(( ليلة عريس ))
استريحي كنك المفروض في ليلة عريس
واستغلي مدة الديان في وقت الفلس
لاتعيدين الخطايا لاتحمين الوطيس
وانت ادرى في طلوعك قبل دقات الجرس
ماابيك بدور ليلى لو عشقتك عشق قيس
بس خليني اشوفك لين مااخذ نفس
افرجي عني بعطفك لا تخليني حبيس
واحبسيني وسط قلبك واسطري عندي حرس
مابذلت اغلى اجتهادي .. كل جهدي بالنفيس
وماغرست الشوق فيني انت اول من غرس
ماعشقتك من غرور وعارف درب الحويس
الرجل لا رز خشمه غمض العين وعطس
ماعشقتك عشق فارس يهتوي مهرة عويس
عاشقك خيل اصيل يموت في ذيك الفرس
خلي العذال تدرع من قهرها بالحميس
واتركيهم خلف ظهرك واستهلي بالدبس
وان حسبتي لي حساب وعدت للمنصب رئيس
باخبرك باني عشقتك بس من زود الونس
قاهرتني في جراءة عين وطلوع الخميس
لين سويت التحدي بين عشقك .. والطفس
واحمد الله من كسبتك ماكسبت الا لميس
بنت لاسلطن دلعها خلت الشاعر خرس
لويعرف ابليس بانه لاطرى نلعن ابليس
كان لاشفته بدربي دق لطمه وانتكس
وانت ادرى في علومي والغلا لك يا.. لميس
وفوق هذا لا لمحتك دق قلبك وانكبس
علمونا نخاف فطره من نياشين البوليس
بس وشلون نتعلم ناكل التمر بعبس ..!!؟
…
..
.
(( تقول بابا عمرها فوق عشرين )) (:
في البداية ..
تقول : بابا .. عمرها فوق عشرين
وانا: ” يبه” من يوم ربي خلقني
تخجل عذوق الذوق في منبت التين
وتسكن بروح اللي حلاها سرقني
تركب بساط مغيرين القوانين
لوني بعيد رضاه للبعد يدني
تمشي وتضحك .. في عيون المساكين
الا انا يوم ان حظي رفعني !!
ما كنها الا ” شيك ” صدق من الصين
او كن ابوها ” بيك ” والبيك يغني
والنتيجة ..
طحت بهواها دون كل المزايين
وطاحت على عيني ملازيم جفني!!
وفي النهاية ..
شفت الغرابه في رموز العناوين
وشفت الوداع اللي كسرني .. واسرني
يوم غرست في هامة الارض سكين
والطائرة قالت : تعالي بمتني
…
..
.
(( الحواجز ))
رحمتك يالله ترحم ضعفنا
يوم غم الجو واخفيت الجدي
يوم همي فوق متني متنا
والسلام عصوف ريح ترعدي
والضروف اكبر من اللي ودنا
والفراق الحل .. والحل الردي
لاحياة .. ولاممات .. ولاهنا
في حنايا الضيم القى مقعدي
ان سهرت الليل مس ومسكنا
وان غفيت افلام رعب تحشدي
صاير مابين مظلوم .. وانا
اختلفت وودي اعرف مولدي؟
والكرم للياس كاس مدنا
نشربه لوهو علينا يجهدي
وش نسوي دام هذا حظنا
والحواجز ماتعدى بالعدي
مير صبرك يالحبيبه بالعنا
اصبري ياروح روحي وبعدي
لايهمك دن دنات ودندنا
وبلبة حساد .. واغضي وارقدي
دام انا وانتي تلاقى جدنا
نلتقي لوهب ريح جلمدي
…
..
.
(( الفخ ))
مابيك يابنت الحلال اتركيني
دربك وعر..ورمال..مكحول في فخ
انا فقير وراس مالي حنيني
وانتي متونك باللذيذات تنزخ
تبين لندن ماتحبين كيني
وسواق خاص ولبس فاخر من الجخ
واليا اهتويتي قلتي يالله تجيني
اسرع ترى شوقي على النار يطبخ
ياهيه اصحي..واعقلي..واعرفيني
اموت عز ولاتذلل والبخ
يلعن ابوك وجد جدك مهيني
وانا عزيز وكل ربعي مطنخ
من لابة يسوون عندي سنيني
لضيوفهم حيل جزالي تنوخ
والحب ماهو لك لوتزعليني
وحزوم نجد لراس مثلك تكمخ
الحب يبقى في حشايا دفيني
اللي على وكره الاجيت يكفخ
ابو عيون كنها جمرتيني
واركو عليها كل الاوقات بالنفخ
اشتاقله لوهو موكر يميني
واصبر عليه شهور مرسوم بالمخ
ومع السلامه لاتقولين ويني
روحي عساك بوسط نار تبوخ
عساه لامنه حيى الشوق فيني
وسالت قالوا ماتت العام يا اخ
- اشعار حب لي ياسر التويجري
- اشعار ياسر التويجري عن الشوق
- ياسر عبد لوهب
