رواية غريبة بين اهلي كاملة

(())

00مسائكم / صباحكم بخير اعزائي00

00كلمتي لكم00

00كثير منا يعيش في هذه الحياة مع صراع يدوم لفترات طويلة اوقصيرة
يؤثر به سلبا او ايجابا ويكون من اقرب الناس له00
0
0كن مواجها لهذا الصراع وقويا
واعلم بان الله معك ولاتياس00

00موظ00
00قرات هالقصه واعجبتني وحبيت انقلها لكم وموضوعها شدني00
“الجزء الاول”

كان الصوت الوحيد المسموع بالصالة..صفعة ابوها على وجهها وصوتهالجهوري اللي ملا اركان البيت:” غبية..”
كانت تحاول تثبت وتبين قوية..لكن عبرتهاسبقتها ونزلت على خدها غصبا عنها واللي صار احمر من قوة الصفعه..
ابوعبدالله:” الى متى افهم فيج يامتعلمة..انا قلت لج مليوووون مرة الغدى لازم يكون جاهز اذا رجعتمن بره.. لكن الكلام مايفيد معاج وماتجين الا بالطق..”
وكان حامل في يده عقالواخذ يضربها به.. وماتوقف الالما حس انه تعب وموعلشان انهاتتالم من طقه لها.
وبدموع الالم والحسرة:” صدقني كنت تعبانه..شغل البيت كله علي وواجباتالمدرسة تاخذ من وقتي.”
ابوعبدالله:” اسمعيني وخليني على بالج زين،مدرسة مناليوم ورايح مافيه، البيت اولى فيج وعن مصاريف الخدامه، فاهمه والا افهمجبطريقتي..”
شوق والدموع ماوقفت من عينها وهي بين رجلينه تتوسل له:” ارجوك يبهلاتحرمني من دراستي.. انا باخر سنة وحرام تضيعني بقرارك هذا.”
ابوعبدالله:” ايدراسة واي خرابيط اللي تتكلمين عنها، انتي مردج في البيت عندي،وثانيا وش نفعني مندراستج غير زيادة الغباء كل يوم.”
مسكت رجلينه وظلت تتوسله لكن بدون فايده:” ارجوووك لاتحرمني من المدرسة.”
لكن مانفعتها توسلاتها.. طالعها بعيون مليانه حقدوكره لها..ورفسها في بطنها ومشى عنها..
كانت حالتها ماتسر لاصديق ولاغريب.. تركها بالامها وجراحها..
ظلت قاعده بالارض وهي ضامه رجلينها بحضنها:” ياربساااعدني.” وبين ماهي سرحانه وتفكرفي مشكلتها..حست بيد على كتفها،من خوفها قامتوبصرخة مكتومة طالعت وراها..
هديل:” اسم الله عليج،هذي انا.”
ارتاحت لما عرفتانها اختها، قعدت وهي تتنهد:” حسبتج ابوي.”
هديل:” معذورة ومن حقج تخافين،سامحيني سمحت لنفسي اوقف واسمع اللي دار بينكم.”
شوق:” عاااادي، ومن بالبيتماسمع.”
هديل نزلت راسها حتى لاتشوف شوق الدموع اللي تجمعت بعيونها، وشوق كانتتصيح بقلبها ومقهورة منه، وقطعت هديل السكوت اللي صار بينهم..
هديل:” مدري وشاقولج”
شوق:” مايحتاج تقولين شي.”
هديل:” انا عارفه ان ابوي غلطان بس واللهمانقدر نسوي شي، انتي تعرفينه زين.”
شوق وبحسرة:” حراااااااام عليه يسوي فينيجذي، وش بيستفيد.”
كانت عبرتها اسبق لعينها، وماقدرت تكمل كلامها، وسرحت مرةثانيه لعالم العذاب اللي تعيش فيه، كان الالم والقهر اللي بقلبها يقتلها كل ساعهوكل لحظة.”
هديل:” شوق.. شوق..”
شوق اللي انتبهت بعد دقيقه:” هاااااا…”
هديل:” وش فيج سرحتي مرة ثانيه..صدقيني ربي راح يفرجها، ومالنا الاالدعاء والصبر..ولاتياسي من رحمة الله، وانت تعرفين حتى لوقلت للوالده ماراح نستفيدبشي لانها من زمان كانت تتمنى انج تقعدين بالبيت.”
شوق:” ضايعة ياهديل ضايعة،ودي اعرف انا وش سويت بحياتي حتى يصير فيني جذي! وش اللي يستفيدونه اذا زادوا منعذابي.. قولي لي وش يستفيدون؟”
هديل واللي ماتحملت تشوف اختها وهي تصيح:” مدريوالله مدري، بس اللي اعرفه ان انا احبج واخوي عبدالله، وصديقاتج بالمدرسة يحبونجلاتظنين بلحظة ان احنا ممكن نكرهج بيوم او نظلمج.”
المدرسة كانت لشوق الملجاالوحيد اللي تبتعد فيه عن العذاب اللي عايشته بالبيت،والحين وبقرار ابوها المتسرعحطم اخر منفذ لها وامل بالحياة بسعاده ولو بجزء بسيط.
وشوق بنت جميلة بكل معنىالكلمة،جمالها ياخذ العقل، ولها قلب يحمل من الطيبة مايكفي العالم،لها ابتسامة مرحةرغم العذاب اللي تعيشة في بيت ابوها،بعد ماتوفت امها وهي صغيرة اللي عمره ما اهتمفيها ودوم يضربها، ولها شعر اسود ناعم وسط وغزير،وطولها جدا حلوو ورغم كل المشاكلالا انها متفوقة بدراستها.
اما هديل، فهي اختها من الابو بس، الاانها تحبهاموووت، هديل اصغر من شوق بسنتين،ابوها تزوج امها بعد وفاتها بفترة جدا بسيطة،وهيالشخص الوحيد المتعاطف وياها، لها شعر قصير وناعم، ملامحها هادئة،، طولها متوسط ،ومتفوقة بدراستها.

وفي الصالة اللي تحت، كانت هدى اختهم الصغيرة تقول الىامها الكلام اللي سمعته يدور بين ابوها وشوق.
ام عبدالله:” زين سوى فيهاتستاهل، انا من زمان كان ودي انها تقعد بالبيت تشتغل عن الخدامه.”
هدى وبخبث:” هههههههههه وانا اقول جذي بعد.”
ام عبدالله:” انتي متاكده انج سمعتيه يقول لهامافي مدرسة؟”
هدى:” اي اكيييييد يمه، وانا من سمعته قال جذي نزلت لج على طووولابشرج.”
ام عبدالله:” ويازينها بشارة..”
هدى:” انا تربيتج واعجبج.”
امعبدالله وهي تحضنها:” هههه الله يخليج لي، انتي الوحيده اللي تريحني بالبيتوتفهمني.”

كانت هدى اصغر البنات عمرها14سنة بالاعدادية،الا انها مغرورةومتكبرة،ماتواطن شوق ابدا وتكرهها وتكره طيبة قلبها، هدى طالعه على امها حقودةوتكره الخير للناس، جمالها عااادي جدا وضعيفة شوي، اماام عبدالله فهي تحمل منالخبث والحقد في قلبها اللي يدمر بيوت. ولها سلطة على زوجها رغم وحشيته على بنتهالا انه يسمع كلامها، وعندهم عبدالله عمره 8سنين.

^^^^^^^^^^^^^^^^^

” سمر.. سمر..”
سمر ترد على اختها اللي كل شوي تناديها وبقهر:” افففف، نعم وشتبين؟”
خلود:” لاسلامتج، وش تسوين.؟”
سمر:” خلووودوو واللي يرحم والديجفكيني، دامج ماتبيني ليش تنادين.”
خلود واللي تحب تقهرها، وراحت تقعد علىسريراختها:”لا بس جذي..”
سمر:” اذا ماطلعتي من الغرفة الحين بوريجشغلج.”
خلود وبدلع:” اوووه خليني اقعد معاج شوي، ونتسلى بال ..”
طالعتهاسمر والشر يطلع من عينها:” الظاهر انتي تسمعي الكلام مقلوب..” وسحبتها من يدهاوطلعتها بره.. وخلود وقفت قبال الباب وهي تقول لها:” لاعيوني انا سمعي احسن منج،ممتاز بس احبج وامووووت فيج وش اسوي بعمري ما اقدر افارق عيونج الحلوووة.”
سمراللي كانت بتضحك من كلامها:” شكرا، وانا مابي هالحب اللي مايطلع الا لما ادخلغرفتي يالله وريني مقفاج، وبدون لقافه.”
وسكرت الباب بوجهها.. ورجعت تقراالروايةاللي كانت شاغلتها بذاك الوقت،اما خلود فنزلت تحت وهي تضحك على سمر اللي تحبتعاندها..وتتمازح معاها.

سمر بسنة اولى جامعه حلوووة وطيوبة، لون عيونهااخضر على امها، وهي الوحيدة اللي لون عيونها جذي،انيقة طولها حلوو وشعرها بني وناعم، وتحب التغيير في شكلها بس بحدود المعقول.تحب قراءة الروايات الرومانسية ، والليشاغلتها طول الوقت لكنها متفوقة بدراستها>> ماشاءالله عائلة متفوقة. اما خلودواللي جات بالوقت الضائع، فهي بصف اول اعدادي ، تشبه سمر لكن لسانها يجننبلد.

^^^^^^^^^^
لما نزلت خلود الصالة اللي تحت، شافت امها قاعده علىالكنب وسرحانه، وعلى اطراف اصابعها راحت من وراها وخرعتها.
خلود:” بووووووووووو..”
ام محمد:” حسبي الله عليج من بنت،”
خلود مب قادرة تمسك نفسهاعن الضحك.. وامها اطالعها وهي حاطة يدها على قلبها..
ام محمد:” وتضحكين بعد، كنتبروح فيها.”
خلود:” اسم الله عليج يمه،عدوينج ان شاءالله، وهذي بوسة لاحلىام.”
سكتت شوي ورجعت ضحك مرة ثانية:” ههههههههههههههههههههه يمه والله لو تشوفينشكلج كانج شايفة جني مب بني ادم.”
ام محمد واللي ضحك غصبا عنها من حركاتها:” وشتبيني اسوي اطير من الفرح، وقلبي شوي ويوقف.”
خلود:” افاااااا يمه انا اوقفقلبج، الحين بدمتج مارقص قلبج شوي.خخخخ”
ام محمد:” انا مدري وش اسوي فيج، زينقولي وش تبين تقولين انتي.؟”
خلود اطالع امها باستغراب:” هاااا..يمة انتي وشعرفج اني ابي اقول شي!”
ام محمد:” بنتي واعرفج..”
خلود:” مليت بروحي بالبيت ،وابي اروح بيت خالتي اقعد وياالعنود شوي، خبرج ست الحسن والدلال فوق قافلة البابماتقعد معاي،وش قلتي؟”
ام محمد:” ماعليه بس وين اخوج سيف، بخليهيوصلج.”
خلود:” مدري وينه فيه، بس السايق بره قولي له.”
ام محمد:” زين ماعليهالحين اروح اقول له.”

ام محمد شخصية حلووة طيبة وعلى نياتها، وعندها اختهاام فيصل واخو واحد صار له مسافر خمس سنين ومحد يعرف وينه، وهم من عائلة غنية ولهمسمعه طيبة.

^^^^^^^^^^^^^^
“يمة..يمة وينج.”
شيخة:” نعميمه..”
بدور:” شوق باجر بتزورنا بالبيت.”
شيخة:” حياها الله بايوقت.”
بدور:” تسلمين يمه الله يخليج،، تصدقين عاد، مدري شلون احبها هالبنت، دخلتقلبي من اول نظرة.”
شيخة:” هههههههههه صدقتي بهذي من اول نظرة.”
بدور وهيتمزح وياها:” اي مثل بعض الناس، اقصد سويلم وشيخوو،حبوا بعض من اول نظرة وانا طبقتالقاعده بحذافيرها خخخ.”
شيخة وهي ماسكة شعرها بلين:” انا شيخووو وابوج سويلمياللي ماتستحين.”
بدور وهي تضحك:” هههههههههههههههههه والله امزح يمه..”
شيخةتركتها بعد ما حبتها على راسها تعتذر منها وتضحك…
شيخة:” شوق قالت الى زوجةابوها..؟”
بدور:” قالت راح تسالها اليوم وان شاءالله ترضى تخليهاتزورنا.”
سكتت ونزلت راسها الارض تفكر بشوق، امها لاحظت سرحانها وملامح الحزناللي ارتسمت على وجهها..
شيخة:” يمه بدور وش فيج سرحتي..”
بدور:” مافيني شييمه.”
شيخة:” فيج شي وملامح ويهج تقول جذي.”
بدور:” مدري، شوق….”
شيخة:” وش فيها؟ كملي كلامج..”
بدور:”انتي تعرفين ان شوق يوم تتوفى امها كانت صغيرة،وابوها تزوج ام عبدالله، بعد فترة بسيطة..صح”
شيخة:” اي وش الجديد فيهذا.”
بدور:” يمه شوق تعيش اتعس ايام حياتها بهالبيت، متحملة الظلموالكره.”
شيخة:” انا عارفة ان معاملتهم لها زفته وانهم مايخلونها في حالهاابدا.”
بدور والدمعه بعيونها:” شوق يمه تلقى باليوم الف شتيمة غير الضربوالاهانات وغيرها وغيرها.. غير ابوها هالظالم اللي مايخاف ربه، كل ليلة يرجعويضربها، المسكينه مالها احد يدافع عنهاويحميها منه، وزوجته بعد معانيهمنها.”
شيخة سكتت وماعرفت وش تقول لها، كان قلبها محترق على هالبنت المسكينة،رغم صلة القرابة اللي بينهم الا انها ماتقدر تسوي شي لها لان ابوهاكفيلها.

بدور:” بسالج يمه.. شوق وش تقرب لنا؟؟”
شيخة ظلت ساكته ومب عارفةوش تقول لها، خايفة لايصير شي وتصير مشاكل مالها اخر..
بدور:” يمه ماقلتي لي وشتقرب لنا؟؟”
شيخة وبتردد:” راح اقول لج بس احذرج مايطلع الكلام بره لاي شخص.. وخصوصا شوق لانها ماتدري انها تقرب لنا.”
بدور وهي تاشر على خشمها:” ان شاااااءالله وعلى هالخشم..”
شيخة:” ام شوق الله يرحمها، كانت تصير الى جدتي ام ابوي بنتبنت خالتها، يعني القرابة بعيدة وايد، وعلى ايام هم عايشين زوجوها الى ابوعبداللهوكانت صغيرة، بالرغم ان الكل كان رافض هذي الزيجة، لان سمعته ماكانت طيبة وامهاوافقت عليه تحت ضغط ابوها لانه كان متسلف منه فلوس وماقدر يسددهم له، وقرر يزوجهاياها. وطبعا عاشت معاه في بيتهم هذا.
بدور:” واهلها..؟”
شيخه:” اهلها بعدمازوجوها نسوها، ماكان ابوعبدالله يسمح لها بزيارة اهلها الا نادرا، واللي صبرهاعلى معاملته، انها حملت منه وجابت ولد لكن الله قدر له انه يموت.”
بدور:” وكمكان عمره يوم توفى؟”
شيخة:” كان عمره سنة وشهرين، وطبعا بعد ماتوفى ساءت اكثرمعاملته لها.وصار يضربها ليل ونهار، يرجع وهو سكران وحالته حاله، لعوزها ولعوزعيشتها تحملت اهاناته وضربه.لين ماحملت بشوق، ولما عرف انها بنت كرهها وكره بنته،وتحولت العلاقة بينهم من سيئة لاسوا..”
بدور:” واهلها وين كانوا ليش ماحموهامنه.”
شيخه:” اهلها انقطعت علاقتهم فيها من سنين، ولما راحت لهم قالوا لها انتيوياه تنجازون.”
بدور:” وجدي يمه ليش ماسوى شي؟”
شيخة:” جدي منع جدتي من انهاتزور ام شوق لانه كان خايف من ان السمعه السيئة تمسنا بشي. وظلوا مع بعض كم سنة بعدولادة شوق لين ماماتت امها من الظلم والجور.”
ظلت بدور ساكته تفكر في شوق،وبالقصة اللي سمعتها من امها،كانت حزينة ومتضايقة لان شوق تعاني ومابيدهم شي يسونهلها.

شيخة بنت ام محمد، اكبر البنات بس مب كبيرة بالعمر، هي وبنتها مثلالربع، لها شخصية قوية وحلووة بين الاهل، وعندها من لعيال بدور وياشوق بنفس الصف،ملامحها هادئة ولطيفة، وهي وشوق اكثر من الخوات، ومازن اخوها الصغير عمره 11سنة.

^^^^^^^^^^^^^^
كانت قاعده يم الشجر اللي بالساحة، كانتالفسحة توها بادئة، وهي تتامل في السماء وسرحانه
” بووووو..”
بدور:” اللهياخذج خوفتيني..”
شمس:” اسم الله علي فال الله ولافالج، بعدي صغيرة.”
بدورماكان لها خلق مزاح وضحك، وظلت ساكته وتفكر بشوق.. حتى قطعت حبل افكارها شمس مرةثانيه:” من اللي ماخذ عقلج ..”
بدور:” سكتي عني احسن لج.”
شمس عرفت انهامتضايقه من شي:” افااااا انا اسكت واخليج جذي، لالالا لازم اعرف وش فيج متضايقة،والا مايصير اعرف؟”
بدور وهي تتنهد:” شوق..”
شمس واللي خافت من اسلوبها:” شفيها شوووق؟”
بدور:” شوق اليوم ماجت المدرسة ومب من عوايدها تغيب.”
شمس:” يمكن البنت مريضة؟”
بدور وطلعت منها ضحكة قهر:” ههه حتى لو كانت مرضة حيل، انتيتعرفين انها ماتحب القعدة بالبيت، والمدرسة المتنفس الوحيد لها.”
بدور:” مدري وشاقول لج بس اذا رديتي البيت اتصلي فيها.”
بدور:” انا خايفة يكون صار فيها شي منابوها والا زوجته النسرة.”
شمس وبدت تخاف عليها:” لالا ان شاءالله مافيها الاالعافية ولاتخوفيني اكثر.”
وحاولت بدور تنسى الموضوع واخذتهم السوالف لين مادقالجرس وكل وحده فيهم رجعت لصفها وبالها مشغول بشوق. بدور وشمس وشوق صديقات من ايامالابتدائي.. وشمس بنت حبوبه خفيفة دم ، وقلبهاطيب.

^^^^^^^^^^^^^^
وفي بيت ابومحمد..
” انا اقول لك عطنيالمفتاح، لااوريك شغلك.”
سيف:” مب عاطيك اياه، اول رجع الفلوس الليعليك..”
احمد:”اي مااااعليه راح اعطيك بس انت عطني المفتاح الحين.”
سيف والليمعاند ومب راضي يعطيه اياه:” لالالالالالا، انا عارفك زين وخابزك، انت ماراح تعطينياياهم وتاكل حقي مثل كل مرة..لالا عطني اياهم الحين.”
احمد:” من وين اطلعهم لك،والله ماعندي الحين، حارس نهاية الشهر وان شاءالله اردهم لك.”
سيف:” يعنيالاسبوع الجاي، واذا مارديتهم اخذ فوائد.”
قاطعتهم امهم ام محمد:” وانتواماتقعدون ابد، الظهر صراخ وبالليل صراخ متى تعقلون.”
احمد:” حقج علي يمه، بسقولي لولدج سيفوووه يردي المفتاح تاخرت على الربع.”
سيف:” برده لك بس هااااالاتنسى اخذ فوائد.”
احمد:” زييييين يااخي، بس عطني اياه.”
ام محمد وهي قاعدهعلى الكنبه:” ياسيف اسمع كلام اخوك وعطه المفتاح.”
سيف المقهور من اخوه:” زينيمه على امرج بس ابيج تشهدين عليه.”
ام محمد:” عطه وانا امك، واذا على الفلوسانا اعطيك اياهم.”
احمد:” لا،لاتعطينة شي انا اللي متسلف وانا اللي بردهم له،يالله انا طالع تامريني شي؟”
ام محمد:” لاحبيبي ، روح الله يحفظك بس لاتتاخر انتتعرف ابوك مايحب التاخير.”
سيف يضحك:” هههههههه اذا ماتاخر ماكونسيوووف.”
احمد راح يحب راس امه:” ان شاءالله من عيوني، وماراح اتاخر واحر بعضالناس.”
ام محمد:” روح الله يرضا عليك.”
طلع بسرعة وظل سيف والوالدة قاعدين،وظل يقرا بالمجلة الرياضية الموجودة على الطاولة. لي من سالته الوالده:” سيف يمهماتعرف متى برد اخوك من السفر؟”
سيف:” بل عليج يمه، ماصار له اسبوع من سافروانتي تسالين متى بيرجع!!!”
ام محمد:”……………..”
سيف:” بدينا نشتاق،،ونوله ونحن ونصيح و…..”
ام محمد:” انا اصيح..!!…” وعطته ضربه خفيفة علىكتفه..
سيف:” هههههههههه امزح معاج يمه، بس محمد يمكن يطول بهذي السفرة، اللهاعلم.”
ام محمد:” والله له وحشه بالبيت.”
سيف:” وااااايد ، وان شاءالله يردبالسلامة.”

وبعد ساعة من طلع احمد من البيت رجع ابومحمد من الشركة، وقعدمعاهم بالصالة..
ابومحمد:” السلام عليكم..”
ام محمد وسيف:” وعليكمالسلام.”
ابومحمد:” وين اخوك؟”
سيف:” مدري فيه طلع لربعه من ساعه.”
ابومحمد:” وخواتك ردوا ؟ ”
سيف:” اي يبه، سمر فوق وخلود بعد .”
ام محمد:” تبينخلي الغدى الحين؟”
ابومحمد:” سيف اتصل في اخوك وقول له يرد البيتبسرعه.”
سيف:” ان شاءالله.”
وقام سيف عند التلفون واتصل باخوه.. وبعد ماسكرهرجع مكانه وقعد ..
ابومحمد:” وينه فيه الحين.؟”
سيف:” يقول عند الباب بره،الحين بيدخل.”
بس قامت ام محمد تجهز الغدى ويا الخدامة، دخل احمد وسلم عليهموقعد يم ابوه..
ابومحمد:” وين كنت.؟”
احمد:” كنت ويا الربع وحمد بعدبره.”
ابومحمد:” زين يالله قوموا انتغدى.”
وقاموا كلهم ، وراحت الخدامة تناديالبنات حتى ينزلون يتغدون..

احمد عمره24 سنة يشتغل مع ابوه بالشركه،شكلةحلووو وعنده سيارة سبورت مرسيدس، يحب القعده بالمقاهي، وسيف اخوه عمره22 سنة،يحبالمزح ودووم يتهاوش ويا اخوه احمد، وهذا اخر العنقود من الشباب عنده سيارة هامربالرغم ان ابوه ماكان يشجع هالنوع من السيارات الا ان اصرار سيفووو عليها خلاهيشتريها، يحب الدوارة بالمجمعات ومناجر خواته بعد وخصوصا خلود، وباقي عليه فصلويخلص الجامعه، وعلى الرغم من اهماله الا ناجح بتقدير جيدجدا>>>وهو اكسلواحد فيهم..!!

^^^^^^^^^^^^^^
بالمدرسة كانت بدور قاعده لحالهاوالكرسي اللي يمها فاضي، كانت شوق تقعد يمها، المدرسات بالفصل كانوا دائما يسالونعنها ومستغربين سبب غيابها اللي صار له ثلاثة ايام متواصلة.. بدور بعد انتهاءالثلاث الحصص الاولى راحت ادور هديل وللاسف ماشافتها..
وبعد انتهاء الدوام وهيتنتظر السايق قررت تزور شوق، ولما وصل السايق ركبت السيارة وقالت له: عمران وقف عندبيت بوعبدالله بروح شوي وبرجع اوكي، لاتروح اوقف انتظرني.
عمران: اوكيماما.
بدور: ماني امك..
ولما وصلت عند البيت وفي لحظة تراجعت عن قرارها، لماشافت بوعبدالله يمشي ومب عارف يوزن نفسة.. خافت منه وقالت للسايق يردها البيت.. ولما وصلت البيت رمت شنطتها على الكنبة وفصخت عباتها، وراحت لامها بغرفتها..دقتالباب ولما سمعت امها دخلت الغرفة..
بدور:” السلام عليكم يمه..”
شيخة:” وعليكم السلام والرحمة..”
قعدت بالكنبة اللي يم امها وسكتت،، وبعد فتره من الصمتسالت شيخه بنتها: ” شفيج سرحانه؟؟ في شي صاير؟”
بدور:” اي..”
شيخة:” وش فيجخوفتيني؟”
بدور:” يمه شوق صار لها ثلاثة ايام ماداومت بالمدرسة.. ومدري وشفيها.”
شيخة:” يمكن مريضة، كان سالتي اختها هي مب وياكم بالمدرسة؟”
بدور:” اي، اليوم رحت ادورها بس مالقيتها وكنت راح ازورهم بالبيت بس…”
شيخة:” بس شنو؟شفيج تتكلمين كلمتين وتسكتين.”
بدور:” شفت ابوعبدالله وهو راد البيت، ومب عارفيمشي، خفت وقلت للسايق يردني البيت.”
شيخة:” استغفرالله.. هذا لابالليلولابالنهار يوقف عن هالمنكر.”
بدور:” مدري يمة بس شوق مدري ليش غايبه مب منعوايدها، وهذي اول مرة تغيب فيها.”
شيخة:” يمكن مريضة حيل ومن جذيماداومت.”
بدور:” لايمه مستحيل شوق تغيب يوم واحد، رفيجتي وانا عارفتها، اناحاسة ان فيها شي ثاني بس شنو مدري.. يمه وش رايج تتصلين لهم وتسالين عنها؟”
شيخةوهي قايمة:” ان شاءالله يابدور ان شاءالله.”
كلام بدور خلاها تفكر في شوق اكثر،يمكن يكون كلام بنتها صح ويمكن خطا، بس ماراح تتطمن الا اذا اتصلت واطمانت عليهابنفسها.
الجزء الثاني

وفي بيت سالم بومازن.. كانوا قاعدين يتغدون..
مازن:” ابي اروح بيت جدي..؟”
شيخة:” ان شاءالله بعد صلاة المغرب.”
مازن:” وليش مانروح العصر احسن.”
بدور:” ابوي عنده شغل وماراح يرد البيت الاالعصر.”
مازن:” زين يمه خليني انا اروح وانتوا تجون المغرب.”
شيخة:” ماعليه قول للسايق واهو يوصلك بس خل بالك مابي شكاوي من جدتك فاهمني زين.”
مازن:” ان شاااااااءالله .”
بدور:” متى بتتصلين لبيت ابوعبدالله.”
شيخة:” حبيبتي اصبري شوي.. دوم مستعجله.”
بدور:” صبرت بمايكفي، الله يخليج يمه بسرعة.”
مازن” هههههههه وانتي من متى صبرتي دومج مستعيلة.”
بدور:” اكرمنا بسكوتك لوسمحت.”
مازن:” مب ساكت بكيفي.”
بدور ماردت عليه، لانها لوتهاوشت معاه ماراح تخلص، وثانيا بالها كان مشغول بشي ثاني.

وبعد الغدى راح مازن بيت جده، وظلت شيخة وبنتها بالبيت..
بدور:” يالله اتصلي يمه..”
شيخة:” زين خلاااص….”
واتصلت لام عبدالله..
شيخة:” الووو.. السلام عليكم.”
ام عبدالله:” هلاوالله، وعليكم السلام.. حياالله هالصوت..”
شيخة:” الله يحييج.”
ام عبدالله:” وينج يالقاطعه ماتبينين..”
شيخة:” تعرفين العيال امتحاناتهم قربت، ومايصير اخليهم لحالهم.”
ام عبدالله:” صادقة بهذي العيال والاشغال ماتخلي الواحد يتنفس شوي..”
شيخة:” زين شلون لعيال؟ عساهم بخير.؟”
ام عبدالله:” بخير الله يسلمج.”
شيخة وبتردد بس مابين بصوتها:” حبيت اسالج عن شوق هي ليش ما اداوم المدرسة؟”
ام عبدالله توترت وماعرفت وش تقول ومن خوفها قامت تلخبط:” هي مريضة شوي، طايحة يعني مريضة مريضة.”
شيخة شكت بكلامها وماحبت تبين لها هالشي:” ماتشوف شر، وديتوها المستشفى؟”
ام عبدالله:” لا،ايه وديناها المستشفى.. بس هي تعبانة وايد من جذي ماداومت المدرسة..”
شيخة حست انها لازم تزورهم يمكن تعرف شي عن السالفة:” زين ممكن ازوركم العصر والا مشغولة؟”
ام عبدالله:” لا ماعندي شي حياج باي وقت.”
شيخة:” يالله انا بسلم عليج الحين واشوفج بعد شوي ان شاءالله.”
ام عبدالله:” الله يسلمج يالغالية.”

وبعد ماسكرت السماعة، قامت ام عبدالله وبعصبية كانت تنادي شوق:” شوقو وينج؟ ”
شوق كانت بغرفتها قاعده على السرير تصيح وتفكر بايامها الجاية بدون مدرسة ، وقطع حبل افكارها زوجة ابوها وهي تناديها، مسحت دموعها قبل لاتدخل وتشوفها..
ام عبدالله وبدون ما تدق الباب:” وينج ماتسمعين وانا اناديج.. والا تسوين نفسج صمخة، سمعيني ام مازن بتزورنا اليوم كانت تسال عنج انا قلت لها انج مريضة ومايحتاج تنزلين فاهمه..”
شوق ترد عليها والالم من ضرب ابوها بيذبحها:” ان شاءالله.”
شوق فرحت لماعرفت ان شيخة بتزورهم لكن بنفس الوقت حزنت لانها مب عارفة شلون توصل لهم اللي صار لها..
كان عبدالله قاعد يطالع الرسوم المتحركة ومندمج، وشوي الا يسمع صوت الجرس وامه تناديه علشان يفتح الباب..
عبدالله:” افففف يعني مافي احد الا انا يفتح الباب..”
ام عبدالله:” يالله روح افتحه لا تخلي الحرمة واقفه بره..”

شوق كانت فوق بغرفتها قاعده تكتب رسالة لبدور تقول فيها كل اللي صار لها، واول ماخلصت كتابتة الرسالة خشتها بين الكتب ماشافت الا هدى واقفه واطالعها بحقد،
هدى وبقهر:” اخر زمن اصير مطراش لهذي >> تقصد شوق ، امي تقول لج لاتنزلين فاهمه.”
وبالمجلس كانت ام عبدالله وشيخة قاعدين يسولفون..
ام عبدالله:” زارتنا البركة يا ام مازن.”
شيخة:” البركة فيج ياام عبدالله..”
ام عبدالله:” شخبار بدور ومازن؟”
شيخة:” بخير دامج بخير.. وانتي شخبار البنات؟ وعبدالله؟
ام عبدالله:” بخير الله يسلمج، مساكين من ردوا من المدرسة وهم يراجعون ويحفظون بهالكتب.”
شيخة:” اي ان شاءالله تعبهم مايروح..”
دخلت هديل وسلمت عليها:” السلام عليكم..”
شيخة:” وعليكم السلام، شخبارج هديل؟”
هديل:” بخير الله يسلمج..”
شيخة سكتت شوي وطالعت ام عبدالله وسالتها:” وينها شوق؟”
ام عبدالله:” المسكينة تعبانه وراحت تنام لها شوي.”
شيخة:” خسارة كان ودي اشوفها، هي مريضة حيل؟”
ام عبدالله:” شوي، هي عاد ماترحم نفسها وماترتاح، اقول لها شغل البيت خليه علي تقول لا مايصير اخليج بروحج تشتغلين.”
شيخة مستغربة من ام عبدالله وتفكر بكلامها،: وينها خدامتكم؟”
ام عبدالله:” سافرت .”
شيخة:” ومتى بتجيبون لكم وحده ثانيه؟”
ام عبدالله:” ان شاءالله قريب.”
كانت هديل ساكته وتسمع كلام امها اللي كل جذب في جذب، ومب عارفه شلون تفهم شيخة ان شوق تعاني بهالبيت اكثر مماتتصور..
شيخة حست من نظرات هديل لامها ان شوق فيها شي، نظراتها كانت استغراب ، حاولت تتكلم لكن وجود امها يمنعها..
شيخة:” يالله انا استاذن الحين.”
ام عبدالله:” وين توها الناس ياام مازن.”
شيخة:” ان شاءالله بوقت ثاني، بدور لحالها بالبيت ومايصير اخليها اكثر..”
ام عبدالله:” عااد لاتقطعينا، خلينا نشوفج مرة ثانية.”
شيخة:” ان شاءالله، وانتي بعد لاتنسين تزورينا..”
ام عبدالله:” ان شاءالله.” طالعت هديل وقالت لها:” وصلي ام مازن للباب.”
هديل:” ان شاءالله يمه”
هديل انتهزت الفرصة وطلعت الورقة وعطتها شيخة، وقالت لها: هذي رسالة من شوق لبدور فيها كل شي تبون تعرفونه.” هديل ماقدرت تحبس الدمعه اللي في عينها.. شيخة رفعت راسها وسالتها:” وش فيج تصيحين؟ شوق فيها شي؟”
هديل:” قولي وش مافيها..!! الرسالة بتفهمكم كل شي.”
شيخة وهي تمسح دموع هديل:” لاتبجين، وان شاءالله ازوركم مرة ثانية، انتبهي لنفسج وسلمي على شوق.”

طلعت شيخة وظلت هديل بالحوش اطالع السماء والعصافير، تذكرت شوق وشلون حالها يزيد يوم عن يوم..” ياليت عندي حل، كان ارتحتي من ظلم امي وابوي.”
وبين ماهي سرحانه وتفكر باختها، سمعت صوت الاذان اللي هدا اعصابها وريح بالها.. لكن في صوت مزعج وثقيل خرب عليها..
هدى:” انتي هني وامي داخل تنتظرج..”
هديل:” وليش تنتظرني ؟”
هدى:” مدري روحي لها وساليها..”
هديل:” انتي ماتعرفين وش تبي امي ، هذي من سابع المستحيلات.”
هدى:” وش تقصدين بكلامج؟”
هديل:” والله اللي بتفهمينه افهميه، عن اذنج.”
هدى وبعصبيه:” اففففففف مافي احد بهالبيت يريح الاعصاب كلهم يرفعون الضغط.”
قامت هديل عنها،وهي ساكته لان الكلام وياها مضيعة للوقت، ولما دخلت البيت لقت امها قاعده بالصالة..
ام عبدالله:” وش اللي اخرج ؟”
هديل وهي مقهورة:” قعدت بره، فيها شي؟”
ام عبدالله:” وليش تكلميني جذي، انا امج والا ماعاد فيه احترام لي بهالبيت؟!”
هديل:” اسفه وحقج علي، عن اذنج تامريني شي؟”
ام عبدالله:” ام مازن ماسالتج عن شي؟”
هديل:” شي مثل شنو؟”
ام عبدالله:” لاتسوين نفسج ماتفهمين،تعرفين وش اقصد.”
هديل:” اهااا، تقصدين شوق ، لا ماسالتني عن شي.. تطمني.”
ام عبدالله:” ايه انا خفت تقولين شي، انا عارفتج تحبين العله اللي فوق.”
هديل وبصوت حاد شوي:” اي اختي واحبها عندج مانع.”
ام عبدالله باستغراب وعصبية:” اوريج ياهديل.”

^^^^^^^^^^^^^^^^^^^^^^^^
ابومحمد:” شلون تنسون البضاعه بالميناء..؟!”
طارق:” الموظف اللي بالميناء قال البضاعه ماراح توصل الا بعد بكره..”
ابومحمد:” اي موظف واي خرابيط ، البضاعه تكسرت نصها وانتوا ياغافلين لكم الله.”
وقبل لايتكلم طارق، دخل ابوحمد: هااا عسى ماشر ياخوي وش فيك تصارخ؟ صوتك واصل لاخر الدنيا..هدي اعصابك شوي.”
ابومحمد:” وهم خلوا فيها اعصاب..”
ابوحمد:” خير وش صاير؟”
ابومحمد:” البضاعه اللي وصلت من تايلند اغلبها تكسرت.”
ابوحمد:” يابومحمد لاتعصب وان شاءالله مافيها خسارة كبيرة.. وانا الحين طالع للميناء واشوف السالفة هناك.”
ابومحمد:” اتصل وطمني.. لاتنسى اعرفك نساي..”
بعد ماطلع ابوحمد من المكتب طلع طارق وراه والغضب مبين على وجه، دخل مكتبه وقعد..
صالح:” خيريابوالشباب، وش فيك معصب.؟”
طارق:” واللي يرحم والديك اسكت تراها واصله لخشمي.”
صالح:” اف اف اف، وش صاير؟”
طارق بعد ماهدا شوي:” البضاعه اللي وصلت من تايلند نصها تكسر، والملام انا.”
صالح باستغراب:”شلون؟”
طارق:” لان انا اللي اتصلت وسالت الموظف بالميناء وقال لي بعد بكره توصل البضاعه ، وهي بالاساس وصلت امس وابومحمد يعتبر هذا اهمال مني وتسيب وظل يصارخ علي من اول مادخلت المكتب.”
صالح:” انت غبي بعد دافع عن نفسك.”
طارق:” اذا انا غبي انت وش تطلع؟ اكيد دافعت عن نفسي بس شكله ماراح يعديها على خير.”
صالح:” لا ان شاءالله مافيها الا الخير، وتوكل على الله.”
طارق:” ان شاءالله.”

ابومحمد وابوحمد اخوان، يملكون اضخم الشركات واقواها بالسوق التجاري.. ورثوها من ابوهم الله يرحمه، ولهم سمعه من اطيب مايكون. طارق موظف بالشركة صديق محمد وحمد عمره 26 سنه ومب متزوج، يعيش ويا امه وثلاث من خواته بالبيت، وهو اللي يصرف عليهم بعد وفاة ابوه. اما صالح فهو مجرد موظف بالشركة كافي الناس خيره وشره.

^^^^^^^^^^^^^^^^^^^^^^^^
” وهذا متى بيرجع من السفر.. زودها.. ومصخها؟!”
حمد:” والله الولد وكيفه،ومدري متى برد، وحتى لو ادري مب قايل لك خلك جذي تحترق وتنفجر.”
طلال:” انت متى بتصير ذرب بالكلام؟!”
حمد:” وش فيه كلامي وش زينة، اصلح خطيب بالجامع. طلووول وش اخبار حبيبة القلب؟”
طلال وهو يطالعه وخاطره يجوده من حلقه:” اولا انا مو اصغر عيالك تناديني طلوول وثانيا مالك شغل فيها، هي حبيبتي والا حبيبتك.”
حمد مسوي نفسه زعلان:” افااااا الحين انا مالي شغل؟ ماعليه الله كريم.” وسوى نفسه بيطلع من المكتب..:” عن اذنك..”
طلال:” تعاااال وين رايح، امزح معاك؟ وهذي بوسه على راسك مع انك ماتستاهل خخخ.”
حمد وحب ينتقم منه:” هالمره سماح، وعلى العموم شكرا، بس مرة ثانيه غسل اسنانك وحلقك زين ترى الريحة فااايحة واصلة للسماء..!!”
طلال باستغراب:” اناااا، اناااااا.”
حمد:” لا كومار ، شفيك صرت مثل الهنود اللي عندنا.”
طلال:” انا هندي ياللي ماتستحي..”
حمد وهو يضحك:” بس بابا لايسوي قرقر واجد يالله.”
وقاطعهم وليد وهو داخل المكتب..:” وانتوا مافي مرة ادخل هالمكتب الا واتهاوشون، متى بتعقلون على هالحركات.”
حمد:” طلااااااال طاااالع من يتكلم، انت اصلا اخر واحد فينا يتكلم ياثقيل زمانك.”
طلال:” هههههههه حلوووة ثقيل زماانه.”
وليد:” هاهاهاها مايضحك، وبعدين كل واحد يروح لمكتبه لايجي ابومحمد ويغسل شراعنا.”
حمد:” يغسل شراع والا شماغ خخخخ.”
وليد:” تتمسخر انت، الشر مو عليك على اللي يعطيك وجه.”
حمد:” وجه والا رجل خخخخ.”
وليد:” طلال واللي يرحم والديك اخذه وياك، هذا مابسكر حلقه اليوم.”
طلال:” حمد يالله قوم وعن ثقالة الدم ورانا شغل.”
حمد وهو قايم يبي يسحب شماغ وليد:” ورانا والا قدامنا خخخخ.”
وليد:” لاحووول الله، اخذه لا اسوي فيه جريمة قتل اليوم.”
طلال:” بس خلاص هدي اعصابك طالعين.”
حمد:” طالعين والا داخلين.”
طلال يطالعه:” انت شارب شي قبل لا اداوم؟”
حمد:” عن الغلط انا ما اشرب.. طلال؟”
طلال وبتافف:” نعم..قول وش عندك.”
حمد:” عندك والا عندي خخخخ.”
طلال:” تدري انها بايخة، يالله قوم ادلف على مكتبك لا اسوي فيك جريمة مو وليد.”
حمد:” زيييين خلااااص مايمزح الوااحد، هاااا وسكرنا هالحلق.”
طلال:” سويت خير.”
وبعد ماسكتوا ربع ساعه ، ظل حمد يطالع طلال وهو يشتغل..
طلال:” شفيك اطالعني اشتغل احسن لك.”
حمد ظل ساكت ولافتح حلقه بحرف..
طلال:” حمد شفيك ساكت؟”
حمد:” انالله انت موقايل اسكت واقعد على مكتبك ولاتتكلم وانا نفذت اوامرك وش عندك الحين؟”
طلال:”مسوي فيها الولد المطيع، اقووول قم خذ المعاملات وخلصها بسرعه احسن لك.”
حمد وهو طالع من الغرفه وبدون مايسمعه طلال ” ياااربي متى يرجع محمد يفكني من هذلين المفترسين.”
طلال:” وش تخربط انت؟”
حمد:” ولاشي سلامتك.. عن اذنك طلولتي..!!”
طلع حمد من المكتب وهو يضحك على طلال، وبطريقه شاف طارق وهو حامل بيده اوراق لمكتب ابومحمد..
حمد:” هلا طارق شخبارك؟”
طارق:” بخير الحمدلله.”
حمد:” وينك ماتبين من زمان الربع يسالون عنك؟”
طارق:” مشغول ويا الاهل شوي..”
حس حمد ان طارق فيه شي.. وماحب يحسسه بهذا الشي..:” عندك شغل العصر؟”
طارق باستغراب:” لا ليش؟”
حمد:” ابيك تمر علي الديوانية العصر..”
طارق:” ان شاءالله اقدر، عن اذنك.”
وراح كل واحد فيهم لشغله، لكن بال طارق ماكان فاضي، كان مشغول بالمشكلة اللي طايح فيها.

^^^^^^^^^^^^^^^^^^^^^^^^

ام محمد مشغولة بتجهيز الغدى لعيالها اللي ميتين جوع.. الكل كان موجود ماعدى ابومحمد ومحمد اللي للحين مارد من السفر.
خلود:” يمه وين الغدى والله جوعاااانة..”
احمد:” سدي حلقج وقومي ساعدي الوالده،بدل ماتتامرين عليها.”
خلود:” وحضرت جنابك ليش ماتساعدها.؟”
سيف:” عن طوالة للسان، انتي لسانج يبي له قص.”
سمر الوحيدة اللي كانت ساكته وماتشاركهم هواشهم هذا..
سيف:” وش فيها الحالمة الولهانة ساكته؟”
احمد:” خلها هذي غرقانه في القصص اللي تقراهم ليل ونهار.”
خلود:” ههههههه والله لوتتكلمون من الحين لي بعد اسبوع مابتسمعكم.”
احمد وبحده:” انتي للحين قاعده.. قومي ساعدي الوالدة.”
خلود وبقهر:” والخدامة وينها ماتساعدها، والا هذي اللي ماتدري وين الله حاطها.”
سيف:” يالله يالله ورينا مقفاج وروحي ساعدي امنا الحبيبة لان بطني صار يصوصو خخخ.”
خلود وهي قايمة:” ياخفيف..”
احمد:” ههههههه والله كانكم توم اندجيري مابتعقلون.”
سيف:” طالع من يتكلم،اسكت لوسمحت خلني اكل المقبلات قبل لاتجي خلودوو وتصفي الاكل.”
سمر واللي انتبهت لاخر جملة قالها:” بقول لها اللي قلته.”
سيف انزهق منها:” ، متى قعدتي من نومج خخخخ،، وانتي ماتسمعين الا الكلام اللي يعجبج واللي مايعجبج تسدين اذنج عنه.”
احمد:” صباااااااح الخير ايتها الاميرة الحالمة..”
سمر:” عن السخافة اثنينكم.”
سيف:” لوسمحتي احترمي اللي اكبر منج، وقوووومي ساعدي الوالدة الخدامة بره مشغولة.”
سمر:” انا قايمة مب علشانكم، علشان الوالدة بس.”
وبعد ماراحت سمر،ظل سيف ياكل بالمقبلات وبعد ماخلص صحنه كان بمد يده بصحن اخوه، لكن احمد ادارك الامر وضربه على يده..
احمد:” وتمد يدك بصحني.. انت ماتشبع ولاتصبر، خلصت اللي عندك داير على ممتلكاتي..يااخي اصبر شوي..”
سيف:” والله جوووعاااااااان ما اكلت من البارحة.”
احمد:” اووووه غريبة انت ماتفوت العشاء.”
سيف:” ومن قال لك اني مفوت العشاء.. بس جوعان لاني متعشي من المغرب من جذي بطني يصوصو.”
احمد:” والغدى وصل والحين بطنك مابيصوصو بيعوعو.”
خلود سمعت اخر جملة وضحكت عليه:” ههههههههههه.”
سيف:” وانتي تضحكين على شنو، جيبي الاكل وانتي ساكته.”
خلود وبدلع:” يمه شوفي سيفووو كله يصرخ علي ويزفني.”
ام محمد:” يمه سيف انت اكبر منها لاتخلي راسك براسها، وهذي اختك الصغيرة.”
سيف يرد عليها وهو ياكل:” يمه خلود وايد دليعة.. وحساسة زياده عن اللزوم.”
ام محمد:” ماعليه يمه بعد انت الكبير ومايصير كل يوم سالفتكم جذي.”
سيف:” ان شاءالله، على امرج يالغالية.”
ظلوا كلهم ياكلون الا ام محمد كانت سرحانه وبالها مشغول.. انتبهت لها سمر وسالتها..
سمر:” يمه شفيج ؟ من قعدنا وانتي مااكلتي شي، في شي شاغل بالج؟”
احمد:” يعني ماتعرفين حبيب القلب محمد.”
سمر:” ايوووة، بس والله صج البيت بدونة مايسوى.”
سيف:” بل بل عليكم انتوا الثنتين يعني احنا مانملي عينكم.. والا حنا اولاد الجيران وماندري.”
خلود:” محمد غير.”
سيف:” وانتي محد طلب رايج.”
ام محمد طالعته، وقالت:” انتوا كلكم عيالي، ونور البيت بس تعرفون محمد اخوكم الكبير..”
سيف:” الله كريم بس يالله محمد له نكهة وطعم غير بالبيت.”
احمد:” وانت تشبيهاتك كلها بالاكل ،يا اخي خل تشبيهاتك سنعه شوي.”
سيف:” وش فيها تشبيهاتي حليلها تجنن.”
احمد:” اقووول كمل غداك، وقم ذاكر عندك امتحانات.”
سمر:” وانا بعد عندي امتحانات بقوم اذاكر.”
احمد:” قبل لاتقومين، تركي عنج هالقصص وانتبهي لدراستج.”
سمر:” ان شاءالله.. يمه تامريني شي قبل لا اطلع لغرفتي؟”
ام محمد:” لايمه بس انتبهي لدراستج مثل ماقال اخوج.”
وبعد خمس دقايق..
خلود:” الحمدلله، انا بروح اطالع التلفزيون شوي.”
ام محمد:” وانتي ماعندج امتحانات؟”
خلود:” عندي.”
احمد:” اجل وش له اطالعين التلفزيون؟ روحي ذاكري وخرابيطج هذي مابتطير، يالله قومي.”
خلود وبتافف:” زييييين..”
وقاطعهم سيف اللي للحين ماشبع:” يمه فيه غدى والا خلص؟”
احمد:” لعن ابوه انت ماتشبع.. صار لك ساعتين وانت تاكل.”
سيف:” وانت وش يخصك، جوعان خلني اكل.”
ام محمد:” يمه خله ياكل.. في خير عندنا .”
سيف ويبي يحر اخوه:” تسلمين يالغاااااااالية.. امممم اممم.”
احمد:” زين واذا صادتك التخمة لاتجي تركض ودوني المستشفى ماحد بوديك.”
ام محمد:” ليش تفاول على اخوك جذي يا احمد.”
احمد:” انا ما افاول عليه ولامنعته من الاكل، بس كل شي يزيد عن حده ينقلب ضده، واكله الزايد بيضره ماينفعه.. وانا لوما احبه مانصحته.”
سيف وقف عن الاكل وحس انه صج مصخها شوي..:” انا اسف، الحمدلله وماراح اكررها مرة ثانيه.. عن اذنكم بروح اذاكر لي شوي.”
ام محمد:” الله يعطيك العافية ان شاءالله.”
سيف:” وياج يالغالية.”
احمد:” وانا بعد يمه استاذن بروح انادي الخدامه تجي تشيل الاغراض.”
ام محمد:”بارك الله فيك.. وعساني اشوفك ومحمد عرسان واشوف عيالكم.”
احمد:” ان شاءالله، بس انا مب الحين محمد اول.”
وطلع احمد من غرفة الطعام وظلت امه تفكر بمحمد اللي من سافر ما اتصل.” مدري وش فيه هالولد من سافر ما طمنى عليه، اخاف صار فيه شي.. ان شاءالله اذا رجع بومحمد بخليه يتصل له.”

^^^^^^^^^^^^^^^^^^^^^^^^

” الجزء الثالث ”
“تعبت يافيصل تعبت، مااقدر اتحمل اكثر من جذي، صدقني انا ماقدر اسعدك.”
فيصل:” لاتقولين جذي صدقيني انا مابي غير سلامتج وبس.”
نجود:” بس ياعمري….”
فيصل:” لابس ولا شي، انتي وجودج عندي يغنيني عن كل شي .. صدقيني ياحبيبتي.”
نجود والدمعه معلقه بعينها:” وانا ماقدر استغني عنك، بس مو معناته احرمك من ابسط شي العيال.”
فيصل يطالعها بنظرة كلها حب وحنية وهوماسك يدها:” وانا راضي باللي الله كاتبه لي، رب العالمين قال:{ وعسى ان تكرهوا شيئا وهو خير لكم وعسى ان تحبوا شيئا وهو شر لكم.} وانا يكفيني وجودج يمي وانج تحبيني.”
ماقدرت تمسك نفسها ونزلت دموعها على خدها،حست انها ظالمة فيصل معاها، كانت عارفة ان كلامه هذا كله علشان يهديها وينسيها السالفة، لكنها مستحيل تنسى
نجود:” الله يخليك لي ولايحرمني منك يارب.”
كانت تكلمة وهي تصيح، رفع راسها ومسح دموعها بيده، وباسها على راسها:” لاعاد اشوف هالدموع مرة ثانية تراها غاليه، يالله عااااد خليني اشوف ابتسامتج الحلووة.”
طالعته وابتسمت، وكانت تقول في خاطرها:” ياليت اقدر احقق لك هالامنية، واخليك اسعد انسان، بس..اااه مابيدي شي اسويه لك.”

نجود بنت خالة فيصل ام محمد هادئة وحبابة، تزوجت فيصل واللي ماكانت تواطنه ابدا، فيصل يحبها موووووت، شاب حلووو الملامح وطيب، يشتغل وياعمه بالشركة.حياته وزوجتة سعيدة لولا هالمشكلة اللي هم فيها..

^^^^^^^^^^^^^^^^^^^^^^^^
وفي بيت شيخة
بدور:” واللي يسلمج يمه شوفي لها حل، صار لها اسبوعين ماداومت ومايصير نخلي ابوها ينفذ اللي براسة.”
شيخة:” مدري وش اسوي ، اخاااف اذا كلمت ابوي يسوي مشكله معاه وتكبر السالفة.”
بدور:” الله ينتقم من هالظالم اللي مايخاف ربه.”
شيخة:” لا ادعين.”
بدور:” هذا ظالم..”
شيخة:” والله يحاسبه يابدور، مو الناس اللي تحاسب ولاياخذ الحق الا رب العالمين.”
بدور:” بس وشوق مايصير نخليها جذي.”
شيخة وبحزن:” ان شاءالله، ان شاءالله نلقى لها حل.”
وبعد دقايق من سكوتهم..
بدور:” انا لقيت حل… يمه ام عبدالله انتي تعرفينها ماترد لج طلب، يمكن اذا كلمتيها تقدر تقنع ابوعبدالله يرد شوق المدرسة.”
شيخة:” واذا سالتني من وين عرفت السالفة وش اقول لها؟”
بدور وبحيرة:” مدري قولي لها هديل قالت لي.”
شيخة اللي مااقتنعت بردها:” لالالا وبعدين اطيح السالفة براس المسكينة هديل.. لامايصير.”
بدور:” اجل وش انسوي؟!”
شيخة:” انا راح اعرف من ام عبدالله وبدون مااجذب، عطيني التلفون بسرعه.”
بدور:” ان شاءالله.”
وسكتت بنتها حتى تتكلم بالتلفون..
شيخة:” الوو، السلام عليكم.”
هدى:” وعليكم السلام..”
شيخة:” ممكن اكلم ام عبدالله.”
هدى:” ممكن بس من اقول لها؟”
شيخة:” ام مازن.”
وتركت هدى السماعه وركضت لامها ونفسها شوي وينقطع..
هدى:” يم ة ام ، ام مازن بالتلفون تبي تكلمج.”
ام عبدالله باستغراب:” وش تبي ؟”
هدى:” وش دراني روحي لها وكلميها.”
ماردت عليها وراحت تكلم ام مازن..
ام عبدالله:” الووو.”
شيخة:” السلام عليكم..”
ام عبدالله:” هلااا وعليكم السلام، شخبارج يالبدرة؟”
شيخة:” بخير الله يسلمج، شخبارج انتي؟ وش اخبار العيال؟”
ام عبدالله:” بخيرالحمدلله، يسرج الحال.”
شيخة وبدون مقدمات:” وش اخبار شوق؟”
ام عبدالله واللي نغزها قلبها من هالسؤال:” بخير الحمدلله صارت احسن.”
شيخة:” مدامها صارت احسن اجل وش اللي يمنعها تروح المدرسة؟؟”
ام عبدالله توترت وماعرفت ترد عليها:” هي…هي…”
قاطعتها شيخة:” بدور بنتي وياها بصف وتقول صار لها اسبوعين ماداومت؟ ليش فيها شي يمنعها غير مرضها؟”
ام عبدالله:”…………………..” ظلت ساكته وحست انها بتختنق وماعرفت وش تقول لها، كانت خايفة منها.”
شيخة وبحده شوي:” ماجاوبتيني ياام عبدالله، وش اللي يمنعها؟ في شي غير مرضها صح كلامي؟؟”
حست ان الكلام ضاع منها، واحتارت وش تقول،وقالت لها:” اي صح كلامج.”
وقالت لها كل السالفة، وطبعا ماقالت لها انها حصلت ضرب من ابوها لانها راح تسوي لها مشاكل. وقالت شيخة لام عبدالله انها لازم تقنع ابوعبدالله يرد شوق المدرسة والا راح تسوي لهم مشاكل هم في غنى عنها.. وافقت ام عبدالله وهي تسب وتلعن بشوق واليوم اللي شافتها فيه وربت فيه بهالبيت.

وفي بيت شيخة بعد ماسكرت السماعة..
بدور:” هايمه وش قالت سحيلة ام….
وقبل لاتكمل قاطعتها امها:”اولا عيب تقولين مثل هالكلام مهما كان هي اكبر منج ولازم تحترمينها، وثانيا كنتي يمي وش له اعيد واكرر.”
بدور:” اسفة، بس تتوقعين انها تقدر تقنع بوعبدالله يرد شوق؟”
شيخة:” حبيبتي بدور انتي ادعي لها وان شاءالله كل شي يمر على خير، ويالله قومي جهزي نفسج بنروح بيت يدج.”
بدور:” الا ذكرتيني يمه محمد متى برد من السفر؟”
شيخة:” ياحبيبي يامحمد والله وحشني، مدري فيه بسال ابوي والا خالج احمد اكيد يعرف متى برد.”

^^^^^^^^^^^^^^^^^^^^^^^^

” الله ياسحر وش هالزين، حلاج يوم عن يوم يزيد.”
سحر:” حبيبتي انا من يووومي حلووة والا عندج راي ثاني.”
ميثة:” لا ابدا بس اقصد انج صايرة قمر وحلاج زايد.”
سحر:” عااارفة، بس قولي لااله الاالله لاتحسديني.”
ميثة:” اناااا احسدج، افاااا ماهقيتها منج.”
سحر:” زيييين امزح معااااج خلاااص.”
ميثة:” مااااعليه تعودنااا، الا بسالج..”
سحر:” سالي وياكثر اسالتج..”
ميثة:” الحين انا ياكثر اسالتي؟؟؟ خلاااص مابسال.”
سحر:” اوووهوو علينا، سالي سالي..”
ميثة:” زين بسال، ماقلتي لي وش اخبار حبيب القلب؟”
سحر:” منوووو.”
ميثة وهي تغمز لها:” علينااااا ، يعني من غير محمد؟ الااذا فيه واحد ثاني وانا مدري؟”
سحر:” لاثاني ولاثالث.. بس تصدقين مدري فيه!!”
ميثة باستغراب:” شلووون؟؟”
سحر:” والله مدري مسافر صار له اكثر من اسبوعين وماعرف اخباره.. وودي ازور بيت خالتي.”
ميثة وهي تلعب بالتلفون:” زين ليش ماتزورينهم؟”
سحر:” لا مب الحين، انتظر محمد يرد وبعدين اروح.”
ميثة:” والله مدري براحتج..”
وبعد دقايق …
سحر:” ميثوووو…”
ميثة:” عيونها.. امري..”
سحر:” وش اخبار اللي خبري خبرج؟”
ميثة:” من بالضبط؟؟؟”
سحر:” علي هالحركاااات عبدالعزيز من يعني؟؟”
ميثة:”اييييه عزوز…”
سحر وهي تضحك:” هههههههههه دلعتيه بعد، اقوول طلعي اللي عندج.. وراج سوالف انتي.”
ميثة:” انتي تعرفيني زين ما اخش عليج شي.”
سحر:” يالله قووولي اللي عندج..”
ميثة:” امممم بصراااحة، ودي اشوفه..”
سحر:” جنيتي انتي الظاهر………”
ميثة:” مجنوووونه بحبه.. والله صدقيني هذا غييييييييييير.. كلاااامة غير، كل شي فيه غيييييييير..”
سحر:” ههههههههههه والله جنت هالبنت ، هييييييي انتيييي وين سرحتي والله خبال اللي فيج هذا مب حب..”
ميثة:” هذا الحب ياخبله..”
سحر:” هذا خبال مب حب.. وش فيج ميثة صيري عاقلة هذا مثله مثل غيره اللي عرفتيهم..”
ميثة:” لا ياسحر صدقيني هذا غير غير عنهم ومع الايام بثبت لج.”
سحر:” اقوووول خلج باحلامج.”
وقامت يم المراية تعدل في روحها، وتفكر في محمد اللي تمووووت عليه، وتبني احلامها وامالها فيه..

ميثة صديقة سحر، شكلها عادي الا ان الوان الطيف تصبغ وجهها وهي وسحر بالجامعه، وميثة من النوع اللعوب يحب بتعرف على الشباب حتى سحر، اللي جمالها اسر الشباب، واللي الكل يحسدها عليه، شعرها طويل وناعم ، وكل يوم لها ستايل غير، تحب التغيير.لكن تكبرها وغرورها مخرب عليها ومكره فيها بعض البنات بالجامعه، تحب محمد ولد خالتها وعاقده امال كبيرة على الزواج منه.

^^^^^^^^^^^^^^^^^^^^^^^^
كان ابومحمد قاعد على الكنبه يطالع الاخبار بالتلفزيون.. وخلود قاعده يمه تبيه يغير القناة علشان اطالع برنامجها.. وام محمد تسوي له الشاي..
ام محمد يوم خلصت والخدامة جابت الشاي:” بسالك يابومحمد.”
ابومحمد:” امري..”
ام محمد:” مايامر عليك عدو.. بس محمد طول بهذي السفرة ومن سافر ما اتصل ، هو متى برد؟”
ابومحمد:” كلها يومين ويكون يمج.”
ام محمد:” ان شاءالله، الله يسمع منك.”
خلود:” يمه محمد مب اول مرة يسافر، وانتي كل مرة نفس الموال تقولينه.”
ام محمد:” هذا ضناي، واذا كبرتي وصار عندج عيال بتعرفين معنى كلامي.”
خلود وبدلع:” يمه لاتقولين جذي، ومن قال اني بطلع من البيت انا بقعد معاج ويا ابوي.”
ابومحمد:”ههههههه والله اخاف العكس.”
خلود وهي قايمه:” يبببببببببه لاتقول جذي.”
ابو محمد:” ههههههههههه شوفي استحت وقامت..”
ام محمد:”ماعليك منها تدلع عليك.”
وبين ماهم يسولفون ويطالعون التلفزيون دخلت بدور ومازن الصالة..
” السلااااااااااام عليكم..”
” وعليكم السلاااام والرحمة..”
بدور:” شخبارك يدي؟ شخبارج يدتي؟”
وردوا عليها اثنينهم مع بعض:” بخير الله يحفظج.”
مازن:” وشخباركم بعد؟”
ابومحمد:” بخير، وانت شخبارك؟ وش مسوي بعد؟”
بدور:” قووول وش مومسوي..”
مازن:” سكتي انتي محد كلمج.”
ام محمد:” مازن عيب حبيبي، وين امكم؟”
مازن:” كانت ورانا، يمكن راحت الحديقة تعرفينها لازم تقطف لها جم وردة.”
ابومحمد:” وهذي هي وصلت…”
شيخة:” السلام عليكم..”
ردوا عليها كلهم:” وعليكم السلام ورحمة الله.”
شيخة:” شخبارك يبه..؟ شخبارج يمه؟”
ابومحمد:” بخير الله يسلمج ويحفظج.”
ام محمد:” بخير يابنيتي..شخبارج انتي ؟ من زماااان مامريتوا البيت عسى ماشر؟”
شيخة:” لا مافي شي بس تعرفين امتحانات مايصير اطلع عنهم.”
ام محمد:” اييييه الله يوفقهم ان شاءالله، وهذا اخوانج بعد يدرسون، وهالامتحانات ولاتخلص.”
بدور:” اقوووول يدي متى بيرجع خالي من السفر؟”
ابومحمد:” ان شاءالله بعد يومين ثلاثة.. هو الخبر عند حمد انا مدري بالضبط متى برد.”
شيخة:” ان شاءالله يرد بالسلامة، والله خاطرنا فيه..”
ام محمد:” يااااارب..”
ابومحمد:” انا طالع تبين شي يا ام محمد.”
ام محمد:” مشكور ماتقصر مابي الا سلامتك.”
مازن:” وووويييين يدي ماقعدت ويانا..”
ابومحمد:” وين اقعد وانت من وصلت قابلت هالتلفزيون..”
بدور:”ههههههههه كانه ماعندنا تلفزيون بالبيت مايقدر يفارقه بالمرررة..”
مازن:” كيفي انتي مالج شغل فيني..”
ابومحمد:” هههههههه ماعليه خليه يستنانس..”
وطلع ابومحمد وخلاهم براحتهم، كانت بدور قاعده ومستملة، من سوالف امها وجدتها..
بدور:” يدتي وينها سمر؟”
ام محمد:” فوق بغرفتها…اذا تبينها روحي لها.”
بدور:” عن اذنكم.”
مازن:” اذونج وياج خخخخ..”
طالعته وهي ماشية وماردت عليه.. وصلت فوق عند غرفة سمر ودقت الباب..
سمر:” تفضل..الباب مفتووح..”
بدور:” السلاااااااام عليكم..”
سمر وبابتسامة:” هلاااا وعليكم السلاااام.”
بدور:” شخبارج يااحلى خاله..”
سمر:” بخيردامج بخير، بس لاتناديني خاله احس اني كبر يدتي..”
بدور:” من عيوني..سموووورة.”
سمر:”ههههههه، ماقلتي لي وش اخبارج بالدراسة؟”
بدور:” والله عال العال، ومابقى شي على الامتحانات.”
سمر:” ركزي زين نبيج تجينا الجامعه.”
بدور:” لاتخافين علي، انا قدها وقدود جايتكم الجامعه جايتكم.”
سمر:” ان شاااااااااءالله.”
بدور:” وانتي شخبار امتحاناتج؟”
سمر:” والله ماشي حالي،، وان شاءالله خير.”
بدور:” بالتوفيق ان شاءالله، يالله عن اذنج..”
سمر باستغراب:” وووووين؟؟”
بدور:” بنزل بخليج تكملين مذاكرتج.”
سمر وهي تعدل كتبها:” تعااالي زين، انا مخلصة قعدي بسولف وياج.”
بدور:”اووووووووكي..،” وبعد ماسكتت شوي سالتها:” وينها خلود ؟”
سمر:” المفروض تحت اطالع برنامجها.”
بدور:” غريبة ماشفتها تحت..يمكن بغرفتها؟!”
سمر:” يمكن..”
وبعد ماخلصت سمر من ترتيب كتبها:” امممممممم ..”
بدور:” شفيج؟ عندج شي تبين تقولينه؟”
سمر:” اييييه، ابي اسالج عن شوق شخبارها؟”
بدور واللي من سمعت اسم شوق تغيرت ملامح وجهها، وظلت ساكته وسرحانه..وردت سالتها سمر:” وش فيج سكتي؟ وين راح تفكيرج؟”
بدور:” ماراح مكان، بس افكر بشوق.”
سمر واللي حست ان في شي:” وش فيها شوق؟ خبريني تراج تعصبين الواحد وتوترينة.”
طالعتها بدور وبعيونها الدمعه، وقالت لها كل اللي صار، لحد الاتصال اللي صار بين امها وام عبدالله اليوم.
سمر:” اللي مايخاف ربه، سكير ومايدري عنها وبعد يطلعها من المدرسة.. اااخ بس لو ابوي يدري.”
بدور:” لااااااااااا ، لازم مايدري يدي والا بتصير مشكلة عوووودة واحنا في غنى عنها.”
سمر:” لاتخافين مابقول، بس انا اتمنى ان الله يساعدها وترجع المدرسة المكسينة حراام ماتستاهل..”
بدور:” الله يسمع منج..”
وسكتت شوي وردت قالت لها:” سمر ، بقولج شي بعد..”
سمر وبقلق:” قوولي وش فيه بعد؟”
بدور:” انا عرفت انها تصير لنا..”
سمر:” شنووووو؟ اكييييد اللي قالت لج اختي شيخة.”
بدور:” ايييه بس لاتقولين لها اني قلت لج شي لاني وعدتها اني ما اقول شي.”
سمر:” ان شااااءالله ماراح اتكلم لاتصير مشاكل.”

^^^^^^^^^^^^^^^^^^^^^^^^

” التكمله ”

حمد كان قاعد بالديوانية يحارس طارق يمر عليه، وكان توه ماسك التلفون بدق عليه والا باب الديوانية منفتح وداخل منه طارق..
حمد:” ولد حلااااااال توني بدق عليك..”
طارق:” السلااام عليكم..”
حمد:” وعليكم السلام… تفضل تفضل..”
طارق:” زاد فضلك.”
حمد واللي مو عارف من وين يبدا كلامه:” الله يحيك، والله نورت المكان بوجودك.”
طارق:” المكان منور باهله..”
حمد:” مشكووووور..”
وسكت حمد شوي وقال:” والله مدري وش اقول لك ياخوي، انا اليوم لما شفتك بالشركة حسيت انك موطبيعي، وبالك مشغول بشي، ومن جذي انا قلت لك تجي عندي اليوم..”
طارق ظل ساكت وماتكلم،ورد قال له حمد:” طارق انت قبل لاتكون موظف عندنا بالشركة انت اخوي وصديقي.”
طارق:” مشكور ياحمد،بس….”
حمد:” بس شنو ياحبيبي قوول لي وش اللي شاغل بالك، يمكن اقدر اساعدك.”
طارق واللي ارتاح شوي من كلام حمد:” مدري وش اقول ولاادري من وين ابدا.”
حمد:” ابدا من المكان اللي يريحك.”
طارق:” انت كنت تعرف الوالد الله يرحمة..؟”
حمد:” والله التقيت فيه كم مرة الله يرحمة، وش فيه؟”
طارق:” كان ابوي متسلف من واحد مبلغ كبير، ومافي حد كان يدري بهذا الشي حتى الوالدة.. وماقدر يسدد الدين اللي عليه وباع البيت اللي حنا ساكنين فيه..”
حمد:” قبل لاتكمل ، وش ديونه هذي اللي تتكلم عنها؟”
طارق:” ابوي كان ماخذ السلفه هذي علشان اخواني وعلشان كل واحد فينا يكمل دراسته، ويصرف على البيت وعلى خواتي واخواني بعد، وانت تعرف انه طلع تقاعد ومعاشة مايكفينا ابدا،وانا بذاك الوقت كنت توني متخرج وماقدر اساعده ولابجزء بسيط….”
حمد:” كمل كلامك ليش سكت؟”
طارق:”اكمل شنو ياحمد، الرجال جاي يبي بيته، يقول لي انا بعطيكم مهله ثلاثة اشهر حتى نفضي له البيت، انا من وين اطلع لنا بيت بهذا الوقت القصير، واشلون اخبر امي عن السالفة اخاف يصيدها شي..والله قهر.”
حمد حس بالقهر والضيق اللي عايشه طارق،وظل ساكت يفكر بحل لهذي المشكلة واحتار معاه، وبعد فتره من الهدوء اللي ساد بينهم..
حمد:” طارق توكل على وان شاءالله بحلها لك.”
طارق باستغراب:” وشلون بتحلها؟”
حمد:” اقووول لك خلها على الله ثم علي وبتنحل ان شاءالله.”
طارق والحيرة باينة على وجهه:” والله حيرتني وياك..”
وبعد هالسالفة ظلوا يسولفون عن مشاغل الشركة والمشاريع، وبعد كم ساعه طلع طارق وراح بيتهم وهو يدعي ان حمد يحل له هالمشكلة، وظل حمد يفكر وماانتبه لنفسه الا والاذان ياذن..

^^^^^^^^^^^^^^^^^^^^^^^^
ام فيصل:” سحر حبيبتي..”
سحر وهي تلعب بشعرها:” هلا يمه امري.”
ام فيصل:” ودج تيين وياي بيت خالتج ام محمد؟”
سحر:” مدري، اروح؟”
ام فيصل:” ايييييه انتي نسيتي ان حنا من سافر محمد مازرناهم.”
سحر:” اجل عطيني عشردقايق واكون جاهزه.”
ام فيصل:” بس سرعي شوي.”
وبعد ماطلعت سحر لغرفتها، دخل فيصل البيت..
فيصل:” السلااام عليكم يااحلى ام..”
ام فيصل:” هلااا وعليكم السلام حبيبي..”
فيصل:”شخبارج يمه؟”
ام فيصل:” بخير الحمدلله، انت شخبارك؟ من زمان مامريت البيت لاانت ولانجود؟”
فيصل واللي بدت على وجهه لمحة حزن:” مشاغل يمه.. ان شاءالله ازوركم ونجود وقت ثاني، الحين انا بروح البيت وبعد شوي باخذ نجود وبنروح بيت خالتي .”
ام فيصل واللي حسته يتهرب من سؤالها:” يمه انا حاسة ان اللي شاغلك عنا مو الشغل شي ثاني وانا عارفة شنو هالشي..”
فيصل:” وش تقصدين؟”
ام فيصل:” انت عارف وش اقصد مايحتاج اقول لك.”
فيصل:” ارجوج يمه لاتفتحين هالموضوع مووقته، انا طالع تامريني شي؟”
ام فيصل:” مابي غير سلامتك، واسمع كلامي”
فيصل وهو يطالعها بحزن:” مع السلامه.”
وبعد ماطلع نزلت سحر من فوق..
سحر:” تكلمين من ؟”
ام فيصل:” اخوج فيصل.. يالله مشينا.”
سحر واللي مستغربه من سرحان امها:” يالله..”

^^^^^^^^^^^^^^^^^^^^^^^^
كانت ام محمد وشيخة والبنات قاعدين بالصالة، وقفوا كلام لما دخلت عليهم خالتهم ام فيصل وسحر والعنود.
ام فيصل: السلام عليكم ياجماعة.
ردوا عليها بصوت واحد:” وعليكم السلام..”
سحر فصخت عباتها وقعدت يم سمر بعد ماسلمت على خالتها وبناتها، اما العنود راحت على طول وقعدت يم خلود وراحوا في سوالف مالها اول ولا اخر.
سمر:” شلونج سحر من زمان مامريتي البيت والا مانستاهل من غير..”
وقطعت عليها كلامها حتى محد يسمعها:” سكتي شفيج، لا بس تعرفين الجامعه ومشاغلها وانا مااقدر اجيكم من غير امي، والسالفة مومثل ماانتي فاهمتها.”
سمر:” اي قلتي لي.”
سحر:” اوووه شفيج، مو مصدقتني يعني؟”
سمر:” لالا مصدقتج صدقيني.”
سحر كانت تبي تسال سمر عن محمد بس كانت تحاول تبين انها ثقيلة شوي، اما سمر فكانت عارفة حركات سحر. ونطت يمهم بدور وقعدت معاهم..
بدور:” اففف ملل حجي النسوان مايملون.”
سمر:” وانتي وش مقعدج وياهم؟”
بدور:” قلت احاول استوعب شيقولون ماقدرت، الا هذي تطلقت واللي تركها زوجها واللي ماتييب عيال وشفتي فلانة والطبخة الفلانية وسويتها وماسويتها ينفخون الراس.”
سمر:” هههههههههههههه هذي سوالفهم عمرها مابتتغير.”
سحر بملل من سوالف بدور:” سمر وش كنا نتكلم فيه من شوي؟”
سمر:” ولاشي كنا نتكلم عن جيتج البيت.”
بدور:” اي صج سحر ليش ماتيين بيت يدي من سافر خالي محمد؟”
سحر انقهرت من سؤالها بس حاولت تبين طبيعية وحبت تقهرها بعد شوي:” لامن قال جذي، بس مشاغل الجامعه وامتحاناتنا غير عن المدارس.”
سمر واللي استدركت الموضوع:” لاياسحر هم بعد لاتنسين عندهم اكثر من مادة وامتحاناتهم بدت واحنا بعدنا هذا الاسبوع.”
سحر انقهرت زود منها:” حبيبتي مهما كان موادهم اسهل من الجامعه.”
بدور وحبت تغير السالفة:” سمووورة متى بيرجع خالي من السفر؟”
سحر استانست من سؤال بدور بس خاب املها لما سمعت الجواب..
سمر:” مدري اخوي احمد اكيد يعرف متى بيرجع.”
بدور:” والله وحشنا خالي، ان شاءالله يرجع بالسلامة.”
سمر:” الله يسمع منج.”
وبين ماهم يسولفون، سمعوا جرس الباب يدق، وقامت خلود تشوف منو بالباب.. وكان اخوها سيف يبي يدخل علشان بروح غرفته..وبعد ماتغطوا دخل.
سيف:” السلام عليكم.. شخبارج خالتي؟”
ام فيصل:” وعليكم السلام، هلا وغلا انا بخير الحمدلله، انت شخبارك؟ وش مسوي ويا الدراسة؟”
سيف:” تمام الحمدلله، وهذا احنا ياخالتي ليل ونهار مجودين هالكتب وناكل فيهم.”
بدور:” ههههههههههههه خالي وش اللي تاكلة بالضبط منهم.”
سيف:” اكل كل شي، الحروف الارقام.”
ام فيصل:”الله يوفقك ان شاءالله ويسهل عليكم الامتحانات.”
ام محمد:” الله يسمع منج.”
سيف:” ان شاءالله..، اووووه سحر هني!! شخبارج؟”
سحر:” بخير الحمدلله، وش اخبارك انت؟”
سيف مايحب سحر وايد، ويحب يقهرها اكثر:” والله توج سامعه اخباري.” قال لها هالجملة وراح فوق. سحر انقهرت من تصرفة هذا وعصبت..
سحر:” سمر انتي لازم توقفين اخوج عند حده شفتيه شلون يعاملني كاني وحده من الشارع.”
سمر:” مكرمة حبيبتي، انتي تعرفينة اسلوبه وان شاءالله بقول له لاتكدرين خاطرج.”
سحروبتافف: “زيييييييين بنشوف وش بتسوين.”

^^^^^^^^^^^^^^^^^^^^^^^^
فيصل وهو ينادي نجود:” يالله عجلي شوي، صلاة العشاء فاتتني وانتي للحين ماجهزتي.”
نجود:”الحين…. لحظة، وهذا انا جهزت.”
فيصل يطالعها بابتسامة:”…….
نجود:” شفيك اطالعني جذي اول مرة تشوفني.!”
فيصل وبهبل شوي:”هااا..لا بس صايرة حلووووة.”
نجود حست ان وجهها بدت الوانه تتغير:” اقوووول فيصل الصلااااااة.”
فيصل:” اي الحين الحين مشينا.”
بالسيارة وهم رايحين بيت ابوها..
نجود:” حبيبي.”
فيصل واللي يذوووب وهويسمعها منها:”هلا حبيبتي امري.”
نجود:”انت اليوم زرت خالتي؟”
فيصل:”اي ليش تسالين؟”
نجود:” ولاشي بس مجرد سؤال.”
فيصل واللي مستغرب من سؤالها:” انتي عادة ماتساليني، في خاطرج شي تبين تقولينه؟”
نجود:” صدقني مافي شي بس مجرد سؤال خطر على بالي لااكثر.”
وظلوا ساكتين لين ماوصلوا بيت ابوها..قال فيصل:” يالله انا بروح اصلي.. وراد لج بعدين.”
نجود:” يعني مابتنزل تسلم على امي؟”
فيصل:” بعدين لين رجعت، وابوج واخوانج اكيد بلقاهم بالجامع.”
نجود:” زين انتبه لنفسك.”
فيصل وهو يطالعها بلمحة حزن:” نفسي عندج.”
ومشت السيارة وظلت واقفة مكانها اطالعه وهو رايح، وظلت تفكر فيه وفي الحال اللي هم فيها. وبعد خمس دقايق انتبهت لنفسها ودخلت البيت..
نجود وهي فاتحة الباب وبابتسامة عريضة:” السلاااااااااااام عليكم.”
وردوا عليها كلهم:” وعليكم السلام والرحمة.”
وقاموا خلود والعنود من مكانهم وراحوا يحضنونها لانهم من زماااان ماشافوها، وثنتينهم يحبونها لانها تقعد دوووم وياهم وتسولف. غير عن سمر وسحر وبدور اللي يطردونهم ومايخلونهم يسمعون سوالفهم.

^^^^^^^^^^^^^^^^^^^^^^^^
كانت قاعده على الكنبة اللي بالصالة، تنتظر ابوعبدالله يرجع من بره، والبنات كانت كل وحده فيهم بغرفتها ولاهيه بنفسها، وعبدالله اخر العنقود كان يلعب كرة بالحوش اللي بره، وبعد ربع ساعه وصل ابوعبدالله.
ام عبدالله:” هلا ابوعبدالله.”
ابوعبدالله واللي كان صاحي ذاك الوقت، وللحين مابدى دوااامة بالسهر:” اشوفج اليوم مسوية لي استقبال، مو من عوايدج.”
ام عبدالله:” وش دعوة يابوعبدالله ،كل يوم انا استقبلك بس انت اللي ماتخلي بالك.”
ابوعبدالله:” اي اي..” وقعدعلى الكرسي وهو يطالع الساعه ويتافف .
ام عبدالله:” ابوعبدالله ابيك بكلمة راس.”
ابوعبدالله:” انا قلت هالاستقبال وراه شي.”
ام عبدالله:” انت تعال الغرفة واعلمك السالفة.”
وبعد ماركبوا فوق ودخلوا غرفتهم،سكرت ام عبدالله الباب وقعدت على الكرسي وبعد تردد وتفكير:” ابوعبدالله والله مدري اشلون ابدا الموضوع و….”
قاطعها:” ابداي وخلصيني..”
ام عبدالله وبدون مقدمات:” ابيك ترد شوق المدرسة”
انتبه لها وعيونه يطلع منها شرار، وبصوته الاجش:” شنووو شنوووو عيدي وش قلتي.”
ام عبدالله:” مثل ماسمعت، لازم تردها المدرسة.”
ابوعبدالله:” انا كلمتي وحده وما اتراجع فيها.”
ام عبدالله:” لازم تتراجع والا بتسبب لنا مشاكل.”
ابوعبدالله:” شلون يعني مافهمت؟”
ام عبدالله وهي قايمة من على كرسيها ورايحه يمه:” البنت وراها سند يناخف منهم، واليوم اذا سكتوا بكرة لا، وانت تعرف من اقصد بالضبط.”
ابوعبدالله:” وخلهم يسون اللي يسونه، هذي بنتي وانا حر فيها.”
ام عبدالله:” ومصلحتنا احنا؟”
ابوعبدالله باستغراب:” مافهمت؟”
ام عبدالله:” البنت يمكن يجينا من وراها خير، ولاتنسى انها قريبتهم واكيد مابقصرون عليها بشي لو احتاجت، واحنا نقدر نستفيد منها.”
ابوعبدالله ظل ساكت ويفكر:”……..
ام عبدالله:”ام مازن درت انك طلعتها من المدرسة،وخفت انها تقول لامها والااحد من اهلها،وتصير مشكلة احنا في غنى عنها،عاد انا قلت انردها المدرسة ويصيرخير اذا خلصت السنة.”
ابوعبدالله وفي حيرة من امره:” مدري خليني افكر.”
ام عبدالله:” مايحتاج تفكر ردها المدرسة ومابتخسر انت طيعني.”
ابوعبدالله محتار وموعارف شنو يقول لها، وظل يقلب الافكار براسة لين ماقال لها:”زين لنفرض انا رجعتها المدرسة وخلصت دراستها وقالوا لي بعدين لازم تكمل دراستها بالجامعه وش اسوي انا بعدين؟؟ واخاف اذا ماخليتها يعفسون الدنيا فوق راسي.”
ام عبدالله:”انا اقووول لك ردها احسن وبس تخلص المدرسة زوجها وافتك منها،بس انا اقوول الحين لازم ترجعها، ومن الحين لين ماتخلص دراستها بينسونها وينسون السالفة اكيد.”
ابوعبدالله واللي موواثق من قراره:” والله مدري محتار،بس تدرين سوي اللي يعجبج.”
ام عبدالله والفرحة مو واسعتها:” هذا الكلااام السنع.”

^^^^^^^^^^^^^^^^^^^^^^^^
شوق:” الباب مفتوح.”
هديل دخلت بعد مادقت الباب:” شوق سمعتي اخر الاخبار؟”
شوق:”مايهمني.”
هديل وهي ترفع راسها وتسالها:” ليش تقولين جذي؟ انتي بس لو تعرفين شنو الخبر.”
شوق بعد ما باعدت راسها:” الاخبار كلها مثل بعض ماتفرق عندي.”
هديل واللي ماياست من اناه تفرحهاوتجذب انتباها:” امممم واذا قلت لج هذا خبر غير، تعطيني جم؟”
شوق واللي صار عندها شوية فضول:” اللي تبين.”
هديل:” اكييييييييييد.؟”
شوق:” اي اكيد، بس انتي قولي هالخبر الغير على قولتج.”
هديل وقفت مقابلها وقالت:” قررت وزارة المنزل اعادة شوق للمدرسة.”
شوق ماصدقت الكلام اللي سمعته من اختها:” ماااصادق، انتي اكيد تمزحين.”
هديل:” صدقييييييييني توني الحين سامعه امي تكلم ام مازن على جوالها وتقول لها بكرة بترجعين المدرسة.”
شوق:” والله مومصدقة حاسة ان الارض مو شايلتني من الفرحة، الله ياهديل لوتعرفين شلون انزاح هالهم واشلون ارتحت.”
هديل:” الله يجعل ايامج كلها فرح، بس الظاهر بعض الناس نسو انهم يعطوني اللي ابي.”
شوق:” افااااااا عليج انتي تامرين بس.”
هديل:” مايامر عليج عدو، بس ابيج تسوين لي كيك.”
شوق:” بس، من عيوني.”
هديل:” تسلم لي عيونج ان شاءالله.”