انواع الشوربة_ السلطات اللذيذة

1- تبرد البطاطس بالماء بعد ما تتسلق، وبعد كده نقطعها لشرائح صغيرة، ونضيف عليها الزبادي والخل والملح، وبعد كده نشيل السلطة في الثلاجة، وعند التقديم ممكن نزينها بالبقدونس المفروم.. وبالهنا والشفا.

شوربة بالشوفان

المقادير:

• كيس شوربة جاهزة “موجودة في السوبر ماركت”
• 3 ملاعق لبن بودرة
• 3 ملاعق شوفان
• 2 كوب ماء ساخن
• 1/4 كوب كريمة طبخ

الطريقة:
1- نضرب كل المكونات في الخلاط، لغاية ما نحصل على خليط متجانس، وبعد كده نصب كل المكونات في اناء ونحطه على النار، مع التقليب من وقت للتاني، ونسيبها على النار لمدة 10 دقايق او لغاية ما الشوربة تغلي.

2- بعد كده ممكن نضيف بعض قطع الفراخ المقطعة والمسلوقة، ونصبها في اطباق الشوربة، وممكن نقدم معاها بعض قطع الفراخ

سلطة الحمص
المقادير:

• كوب حمص مسلوق
• 1/2 كوب طحينة
• عصير ليمونة
• كمون
• ملح
• ماء

الطريقة:
نفرم كل المكونات دي في الخلاط لغاية ما تبقى ناعمة تماما، ومفيش فيها اي قطع صحيحة، وبعد كده نشيل طبق السلطة في الثلاجة علشان يبرد وبعد كده نقدمه، وممكن نزين الطبق عند التقديم بكمية من الحمص المسلوق وزيت الزيتون.

شوربة كريمة البروكلي
المقادير:

• 1/4 كيلو بروكلي
• ثمرة بطاطس مقشرة
• 2 كوب كريمة لباني او قشطة
• 6 اكواب شوربة فراخ
• بصلة متوسطة مفرومة
• 1/4 كيلو كرفس مفروم
• ملح وفلفل وكمون

الطريقة:
1- نجيب البروكلي ونقطعه لقطع صغيرة، ونقطع البطاطس لمكعبات صغيرة ونضيفهم على الشوربة، ونضيف معاهم البصل المفروم والملح والفلفل ورشة الكمون، ونسيبهم على النار لغاية ما يغلوا، وبعد كده نقلل النار على الشوربة ونسيبهم لغاية ما يستووا.

2- بعد ما نتاكد ان البروكلي استوى، نضرب الشوربة في الخلاط لغاية ما كل مكوناتها تتجانس، ونضيف معاها كمية من الكريمة اللباني، وبعد كده نرجع الشوربة على النار ونضيف عليها باقي كمية الكريمة اللباني والكمون.

3- بعد كده نصب الشوربة في اطباق التقديم، ونزينها بقطع البروكلي الاخضر.. وبالهنا والشفا

سلطة التونة بالكرفس والفجل
المقادير:

• 3 اكواب تونة مصفاة من الزيت
• 8 ثمرات فجل صغيرة مقطعة لشرائح
• 2 عود كرافس مقطعين لقطع صغيرة
• 1/4 كوب بقدونس مفروم
• 2 معلقة كبيرة عصير ليمون
• معلقة كبيرة زيت زيتون
• ملح وفلفل

الطريقة:
1- هاتي طبق غويط، واخلطي فيه التونة والفجل والبقدونس والكرافس وعصير الليمون وزيت الزيتون والملح والفلفل، وقلبيهم مع بعض كويس.

2- حطي طبق السلطة في الثلاجة، وطلعيه عند التقديم وممكن تقدمي معاها عيش محمص.. وبالهنا والشفا.

شوربة السمك والجندوفلي
المقادير:

• 1/2 كيلو سمك فيليه مطقع لمكعبات
• 1/4 كيلو جندوفلي
• معلقة كبيرة زيت زيتون
• 2 عود كرات مقطع لشرائح صغيرة
• فصين ثوم مفرومين
• كوب بقدونس مفروم
• راس بصلة خضراء صغيرة مقطعة لشرائح
• عصير نصف كيلو طماطم
• 3 معالق كبيرة صلصة طماطم
• 1/4 معلقة فلفل احمر مطحون
• 1/2 كوب زيتون للتقديم
• زنجبيل
• ملح

الطريقة:
1- شوحي الكرات والثوم والبصل الاخضر في الزيت على نار متوسطة مع التقليب لمدة 3 او 4 دقايق لغاية ما تحسي انهم استووا.

2- بعد كده ضيفي الطماطم وصلصلة الطماطم والفلفل الاحمر والملح والزنجبيل، وسيبيهم على النار لغاية ما يغلوا، وبعد كده وطي النار، وسيبيهم على نار هادية لمدة 15 دقيقة.

3- بعد كده بتضيفي السمك والجندوفلي، وقلبيهم بالراحة لغاية ما تحسي ان السمك استوى والجندوفلي فتح معاكي، بعد كده ضيفي البقدونس وقلبي الشوربة كويس على النار، وبعد
كده قدميها مع الزيتون.. وبالهنا والشفا.

شوربة الخضار والفراخ والمشروم
المقادير:

• 1/4 كيلو صدور فراخ مسلوقة مقطعة قطع كبيرة
• 3 بصلات مقطعة قطع صغيرة جدا
• كوب لبن
• 3 اكواب شوربة فراخ
• كوب دقيق
• 1/4 كيلو مشروم مقطع شرائح
• 3 ملاعق كبيرة زبدة
• عصير ليمونة
• 1/2 حزمة بقدونس مقطعة قطعا صغيرة
• ملح وفلفل
• 3 اكواب خضار مشكل ومقطع مكعبات صغيرة

الطريقة:
1- سيحي الزبدة على النار، وبعد كده ضيفي اليها البصل مع استمرار التقليب لغاية ما لون البصل يبقى ذهبي.

2- لما تلاقي ان لون البصلة بقى ذهبي ضيفي اليها الدقيق مع استمرار التقليب لمدة خمس دقائق او لغاية ما الدقيق يحمر.

3- بعد مرور الخمس دقائق ضيفي اليه اللبن تدريجيا مع التقليب المستمر علشان الدقيق ما يكلكعش.

4- بعد كده ضيفي شوربة الفراخ مع استمرار التقليب لغاية ما تلاقي ان العجينة بقت متجانسة وسمكية ومش مكلكعة، ضيفي اليها الخضار والمشروم.

5- سيبي الخليط على النار لمدة ربع ساعة، وبعد كده ضيفي اليه عصير الليمون والبهارات والملح، وسيبيه على النار لمدة ربع ساعة كمان، او لغاية ما تلاقي الخضار والمشروم استوى، اطفي البوتاجاز وحطي الشوربة في اطباق التقديم، وزيني الاطباق بالبقدونس.

سلطة عيش الغراب
المقادير:

• علبة عيش الغراب
• فص ثوم مفروم
• 2 ملعقة كبيرة عصير ليمون
• ملعقة صغيرة زعتر مجفف ومطحون
• 1/2 ملعقة كبيرة زبدة
• ملعقة كبيرة زيت زيتون
• 2 ملعقة كبيرة بقدونس مفروم ناعم
• ملح

الطريقة:
1- اغسلي عيش الغراب كويس، وبعد كده قطعيه الى قطع صغيرة.

2- ذوبي الزبدة في طاسة على نار هادية، وبعد كده ضيفي اليها عيش الغراب وقلبيه لمدة دقيقة، وبعد كده ضيفي الثوم وقلبيهم مع بعض لمده 5 دقائق او لغاية ما تلاقي ان عيش الغراب استوى.

3- حطي عيش الغراب في طبق التقديم، وضيفي اليه الملح وعصير الليمون، وزيت الزيتون والبقدونس والزعتر المطحون، وقلبيهم مع بعض.

سلطة بقدونس
المقادير:

• 2 حزمة بقدونس
• عصير ليمونة
• 3 فصوص ثوم مفرومين
• ملعقة كبيرة طحينة
• ملح وفلفل
• شرائح ليمون
• اوارق بقدونس
• ثمرة طماطم مقطعة شرائح

الطريقة:
1- هاتي البقدونس، واغسليه، وقطعيه قطعا صغيرة جدا.

2- اخلطي الثوم مع الملح والفلفل، وضيفيهم للطحينة وقلبيهم مع بعض كويس، وضيفيهم للبقدونس، وقلبيهم مع بعض، وحطيهم في طبق السلطة.

شوربة الماكولات البحرية بالليمون
المقادير:

• 1/4 كيلو سمك فيليه مقطعا قطعا صغيرة
• 1/4 كيلو جمبري
• 1/4 كيلو سبيط “اختياري”
• كرات
• كرفس
• بصل
• ثوم
• عصير ليمون
• ملح وفلفل اسود
• قرنفل
• حبهان

الطريقة:
1- نظفي السمك والجمبري والسبيط واغسليهم كويس، وبعد كده اسلقيهم في حلة عميقة مع الكرات والكرفس والبصل المقطع والحبهان والقرنفل.

2- خدي بالك وانت بتسلقي السمك انك تشيلي الريم اول باول، بعد كده ضيفي الملح والفلفل الاسود والثوم المفروم والبقدونس، وخليه يغلي على نار هادئة لمدة نصف ساعة.

3- بعد كده صبي الشوربة في اطباق الشوربة، وللتجميل ممكن انك تضيفي البقدونس المفروم وترشي عليها عصير ليمون.

شوربة الجبنة الشيدر
المقادير:

• 1/2 كيلو جبنة شيدر مبشورة
• 3 ملاعق كبيرة زبدة
• 3 ملاعق كبيرة دقيق
• ملح وفلفل وبهارات
• 3 اكواب لبن
• ثمرة بصل مقطعة قطع صغيرة جدا
• 3 اكواب شوربة فراخ او لحمة

الطريقة:
1- ذوبي الزبدة في اناء على النار، وضيفي اليها البصل وقلبيه كويس لمدة 5 دقائق او لغاية ما تلاقي ان البصل لونه بقى ذهبي.

2- لما تلاقي ان البصل لونه بقى ذهبي ضيفي اليه الدقيق مع التقليب المستمر لغاية ما الدقيق لونه يبقى ذهبي، بعد كده ضيفي الشوربة واللبن بالتدريج مع استمرار التقليب علشان الدقيق ما يكلكعش منك، وسيبيهم على النار لمدة 5 دقائق او لغاية ما يغلوا.

3- اطفي البوتاجاز وسيبي الخليط علشان يبرد، بعد كده اضربيه في الخلاط كويس، بعد كده حطيه في حلة ورجعيه على النار مرة اخرى وضيفي اليه الجبنة مع استمرار التقليب لمدة 5 دقائق علشان الجبنة تذوب مع اضافة الملح والفلفل والبهارات.

السلطة البلدي
المقادير:

• بصلة مقطعة قطعا صغيرة
• ثمرة فلفل اخضر حار مقطع قطعا صغيرة
• فص ثوم مفروم
• ملعقة صغيرة خل
• 2 ملعقة صغيرة عصير ليمون
• حزمة بقدونس مقطعة قطعا صغيرة
• 2 ثمرة طماطم مقطعة مكعبات صغيرة
• 2 ملعقة كبيرة زيت ذرة
• حزمة جرجير مقطعة قطع صغيرة
• 2 ثمرة خيار مقطع مكعبات صغيرة
• ملح وفلفل
• خس مقطع قطع صغيرة

الطريقة:
دي ما فيش ابسط منها كل اللي هتعمليه انك هتخلطي كل المقادير مع بعضها، وتحطيهم في طبق السلطة.

شوربة اللحمة بالبروكلي والفاصوليا الخضراء
المقادير:

• 1/4 كيلو لحمة مقطعة قطعا صغيرة
• بصلة متوسطة مقطعة قطعا صغيرة
• 1/2 كوب كرفس مقطع قطعا صغيرة
• 1/2 كوب بروكلي مقطع قطعا صغيرة
• 1/2 كوب فاصوليا خضراء
• 1/2 جزرة مقطعة قطعا صغيرة
• ملعقة كزبرة خضراء
• ملعقة ملح
• رشة بهارات
• ملعقة زبد
• كوب مية

الطريقة:
1- سخني الزيدة وشوحي فيها اللحمة لغاية ما تحمر وبعد كده ضيفي اليها الملح والبهارات والبصل وقلبيهم مع بعض، وبعد كده ضيفي اليهم الخضار والجزر والفاصوليا والبروكلي والكرفس وقلبيهم مع بعض لمدة خمس دقائق.

2- بعد مرور الخمس دقائق ضيفي اليهم المية، وسيبيهم على النار لمدة نصف ساعة او لغاية ما تلاقي ان الخضار واللحمة استوت بعد كده حطي الشوربة في اطباق الشوربة وضيفي اليها الكزبرة الخضراء.

السلطة اليونانية
المقادير:

• 4 ثمرات طماطم
• 2 ثمرة خيار
• ثمرة فلفل اخضر
• بصلة متوسطة
• 1/2 علبة جبنة ثلاجة
• 1/2 ربطة خس
• 2/1 كوب زيتون اسود منزوع البذر
• 2 ملعقة كبيرة زيت زيتون
• عصير ليمونة
• ملح وفلفل

الطريقة:
1- قطعي الطماطم الى قطع طولية وقطعي الخيار والبصل والخس الى شرائح وقطعي الفلفل الاخضر الى مربعات وقطعي الجبنة الى مكعبات صغيرة.

2- حطي الخيار والطماطم والبصل والفلفل الاخضر في طبق السلطة وضيفي اليهم الملح والفلفل وعصير الليمون ومعلقة زيت الزيتون وقلبيهم مع بعض.

3- بعد كده ضيفي اليهم الجبنة والزيتون الاسود ومن فوقهم ملعقة زيت زيتون.

سلطة الجزر والفجل
المقادير:

• 1/2 حزمة بقدونس مقطع قطعا صغيرة
• 1 كوب جبنة بيضاء مقطعة مكعبات
• 4 فجلات كبيرة
• 3 جزرات متوسطة
• عصير ليمونة
• ملعقة صغيرة ملح
• 1/2 كوب زيتون اسود
• فصين ثوم مفرومين
• 1/4 كوب زيت زيتون

الطريقة:
1- اغسلي الجزر والفجل كويس، وبعد كده ابشريهم.

2- دقي الثوم مع الملح، وضيفي اليهم عصير الليمون والزيت، وقلبيهم مع بعض كويس، وبعد كده ضيفيهم الى الجزر والفجل، وقلبيهم مع بعض كويس، وبعد كده ضيفي اليهم الجبنة والبقدونس والزيتون الاسود.

شوربة البنجر
المقادير:

• 5 ثمرات بنجر
• 5 ثمرات بطاطس مقطعة مكعبات
• 2 ثمرة جزر مقطعة مكعبات
• مكعب مرقة دجاج
• 3 فصوص حبهان
• 1/2 كوب كريمة لباني
• ورق لاورا
• ملح وفلفل

الطريقة:
1- اسلقي البنجر كويس اوي لمدة ساعتين في اناء عميق، بعد كده اطفي البوتاجاز وسيبي البنجر لغاية ما يبرد وقشريه وقطعيه مكعبات صغيرة.

2- اسلقي الجزر مع البطاطس، وضيفي اليهم اثناء السلق مكعب مرقة دجاج وورق اللاورا والحبهان والملح والفلفل.

3- لما تلاقي ان الجزر والبطاطس بدات تستوي ضيفي اليهم البنجر والكريمة اللباني وسيبيهم مع بعض على النار لمدة 5 دقائق مع التقليب المستمر، بعد كده اضربي الشوربة في الخلاط لغاية ما كل المكونات تتجانس، وبعد كده رجعيها مرة تانية على النار وسيبيها لمدة خمس دقايق، وبعد كده حطي الشوربة في اطباق الشوربة.

سلطة الجرجير والبصل
المقادير:

• 2 حزمة جرجير
• عصير ليمونة
• 3 ملاعق كبيرة خل
• 2 ملعقة كبيرة زيت زيتون
• ثمرة بصل مقطعة قطعا صغيرة
• ملح وفلفل
• 2 ثمرة جرز مبشورة

الطريقة:
1- اغسلي الجرجير كويس، وقطعيه الى شرائح رفيعة.

2- اخلطي كل المكونات مع بعضها البعض وقلبيهم كويس وحطيهم في طبق السلطة.