انسولين ميكستارد

التحويل من Mixtard 100iu/ml الى Mixtard 40iu/ml والعكس

خلاص فهمنا يعني ايه ميكستارد؟!!

وعرفنا ان الميكستارد بيحتوي 100 وحدة انسولين في كل 1 مل

30 منهم انسولين مائي و70 منهم انسولين معلق

النوعية اللي اتكلمنا عليها دي من الميكستارد هي الاشهر وهية اللي موجودة في معظم دول العالم

وسعره عندنا 31 جنيه مصري فقط لا غير

لكن عندنا في مصر (وليس لدي معلومات ان وجدت في دول اخرى) نوع اخر من الميكستارد

اسمه ميكستارد 40iu/ml

وده سعره 6.30 قرش

وله مثائل انتاج مصري بسعر 6 جنيه

منها انسولين سيديكو 40 وحدة

انسولين فاكسيرا 40 وحدة

Hunil mix 40 وحدة

طيب الفرق ايه بين نوعي الميكستارد الغالي والرخيص؟

الفرق ان الملي الواحد في الرخيص بيحتوي على 40 وحدة فقط من خليط الانسولين بدلا من 100 وحدة

ولكن تركيز الانسولين المائي والمعلق في ال40 وحدة لا زال 30/70

يا ريت تكون الفكرة وصلت..!!

لو وصلت نقدر نقول

ان لو كان المريض في حاجة لواحد مل من ميكستارد 100

اذن فهو في حاجة لاتنين ونصف سم من ميكستارد 40

لان قوة الميكستارد 100 مساوية مرتين ونصف لقوة ميكستارد 40

ولو كان في حاجة ل 0.4 من ميكستارد 100 اذن هو في حاجة ل1 مل من ميكستارد 40

دي طريقة تحويل حسابية

هل هناك طريقة اخرى؟

نعم

في الصيدلية عندنا نوعين مهمين من سرنجات الانسولين

احدهما تسع 1 مل مقسمة الى 100 جزء

وهذه هي الواجب استخدامها في اي نوع انسولين تركيز 100 وحدة/مل

والاخرى تسع 1 مل مقسمة الى 40 جزء

وهذه هي الواجب استخدامها في الانسولين تركيز 40 وحدة /مل

يمكننا التحويل بين نوعيي الانسولين حينما نقوم ايضا بتحويل نوعية السرنجة

حينها سنلاحظ بسهولة ان :

40 جزء من الانسولين تركيز 100/مل على السرنجة المقسمة ل100 جزء

=

40 جزء (1مل) من الانسولين تركيز 40/مل على السرنجة المقسمة ل40 جزء

و

30 جزء من الانسولين تركيز 100/مل على السرنجة المقسمة ل100 جزء

=

30 جزء من الانسولين تركيز 40/مل على السرنجة المقسمة ل40 جزء

وهكذا

اذا كان فهم هذا الامر عسير

يمكن التطبيق العملي

باحضار نوعيي الانسولين

ونوعيي السرنجتين

والحساب والتطبيق المباشر لتصل المعلومة بسهولة