مرات يزهى خاطري ومكنوني
ومرات يا نفسى عليا تهوني
مرات نبقى طارب
ومرات نبدى في الدموع نوارب
ومرات ندوي كيف خمرة شارب
ومرات هلبة دمعتي في عيوني
مرات يزهى خاطري ومكنوني
ومرات يا نفسي عليا تهوني
مرات نفرح يوم
ومرات شهر يفوت كله هموم
ومرات نعذر من جرحني دوم
ومرات نشري اللي فكروا يبيعوني
مرات يزهى خاطري ومكنوني
ومرات يا نفسي عليا تهوني
مرات نبدى واهم
ومرات نبي عالجروح مراهم
ومرات يبدى الجرح من يالاهم
ومرات يجرحوا في الجرح ويلوموني
مرات يزهى خاطري ومكنوني
ومرات يا نفسي عليا تهوني
مرات نبقى واعي
ومرات نرقد كيف نوم الراعي
ومرات نبدى للمودة ساعي
ومرات هلبة في العزا ما جوني
بقلم :- عصام حمزة
- مرات اجمل
- مرات يزهى خاطري
