شكيت من حظي،،، وخيبتني ظنوني
% الجزء الاول %
اخيرا رجعت لارض الوطن بعد غيبه سنين
ياااه ياني مشتاق لديرتي وهلي واحبابي … رحت وان
كسير.. مجروح ,, ضعيف .. واللحين غير انا صقر سالم ال….
وقف في المطار وعينه فيها لمعه غريبه .. مدري هي
شوق .. الم.ولا شي ثاني وتذكر شلون كان وشلون
غيرته السنين وحولته من مراهق الى رجل شرس يدمر
كل اللي حوله اذا ضاع له حق… وديع مع احبابه
(صقر)
بس هذا المره اخر مره مستحيل اترك ديرتي راح
استقر هنا وابدا بخطتي اللي انتظرتها سنين …
ماجد : هلا والله يامرحبا يامرحبا نورت الديره واهلها
ياشيخ .
صقر بابتسامته المايله واللي يشوفها يقول ان فيها
سخريه: هلا بك زود بوجودك ياماجد
ماجد : وش اخبارك وش مسوي اظن شبعت بما فيه
الكفايه غربه ؟
صقر مسح على شعره الاسود اللي كان طويل شوي :
الحمدلله وتوني اقول بخاطري توبه اهاجر دراسه
وخلصتها واخذت الخبره الكافيه
وش اخبارك انت وش اخبار خالي وهلي كلهم اشتقت
لكم وربي
ماجد : بخير الحمدلله في خير ونعمه ومثل ماوصيت
ترى مايدرون
مسك شنطته وماجد اخذ الشنطه الثانيه يساعده
صقر : هههه اكيد ماراح يصدقون لما يشوفوني قدامهم
وهو يتخيل شكل امه اللي يحس انه كل ماكبر احتاج
لحنانها اكثر واكثر ,,
ناظر في ماجد وابتسامته مازالت راسمه على فمه : الا
وش اخبارك مع كورتك المتحركه ؟
ماجد رفع عينه وهي يدخل الشناط السياره : هههه اذا
بايع عمرك تكلم عندها وقول اللي قلته ترى صايره
كبريت ماقول كلمه الا وتمد بوزها .. ياخي الحريم غريبين بكل شي
صقر : لا ياخوي تراك ناسي اللي تتكلم عنها …
اصحى يالحبيب هذي العنود اختي مو اي وحده
ماجد : وانا اشهد هذي العنود حبيبه قلبي وتدري اني لو
ماخذتها كان صابني شي ؟
ماجد اغلى اصدقاء صقر تؤمه هو صديق بمعنى الكلمه
وغير كذا ولد خاله… وزوج اخته العنود .. هم نفس
العمر 30 سنه واكبر عيال خاله ( صالح )وله معزه
لانه كان صاين هله وقت غيبته ماقصر عليهم باي شي
نروح لبيت ابو صقر ( سالم )
ابو صقر متوفي من زمان .. ام صقر (غاليه) مره
عاقله وحنونه وبكرها صقر بالرغم من معالم وجهها
اللي غطتها تجاعيد تعب الفراق اولها زوجها وتاليها ولدها الا ان الجمال مازال يظهر فيها
( صقر ) 30 سنه .. رجل عصامي .. ذكي.. غامض..
وغير هذا كله درس برا وحصل على شهادات عاليه
واشتغل فتره في شركه اجنبيه واخذ خبرات من دراسته
وتجربته في الشركه كان لها فوائد بالنسبه له. كان من
الصعب التنازل عن صقر لدرجه ان راعي الشركه
حاول معه كذا مره انه يستقر ويزيد راتبه بس صقر
تعب غربه واخذ اللي يبيه من خبرات وقرر يرجع ..
راح تبان باقي شخصيته مع الاحداث الجايه ^_^
( العنود ) 25 سنه . مدرسه انجليزي ، انسانه حبوبه
وطيبه حيل تملك من الجمال الكثير وهي زوجة ماجد
وعندها ولد اسمه ( طارق ) وهي حامل في الشهر الخامس
( الجازي ) 20 سنه تدرس في الجامعه وتخصصها
احياء …تعشق تخصصها اختارته عن قناعه .. مايظهر
هذا الحب الا وقت الامتحانات .. جمالها بدوي مره ..
مرحه .. تعيش يومها وماتفكر في بكره .. يعني
باختصار ماخذه الدنيا بسهوله وبايعتها
الجازي : يمه تعالي فديتك شاعر المليون جا
ام صقر : من متى ؟ لايكون راحت علي ترى مايصير
لك طيب
انا قلتلك اتركي عنك الاغاني والكلام الفاضي
الجازي : بسم الله عليك يمه اقولك تو مبتدي هذا هو
شوفي توه يرحب المذيع والله قمت اشك انك ترسلين
وتصوتين لهم ههه
العنود : يالجازي ممكن تسكتين قبل اشيل الصينيه فوق
راسك .. ماني ناقصتك ترى طارق غصب نام وريحني
الجازي : ياساتر كل ذا عشان ولد العم مشارك فيه ؟؟
ام صقر عطتها نظره حاده سكتتها ,
الجازي :هه سكت وحطت يدها على فمها وناظرت
التلفزيون بصمت
وابدت الحلقه ودخل اللي كانوا ينتظرونه جراح ناصر
ال….
الجازي هذا جراح ماصدق عندي ولد عم جرح على
اسمه ههه صدق ياويل حالي من البنات اللي متسدحين
عليه اثره كذا وانا مادري ؟؟؟
ام صقر : ماشاء الله عليه والله انه يذكرني بخوكم فديته
نفس رزته
ومسحت دمعه شوق نزلت على خدها
صقر : من هذا اللي يشبهني ؟؟؟؟؟
التفت امه على الصوت ماهي مصدقه .. والجازي
بسرعه وقفت العنود ظلت جالسه منصدمه وتفرك عيونها !!
ام صقر : صقر ؟؟ وجلست تصيح وتضمه بقوووه
العنود قامت بصعوبه ومسكت امها وباست اخوها
وضمته وهي تبكي وتمسح على كتفه
الجازي بعبره وبروحها المرحه : خلاص لو سمحتوا
مانتهى المسلسل حقكم
والكل ضحك عليها ، وهي اركضت على اخوها
وضمته وسلمت عليه بشوق اي هذا اخوها الكبير مو
بس اخو بالنسبه للجازي هو ابوها اللي راح كان هذا
كله يدور في بالها وماحست الا بيد صقر يمسح خدها بحنان
صقر بابتسامه: من اللي سوى فلم هندي الحين؟
العنود : والله لعيونك نسوي اكشن لو تبي
ام صقر جلست ولدها : ها ياولدي وش حالك؟ وش
هذي المفاجاه ؟
من اللي جابك؟
صقر ضرب راسه : يوووه نسيت الرجال برا !!
يالجازي روحي البسي جلالك ترى ماجد مسكين لطعته
بالحديقه
الجازي : ان شاء الله وراحت غرفتها تلبس
العنود بغيض: انا اوريه النذل اجل هو عارف وساكت
سويتوها علينا ياثنين!!؟؟
صقر: ههههه طيب شوفي شغلك اليوم وريني وش
بتسوين ؟
العنود بحياء : طيب بروح اناديه
صقر : لا اجلسي انتي يالله تقومين اروح اناديه انا
/
/
/
/
الريم : يالله على اخوي يهبل ياربي خله لنا
ام جراح : بسم الله على اخوك الله يحميه من عين
الحاسدين ماكانهم اخروه ياليته الاول
الريم : يمه الله يهداك وش الفرق هو الثالث دوره بعد
العماني شوي وبيجي يلقى درر شعره ههه
ام جراح : انتي سجلتي الحلقه ترى ابوك يبي يشوفها؟
الريم : اي اي يمه وراكان قالي بعد لانه في النادي
مايقدر يشوفها
ام جراح : سبحان الله كان جراح وصقر تؤم باشكالهم
بس ماندري وش صار على صقر وش سوت به غربته
والله من يوم توفى عمك وهو ماينعرف له
تصدقين يابيتي كاسره خاطري امه اكثر من تسع السنين
متغرب ويالله يجيهم بالقطاره مدري وش لقى في بلاد
الكفار ؟
الريم : الله يرجعه لهم سالم عاد يمه نفسي اعرف ليه
مانزورهم كثير ؟ مادري ليه القطيعه؟
ام جراح : يابنتي ماقطعنا بس مشاكل وان شاء الله قدوم
صقر خير لنا
الريم : يمه الله يهداك مابعد شفت الجازي الا قبل ثلاث
السنين والعنود لولا انها معلمه في مدرستنا ماكان
عرفتها اما ولد عمي اللي يقاله صقر لو يمر من جنبي ماعرفته
- شكيت من حظي وخيبتني ظنوني
- رواية شكيت حظى
- رواية شكيت من حضي وخيبتني ضنوني
- رواية شكيت من حظي وخيبتني ظنوني الارشيف
- شكيت من حظي وخيبتني ظنوني البارت التاسع عشر
