قصيدة الخيانة

الخيانة تلك الكلمة الجبانة التي تجعل الانسان يشعر بالاهانة عندما يضحي الشخص من اجل غيره، ويلقى منه بالمقابل الجحود والنكران، فالخيانة اصعب الكلمات في الوجود، وتحمل في طياتها اسى ليس له حدود، لذلك اخترنا لكم في هذا المقال بعض الابيات الشعرية التي تتحدث عن الخيانة

قصيدة تخونيني – للشاعر حامد زيد

تخونين وتبين ارضى؟ واحد يرضى تخونينه

انا لا جيت اخونك مع حبيبة ثانية ترضين

من اول ما رجعت من السفر ما شفت لك بينه

وانا اللي كنت احسبك قبل ادوس ارض المطار تجين

تكونين انت اول شخص عيني تحتضن عينه

وكنت اتخيلك من زود فرحه رجعتي تبكين

واشوف بدمعتك حكيك واعرف قبل تحكينه

واجيب احلى من اللي بتحكينه واتركك تحكين

تقولين: الوطن نور واقول: بنور مضوينه

تقولي لي: غديت احلى واقول: عيونك الحلوين

كلام نام بشفاهك، وخفتي لا تصحينه

ذخرتيه لغرام اللي ينام ويتركك تصحين

تغانمتي غيابي، لين رجحتي موازينه

تعلم من يدك لمس الكفوف وعلمك تجفين

وليتك لاقية به شي فيني ما تلاقينه

مهو بغرور لكن خابرك مالك امل تلقين

تغافلك بغلا والا الحلا مهو بمن زينه!!

تزينه الصور بس الصحيح ابن الحلال زوين

وانا ماني بناقص عنه يوم انك تبدينه

نصيبي هو نصيبي لو يسددها من الصوبين

قنوع بمظهري والسم ما يذبح ثعابينه

على قول المثل (ماني حلو لكني ماني شين)

اذا اهداك الزهر مرة فانا اهديتك بساتينه

واذا الهاك بفرح ليلة فانا تهت لبكاك سنين

واذا استضعفتك املاكه وشتتك ملايينه

انا حتى فتات الخبزة اقسمها معك نصين

طموحي، بس اجي واظفر بشي تستحقينه

تدينته، تسلفته، سرقته، مو مهم منين؟

كاني من كثر ما ارضى بكل اللي تمنينه

لو انك تطلبين الله يعنيني، بقول: امين!

انا ما العب على الحبلين، وقت الطيش وسنينه

تبين الحين يوم اني كبرت العب على الحبلين

ترى عند الحضر بالذات (عيب اللي تسوينه)!!

حلاتك لا عشقتيني تعشقيني ليوم الدين

غرام نسكن ضلوعه حشيمة من مجانينه

جفا يجمع معزتنا ولا عشق يذل اثنين

كثار اللي تحدوني وقالوا لي: تحبينه

امانة لا تخليني صغير بعينهم ( تكفين)!!

لاني كل ما قالوا (تخون) اقول: مسكينة

عليك الله وامانة علميهم من هو المسكين

انا خايف (لي طاح الجمل تكثر سكاكينه)

وانا ما عاد بضلوعي مكان لطعنة السكين

مثل ما قالوا: (المكتوب واضح من عناوينه)

لو ارحل منك للغربة باسافر من ظلامك وين؟

كفاية كل حلم يمر برقادي تزورينه

كفاية من تفارقنا وانا ما غمضت لي عين

قبل يومين شفتك بالمنام وقمت من حينه

ونمت امس ورجع نفس المنام اللي قبل يومين

ابيات مؤثرة عن الخيانة

لا ردك الله لا ولا اطلب تردين

ادعي عليك بعثرة في صلاتي

عثرة تشلك ما بعدها تقومين

يا قاتلتني يوم صرتي حياتي

خدان لك بالقلب كانت بساتين

وريضان وغصونا بها يا نعاتي

كنت مناة القلب والروح والعين

واليوم عينك يعلها ما تباتي

كنت احسبك للعهد والحب توفين

قلتي الغدر بالحب ما هي بسواتي

وحلفتي يمين الله ما منك اثنتين

وانك ملاك دون كل البنات

وانك على عهد المودة تسيرين

ولا تسمعين اهل الحسد والوشاتي

وصار اليمين ستار خلفه توارين

ورماح غدرك بالخفا مشرعاتي

وبان الغدر سم جرى بالشرايين

الله عسى يسقيك سم الفعاتي  

كلي سقيتك حب واليوم تنسين

تقولين حلم ايام واليوم فاتي

خذتي الهوى لعبة على ما تحبين

لين عصفت بالهوى عاصفاتي

من زينك يا بنت بالشعر تزيين

من صورك بابياته الطايلاتي  

انا من غرامي قلت كانك تذكرين

قلت الخجل صاب البدر من مناتي

وصرتي بشعري في العذاري تباهين

تقولين انا شمس العصر في حلاتي

زينتك بشعري ولا غربك الزين

ما زانتك صبغات حمر الشفاتي

صورتك بالشعر حزام ورياحين

واثرك هضاب وشوك ما به هداتي

رسمتك سحابة خير قطر تنفين

فزت لك الصحراء زهور ونباتي

رسمتك مهاه للجميلة تقودين

واثرك قطيعة وضيعتها الرعاتي

واثرك غراب يوم سدل الجناحين

كنت احسب اني شايف لي قطاتي

بالشعر غليتك على كل غاليين

واثرك دنية وتعشقين الدناتي

وبالشعر عاتبتك عتاب المحبين

انا من يسوم الروح لك يا غناتي

توسلت لك خايف على حب عامين

عامين لكن في حسابي مئاتي

ناديت لكن لي ابد ما تسمعين

عمري وروحي فكري في ثباتي

حذراك للشينات عمري تماشين

عديمات اصل اخلاقهن دانياتي

غاب الولي عنهن ولعبن بحبلين

يا خس واليهن وخس الولاتي

ما همهن في الناس زين ولا شين

وقلوبهن من حقدهن مظلماتي

وقلتي وربك لو يكونا ملايين

ما غيرن بالطباعهن من سماتي

تحسبين انك بالمهافة ترقين

كيف الصعود يكون للهاوياتي

وخنتي وبعتي كل عهد وايامين

ما عاد يفرق بين ماضي واتي

وصرتي مثل غيرك برخص تبيعين

يا مرخصتني ما بقى لك غلاتي

صبري نفذ واليوم ثارت براكين

مظلوم انا وباكر تحل دعواتي

سمعي عسى من بعدها ما تسمعين

سمعي دعا من صار قلبه حصاتي

ادعي عسى من ناضرك ما تشوفين

وتطحن بك الايام طحن الرحاتي

وعساك عوق منه ما عاد تبرين

عوق تشافق له قلوب العداتي

ويالله عسى يحتار فيك المداوين

تبين الممات ولا يجيك المماتي

ويالله عسى كف الندامة تعضين

تندمين يوم انه يفوت الفواتي

وتبكين دم يسيل من مقلة العين

وتحتار امك عن عناك وتحاتي

عسى ما تلاقي من له القلب تهدين

وان حصل ادعي عساك الشتاتي

يا بلوة اللي وسط بيته تعيشين

ساهي وحوله شب جمر الغضاتي

عسى بعمرك ساعه ما تهنين

وتمضي حياتك بين هم وشقاتي

يا بنت قلبي وين مثله تلاقين

قلبا عطاك الحب ما قال هاتي

جيتك وروحي شلتها لك بكفين

وفي التالية رمح الخيانة جزاتي  

يالله عساك النار يا ام وجهين

كله انكشف لا ما تفيد العباتي  

ويالله عسى تلبسك جن وشياطين

وتكونين مدعاة الحكي والشماتي

يا حية رقطا تقود الثعابين

باكر تحن ايامك المعتماتي  

وباكر على فعلك بمثله تجازين

ظلم المشاعر ما تحكمه قضاتي

بيني وبينك تحكم ايام وسنين

وانا شاهدي قلبا من الغدر ماتي

ويا دمعة التمساح لا لا تذرفين

العيون رغم دموعها كاذباتي

لا ما عرفتي الحب لا ما تحسين

وغدرك تعدى غدر ذيب الفلاتي

الذيب يعوي قبل يغدر بمسكين

وانت غدرتي خافقي في سباتي

لو كان غدرك في كفوف الموازين

لكان رجح كل غدر البناتي

انت السبب سقتي على القلب

جرحين غدر الغرام وموجع الذكريات

وانت السبب واليوم لا لا تلومين

وان جاك باكر شوفي اشلون ياتي

والله لاكتب وافضحك في دواوين

وارقص واغني يوم خبر الوفاتي

وارسم لاهل العشق قلبا وسهمين

وقصة خيانة ما روتها الرواتي  

ويمين لانشر فوق اسمك عناوين

واشهرك من قاصي اليمن للفراتي

ومن غرب هالدنيا الى قاصي الصين

ديوان غدر فيه كل اللغات

والبادي اظلم سنة العين بالعين

والا فذي لا عادتي ولا صفاتي

ويا شبه انسانة براس ورجلين

اعوذ بالرحمن منكبصلاتي

• قصيدة الحلا بالقلب
• قصيدة عن الخيانة
• قصيده الخيانه