظيف هيا اللى بتختلف من فتوكة للتانية.

فى فتوكات بيستعملو صابون عادى و دول اللى دائما بيلجئو للوسائل الطبيعية زى التقشير بالملح, لكن فى فتوكات بيحبو المنتجات الاكثر فاعلية وبيستعملو الشاور جيل مثلا, فى انواع كتير بردو من الشاور جيل احسن نوع “دوف “Dove بجد هتحسى معاه بالفرق. وفى التنظيف الناعم بالليفة الناعمة والتنظيف الخشن بالليفة الخشنة, يعنى انا بستحمى كل اسبوع بالليفة الخشنة عشان التنظيف العميق الفعال.

وكل يوم الصبح باخد شاور بالليفة الناعمة اللى بس بتساعد الصابون او الشاور جيل على انه يترغى (يعنى كل اسبوع نحط صابون او شاور جيل على الليفة الخشنة وندعك جامد, والشاور بقيت الاسبوع بالليفة الناعمة وننزل الصابون او الشاور جيل على بقيت جسمنا, وعموما دى حاجة بترجع لكل فتوكة.) وخطوة التنظيف دى بتاخد مننا من5 ل7 دقائق سواء بالليفة الناعمة او الخشنة.

رابعا بقى يا ستى واخر حاجة: الترطيب وده عشان جسمنا يتلطف وينعم ويبقى كده زى جسم النونو الصغنون ولو احنا عملنا تقشير لازم الترطيب عشان جسمنا ميلتهبش وتلاقيه كده اتلطف مكان ماعملنا التقشير لكن لو احنا نظفنا جسمنا على طول من غير تقشير فاممكن نرطب جسمنا وممكن منرطبوش براحتنا. عموما ده بقى يا ستى بنستعمله “بودى لوشنBody Lotion ” اى نوع فى بقى انواع كتييييييييييييييييييييييييييير فى السوق اى ماركة تجميل ليها نوع لوشن.

لو انتى متعودة ان انتى دائما بتاخدى الشاور بتاعك الصبح يبقى تحطى بودى لوشن بيحتوى على “عامل حماية من الشمسSPF ” عشان يحميكى من الشمس لو انتى خارجة وبردو فى انواع كتير زى “نيفياNivea ” و”لوناLuna ” و”ايفاEva ” وانا شخصيا بستعمل “دوف “Dove.

اما لو انتى متعوده انك تاخدى الشاور بتاعك باليل فاتستخدمى لوشن عادى. لكن بالنسبة للطريقة الطبيعية فا فى ناس بيقولو دعك الجسم بزيت زيتون, لكن عشان اكون امينة معاكو عمرى ما جربته خالص. بناخد حبة من اللوشن او الزيت على ايدينا وندعك جسمنا كويس وعملية الترطيب دى بتبقا اكيد والجسم ناشف مش مبلول يعنى بعد التنظيف ننشف جسمنا كويس بفوطة نظيفة وبعدين نحط اللوشن. والوقت المستغرق حوالى دقيقتين بس عشان دعك اللوشن على كامل الجسم.

اختصار الموضوع الخطوات سريعا:

الطرق الطبيعية(بعد ازالة الشعر):
1.التقشير عن طريق الملح لمدة 3 دقائق.
2.التنظيف عن طريق الصابون العادى لمدة 7 دقائق.
3.الترطيب عن طريق وصفة طبيعية لمدة دقيقتين. (ممكن تسالو هنا فى المنتدى عن وصفة طبيعية لو مش واصقين فى حكاية زيت الزيتون دى)

او

استخدام منتجات فى الاسواق(بعد ازالة الشعر):
1.التقشير عن طريق المقشر المفضل لينا لمدة 3 دقائق.
2.التنظيف عن طريق شاور جيل احنا بنحبه لمدة 7 دقائق.
3.الترطيب عن طريق لوشن مفضل لدينا لمدة دقيقتين.

وبكده الموضوع كلو خد مننا 12 دقيقة او 15 دقيقة كحد اقصى, ومش 15 دقيقة زياده, لا دول 15 دقيقة استحمام وفى نفش الوقت عناية بالجسم.

وكده خلاص يا فتوكات الموضوع خلص خلاص وانتظرونى فى موضوعى القادم وهو العناية بالوجه, ولازم التقييم عشان محسش ان مجهودى راح هدر بعد ما اعدت اكتب لحد ما ايدى وجعتنى.