…((يا عيونه بس يكفيني عذاب))…
الجزء الاول…
…….:شذى حبيبتي في ناس خطبوك من ابوك…
شذى وهي مستغربه: هلا يمه شتقولين في ناس خطبوني؟
ام محمد وهي تناظر بنتها الوحيده:ايه خطبوك وينتظرون الرد عشان يجون يخطبون رسمي..
شذى بفضول : مين هم…انا اعرفهم ؟
ام محمد: لا ما تعرفينهم…ولا انا اعرفهم بعد؟
شذى: اذا انا ولا انت نعرفهم مين يعرفهم؟
ام محمد : خالد اخوك يعرف المعرس…
شذى وهي تناظر امها: مرة وحده معرس زين يمكن ما اوافق…يا خوفي بس يطلع زي راكان اللي قبله ما يعرف…
امها تقاطعها: اخوك خالد يمدح فيه ويقول مثله ما ينرد…
شذى: يعني بس خالد يعرفه…..
امها وكانها تذكرت حاجة: انت بعد تعرفين خالته اخت امه…
شذى باندهاش: خالته اعرفها انا ؟ من تقصدين يمه ؟
امها وهي تبتسم: فكري …تتوقعينها مين؟
شذى وهي محتارة: مين من الجيران او من اصدقاء العيلة؟؟
امها: ما حزرت….و باقولك حاجة ترى اهل المعرس مو من الشرقيه؟
شذى واندهاشها زاد: مو من الشرقية…وانا اعرف خالته واخوي خالد يعرف مرس الغفلة…ومثلة ما ينرد…..يمه خلاص
تراني خلاص وصلت حدي قولي لي مين وماله داعي هالفوازير اللي انت مسويتها..
امها: اوكيه بقولك…
تقاطعها شذى بضحتكتها الرنانة: هههههههههه احلى يمه اوكيه هذي من وين جابيتها….والله الوالده حركات..اوكية..بكرة
ايش رح تقولين…تشاو…ههههههههههههه
ام محمد : تضحكين على امك هاه؟ زين يا شذى موتي بفضولك نامي الليلة بدون ما تعرفين عريس الغفلة على قولتك…
شذى وهي تحاول تكتم ضحكتها : خلاص يمه والله اسفه بس بالله من اللي علمك عليها اكيد سعود ما غيره صح
ام محمد: ماني بقايله زين…
شذى قامت وحبت فوق راس امها : خلاص السموحة يمة بس قولي لي من المعرس تكفين يمة الله يخليك الله يوفقك الله ي….
ام محمد تقاطعها: خلاص زين زين باقول عاد انتي تلصقين بالواحد الين يقولك….
شذى: زين مين المعرس؟؟؟
ام محمد: خالته تراها معيدة بالكلية عندك بقسم لغة عربية؟؟
شذى والفضول ذابحها: بالله عندي بالكليه وبقسمي بعد مين هذي؟
ام محمد:اسمها عبير…عرفتيها؟
شذى والبسمة شاقتها: من جد ونااااسة الصراحة اذا هو على خالته رح يكون جنتلمان…
ام محمد باستغراب: وش جنتلمانه انتي وخشتك؟
شذى وهي مبسوطة:ما عليك مني…زين اذا هو مش من الشرقيه اجل من وين؟
ام محمد: من الرياض…
شذى وهي تناظر امها: من الرياض…وجا الشرقية يخطبني…ليه خلصو بنات الرياض عشان يدور برا…
ام محمد:يقول لاخوك خالد احنا ندور على العرق الطيب…
شذى: اوكيه يمه قولي لي عنه نبذه مبسطة و موجزة اكيد خالد قال لك شي عنه لو بسيط؟؟
ام محمد: خالد يقول ان اسمه تركي وهو ضابط وان عايلته مشالله عليها ناس معروفين بسمعتهم الطيبة ويقول ان ابوه واخوه
الكبير يشتغلون في التجارة وعندهم خير…
شذى وهي تبتسم: ضابط يمه انت تتكلمين من جد؟
ام محمد: تعرفيني يا شذى انا ما احب المزح في امور الجد اللي زي كذا
شذى:زين اسفه يمه…كملي
ام محمد: بس هذا اهم ما قاللي اخوك…
شذى بضيق: شوفي يمه قولي لي حتى الفتافيت اللي قالها السيد خالد زين ؟؟
ام محمد: اوفففف زين بقولك…يقول ان تركي هذا جاء الشرقيه في دورة مدة ستة شهور وخالد خويه يوسف تعرفين في
العسكريه بعد…يوم جا تركي دورته العسكريه كان يوسف معه اللي صار ان يوسف عزم تركي كذا مرة ونادى خالد
اخوك….يقول عنه رجل والنعم فيه ما في مثله اثنين
شذى وهي تناظر امها بنص عين:كذا عزيمة تخلي تركي هذا…يخطب اخت خالد اللي شافه مرات معدودة هاه؟..
ام محمد وهي تضرب بنتها بخفه على كتفها: يا النبيهه توني اقولك خالته عندك بالكليه اكيد سالها عنك ومدحتك له(واخذت ام
محمد تمسح على شعر بنتها) والله وكبرتي يا شذى وبنزوجك…
شذى وهي تبتسم لامها:اكيد باكبر يا يمه مثل الناس…يعني تبيني اصغر مثلا؟…بس يمة كيف عرف تركي اني انا اخت خالد
ادرس عند خالته هاه؟
ام محمد: خالته هذي عبير كلمتني وهي اصلا اللي دلته علينا بس لقاء تركي بخالد كان صدفة…
شذى: يمه توك تقولين ما اعرفهم…
ام محمد: والله ما اعرفهم هي كلمتني وعرفتني بنفسها و قالت لي الموضوع وخالد كلمه تركي وينتظرون الرد عشان زي ما
قلتلك…
شذى: ارد على واحد ما اعرفه الله يهداك يمه….
ام محمد: اخوك يمدحه وانتي توك تمدحين خالته…
تقاطعها شذى : بس هذا ما يكفي يمه لازم نشوفهم ونسال عنهم زين وبعد كذا لكل حادث حديث…
ام محمد:خلاص يعني انتي ما عندك اعتراض للحين؟
شذى:اعترض على ايش؟؟
ام محمد: يعني يا حبيبتي انتي مو معترضة(وبغت شذى تقاطعها) اسمعيني للاخر خليهم يجون ونشوفهم وبعدها نسال عنهم
اذا طلعوا اهل خير الله يحييهم واذا كان غير كذا ننهي الموضوع من اوله ولا كانه صار شي..
اعجبت شذى براي امها: يمشي اللي تقولينه يام محمد..
ام محمد:الله يحفظك يا شذى ويكتبلك اللي فيه الخير…
وقامت ام محمد عن بنتها وطلعت من غرفة شذى عشان تقول لابو محمد براي بنتهم الوحيده
شذى عمرها 19سنه اصغر وحده في اخوانها وحدانية بين ثلاثة اولاد حلوة مملوحة وهي طويلة وجسمها روعة و يسمونها
البنات باربي من حلاوة جسمها و شعرها لاخر ظهرها حلو وكثيف وناعم وهي بيضاء صافيه تميزها بحة صوتها الناعمة
وهي طيبة وحبوبة و شذى مجنونة بالموضة والاناقة..
اخوانها محمد اكبر واحد عمره 33 يشتغل مساعد طيار بالخطوط السعودية
متزوج مريم ومريم هذي ملقوفة وفيها لعانة احيانا تكون ملكة الطيبة واحيانا العكس
وعندهم بنتين ريم 5سنين و رنا سنتين
ومحمد ومرته ساكن مع اهله بحكم سفره الدائم ما يقدر يخليهم لوحدهم عشان كذا ساكن مع اهله..
خالد 28سنه ثاني واحد متزوج بنت عمه مها وساكن بفيلة جنب اهله وهو يشتغل مهندس بناء
سعود24سنة توه راجع من برا كان يدرس بجامعة اكسفورد ببريطانيا واول مارجع تعين مدير علاقات عامه باهم الشركات
الكبرى بالشرقية هو احلى اخوانه واملحهم بس طبعا بعد شذى…
………………………………………….. …………………………
ام محمد بعد ما طلعت من غرفة شذى كانت بتروح لغرفتها الا شافت رنا بنت محمد طايحة تبكي على الارض…
ام محمد: وش فيها راني تبكي…(وشالتها من الارض)…وش فيك يا رنا تبكين؟
الا تجي مريم وتشيل بنتها من يد ام محمد وتقول وهي معصبة : خالتي ما تشوفينها طايحة على وجهها اكيد بتبكي…
ام محمد : وش فيك معصبة ؟؟
مريم : ما فيني شي بس بنتي طايحة…الا شسالفة الرجال اللي خاطب شذى اسمعكم تتساسرون فيه ولا حد قال لي او افكر
يقولي حتى مها مرة خالد تعرف السالفة وانا اخر من يعلم…
ام محمد تركتها لانها ما تبي مشاكل ومشت عنها وقالت: ما حصل شي واذا صار شي قلنا لك ….
معروف عن مريم اللقافة واللعانة…بس قدام محمد حمامة سلام …الكل منقهر منها حتى شذى بس دايم يوقفونها عند حدها
ومحد يشكي لمحمد منها لانهم شايفينه يحبها ومرتاح معها..
مريم قعدت تاكل بنفسها من القهر لانها ما تعرف شي في السالفة ومنقهرة من محمد زيادة لانه اكيد بيعرف ولا قالها مع انه
زوجته وام عياله..
- رواية ياعيوني بس يكفيني عذاب
- روايه تركي وشذى
- روايع تركي وشذي ارشيف كاملة
- رواية يا عيونه بس يكفيني عذاب
- رواية تركي وشذى
- رواية يا عيونة بس يكفيني عذاب جزء 2 شذى وتركي
- ياعيونه بس يكفيني عذاب شذي وتركي الجزء الثاني
- رواية يا عيونه بس يكفيني عذاب الأرشيف
- رواية يا عيونه بس يكفيني عذاب كاملة الاارشيف
- رواية شذى وتركي
