رواية حب وكبرياء

ظلت ياسمين تحدق في طلب التوظيف في تلك الجريدة لتوظيف سكرتيرة . حيث انها تفكر منذ مدة في ان تعمل ويكون لها دخل ثابت
فهي محرجه وهي تعيش عند خالتها منذ وفاة امها وهي مازالت صغيره في الصف الثالث الاعدادي وجلوسها عند خالتها كان انسب مكان لها
حيث ان خالتها لها من البنات ثلاث فقط وزوج خالتها منفصل عنها من مدة طويلة وايضا وتعيش خالتها في شقة والدها جد ياسمين
وورثت ياسمين من امها الجزء الخاص بها الذي تمتلكه من هذه الشقة
و من الاسباب المحببة للحياة عند خالتها وجود بنت خالتها رشا وهي ايضا صديقتها الوحيدة المقربة الى قلبها وفي نفس سنها والاثنان تخرجوا من الجامعة من كلية التجارة

كانت ياسمين سرحانة في هذا الطلب تفكر هل سيقبلونها ام طلب التوظيف هذا مثل غيره محجوز بالواسطة
تمتمت بصوت خافت :هروح واللي فيه الخير يقدمه ربنا
دخلت عليها رشا :ايه يابنتي مالك بتبحلقي في الجرنان كده ليه
ياسمين : طلب توظيف يارشا عايزين سكرتيره
رشا : طيب كويس روحي وقدمي فيه وان شاء الله هيقبلوكي على طول ده انتي تقديرك العام جيد جدا وخداهم اربع سنين صاروخ
ياسمين تضحك : طيب مانتي كمان وخداهم في اربع سنين
رشا : اه بس تقديري العام مقبول مش زيك يادحاحه
ياسمين : خلاص تعالي قدمي معايا
رشا: لا ياستي انا عايزة ارتاح شويه من المذاكره والهم ده مش اخلص من المذاكرة اتدبس في شغل وصحيان بدري ومدير يهزقني
ياسمين : بصراحه انا نفسي اشتغل عشان اخف الحمل عن خالتي شويه كفايه انها بتصرف عليا من ساعة ما ماما اتوفت وكمان ماكنش عندي ورث خالص اصرف بيه على نفسي انتي عارفه ماما صرفت كل الورث بتاع بابا على مرضها ربنا يرحمها ويرحمه
رشا : عيب عليكي يا ياسمين ازاي تفكري كده انا بشجعك على الشغل عشان تنسي اي حاجه بتضايقك وترجعي ياسمين بتاعت زمان اللي كانت بتضحك طول الوقت مش عشان الكلام الفارغ اللي بتقوليه

وهنا دخلت ريم اخت رشا تقول بصوت عالي : يلااااااااااااا ماما جهزت الاكل يلا عشان الغدا
رشا : يابنتي صوتك عالي كده ليه خلاص جايين جايين
ياسمين بضحك : هي ريم لازم يكون صوتها كده عشان لما تشتغل محاميه صوتها يخوف القاضي ويديها حكم البراءة على طول
ريم بفخر: امال ايه , ده انا هثبت القاضي , هخليه يقولي من غير مرافعة يا استاذه خدي حكم البراءة اهو .
رشا : واثقة من نفسك اوي وانتي لسه في اولى حقوق امال لما تتخرجي هتعملي ايه
ريم وهي بتطلع لسانها لاختها : ساعتها هحبسك
رشا :بقى كده طب تعالي بقى ….
وقعدوا يجروا ورا بعض في الشقه
الام ( سميه ) : يابنات تعالوا يلا الاكل هيبرد
والتف الكل حول الطعام وهنا سالتهم الام : امال فين ريهام
رشا : تلاقيها قاعدة بتدح جوه
سميه : قومي اندهي اختك خليها تيجي تاكل وترتاح من المذاكره دي
رشا : حاضر
رشا تدخل على ريهام الاوضه :يلا يابنتي ماما بتندهلك عشان الغدا
ريهام وهي تكتب في الكراسة امامها : هخلص المسالة دي واجي
رشا : يابنتي بطلي دح شويه احنا لسه في اول السنه
ريهام : لازم مافوتش يوم عشان الحق اخلص المنهج مع الاستاذ
رشا : طيب انا ماليش دعوه ماما كده هتزعق
ريهام : حاضر حاضر جايه
رشا وريهام خرجوا من الغرفة وذهبوا لتناول الطعام مع باقي الاسرة
ريهام تكلم نفسها : اكيد في طريقة تانيه
سمية : طريقة ايه يابنتي انتي بتكلمي نفسك
رشا : اه ياماما هي اتجننت من ساعة مادخلت علم رياضه
ريهام : بس يارشا سيبيني اركز عايزة افاجا المستر اني عرفت احلها عشان هو عامل تحدي للبنات ان محدش هيعرف يحلها
سمية : ربنا يوفقك يابنتي وتنجحي يارب
الكل في نفس واحد : يااااااااارب
———————–
بعد الغذاء وقفت ياسمين تشرب الشاي في البلكونه وسرحت قليلا
دخلت عليها خالتها
سميه : ايه سمسم سرحانه في ايه
ياسمين : اعلان في الجرنان مطلوب سكرتيره وبفكر اروح اقدم ايه رايك ياخالتو
سميه : روحي يابنتي جربي صلي استخارة الاول وبعدين روحي وربنا يوفقك
ياسمين بامتنان : ربنا يخليكي ياخالتو فعلا الاستخارة هتخليني اروح وانا متطمنه
سمية : ربنا يقدملك اللي فيه الخير يابنتي
دخلت ياسمين حجرتها وهي تبحث عن اوراقها واهمها شهادة تخرجها من كلية التجارة
ودخلت عليها رشا : ها بتدوري على ايه
ياسمين : ابدا كنت بجهز الاوراق اللي ممكن يطلبوها في المقابلة
رشا : انتي هتروحي امتى
ياسمين : يوم الاربع ان شاء الله
رشا : والنهارده الحد … لسه قدامك وقت عايزين ننزل نجيب طقم حلو كده تروحي تحضري بيه المقابله
ياسمين : لا ياستي انا عندي هدوم كتير مش عايزة اتقل على خالتو اكتر من كده
رشا : يووووه يابنتي الحوار ده هي خالتك عمرها حسستك ان مصاريفك تقيله عليها
ياسمين: لا ابدا وهو ده اللي محسسني ان لازم يبقى عندي دم واقول كفايه كده هي وقفت جنبي لحد ما اتخرجت لازم بقى اعتمد على نفسي
رشا : طب بلاش شغل الافلام ده وجهزي نفسك بكره بدوووووون نقاش هننزل نجيب طقم جديد والا هقول لخالتك على حوار اعتمد على نفسي ده ايش حال مكنتيش قاعدة في ملكك في الجزء اللي ورثتيه عن مامتك الله يرحمها
ياسمين : طيب طيب انا عارفه مش هخلص من زنك
رشا : يعني انا غلطانه اني عايزاكي تبقى شيك كده وحلوه يوم المقابله
ياسمين : ياربي عالبكش قولي عاللي فيها وانك عايزة تنزيلي عشان تطلعيلك بطقمين انتي كمان
رشا : مممممممم يعني مايضرش … اه بس لو مكنتيش حلفتي

جاء اليوم التاني ونزلت ياسمين ورشا اشتروا لياسمين طقم تذهب به يوم المقابله

وجاء يوم الاربع : استيقظت ياسمين او بمعنى اصح نهضت من على السرير فقط فهي لم تنم جيدا فهي قلقة بشان المقابله
وخرجت من حجرتها التي تشاركها فيها رشا والحجره الاخرى تتشارك فيه ريم وريهام والام في حجره مستقله بها
خرجت ياسمين وجدت خالتها تتاهب لدخول المطبخ لاعداد الفطار
سميه : صباح الخير ياياسمين ماشفتكيش صاحيه بدري من اخر يوم في امتحاناتك السنه اللي فاتت
ياسمين تبتسم جاهده تحاول ان تبدو طبيعيه لعل هذا يذهب التوتر الذي يقلقها : صباح الورد ياخالتو من النهارده مفيش صحيان متاخر خلاص نوم بدري وصحيان بدري
سميه وهي تقرب منها : ايه يابنتي عنيكي عامله كده ليه انتي مانمتيش كويس
ياسمين : لا ياخالتو انا منتمتش خالص انا قلقانه اوي وخايفه
سميه : يابنتي هو انتي هتحاربي دي مقابله عاديه يعني لو متقبلتيش عاااااااادي بتحصل كتير
وانتي مستعجله عالشغل ليه اصلا مانتي قاعده في وسطينا واختك رشا اهي مانتخه جوه وبتنام لحد الضهر كبري دماغك وريحي اعصابك من التوتر ده
رشا : خارجه من الاوضه تدعك في عينها : مين جايب سيرتي عالصبح
ياسمين : يافتاح ياعليم يارزاق ياكريم ايه يابنتي مفيش صباح الخير
رشا : ايوه ايوه يافتاح ياعليم يارزاق ياكريم وشغل الناس اللي بتروح شغلها بدري والحركات دي اترسمي علينا بقى
ياسمين : يالهوووووووي انا مش هخلص من نقارك كل يوم ده انا داخله الحمام
سميه: ايه اللي صحاكي يارشا دلوقتي
رشا : ماهي ياسمين عماله تكركب في الاوضه من الصبح صحيت بقى هعمل ايه
سميه توجه كلامها لياسمين : اغسلي وشك كده وفوقي وانا هعمل احلى فطار وفنجان قهوه هيعدلك دماغك
رشا : وانا ماليش فطار
سميه : اجري نامي يابت
ودخلت سميه تحضر الفطار ودخلت ياسمين الحمام
رشا : وانا هقعد يعني لوحدي والله لادخل انام