“فهد المساعد” ينثر درر الكلمات في “قصيدة الاسرار”
اصايل- شعر:
شاعر متمكن ينثر درر الكلمات وكانها عقد منفرط، المساعد يكره في كتاباته جمود الكلمة ورتابتها فهو يحرك المشاعر بتهادي قصائده العذبة، وفي قصيدة الاسرار يسابق ابداعه ليفند كل ما قيل فيها من احاسيس.
يا رفيف الماء.. وفجر العيد.. واحزان المواني
يا اكثر اهل الارض طيبة قلب.. واسرار دفينه
المكان اللي هنا .. مليان ضحكات، واغاني
والكلام اللي بغيت اقول.. يحتاج ل سكينه!
شوفي الركن البعيد هناك.. كنه صدر حاني
هذا هو اللي يليق ب شاعر وبنت حزينه!
انسي الشارع، وعتمات الزوايا، والمباني
هاتي يدينك نلف الغيم ونشكل مدينه!
عندي الليلة كلام وصمت.. واخاف الثواني
تظلمه.. او تظلم اللي فيه كم ضاعت سنينه
بس لازم تسمعين اللي ابي ولا تراني
لو ب اعيده لك.. نسيت.. ورحت اقول اللي تبينه
شي واحد قبل ما ابدا.. ما ابي اي شي ثاني
يخطر ف بالك.. وانا اكشف لك شعور تجهلينه!
ان انا.. وبكل ما تحمله «احبك» من معاني
كنت، وراح ابقى احبك.. لين.. مدري وش هو لينه!
بس والله ما قدرت انسى.. ولا همي نساني
لا ذكرت انسان.. فيه اسرار ما بينك وبينه
كل ما تطري علي فكرة هواك الاولاني
اشعر اني انطعن مليون مره من يدينه!
اشعر ان عيونك.. الله ما خلقها الا عشاني
كيف كانت تبتسم له؟!.. قولي انك تخدعينه!
صورة انه كان يمسح دمعك.. تزلزل كياني
وكيف كان يلم شعرك.. ويتبعثر في يمينه
حتى اسمك يوم رحت ادلله.. حظي رماني..
بنفس الاسم اللي يقول .. بذمتك ماهي غبينه!؟
وكني اللي .. كل ما اناديك بالاسم الفلاني
اطلب النسيان .. يترك منه شي تذكرينه!
لا تظنيني اناني.. لا.. انا مانيب اناني
لو سلمت من الغرق. ب اموت في ظهر السفينه!
يا اني ما اكمل واعاني .. او اكمل ثم اعاني..
كل ما اسمع طاري اسمه.. او تجي عيني في عينه!
اينا كان الضحيه؟.. واينا اللي كان جاني؟
مدري!.. ولكن قراري لازم انك تقبلينه:
مثل ما اكره فكرة انه واحد ياخذ مكاني
ما اقدر اجلس في مكان انسان.. كنتي تعشقينه
