الا ياهل الغرام الضحك وينه والسعاده وين
عسى الله يقطع الفرقا وساعتها وطرياها
احس بوسط قلبي جرح يشبه طعنت السكين
واحس بوسط كبدي جمرت(ن) تحرق ثناياها
واحس بداخلي ضيقه غريبه كملت يومين
واحس ان الزمن كشر بنابه يوم فرقاها
وانا لوني شكيت الي بقلبي للجبال تلين
وانا لوني شكيته للسحايب نثرت ماها
ترى ماهمني حمل المحبه لو غدى حملين
انا قد الحمول الجايرات وقد بلواها
ولو راحت ضلوعي من سبب حمل الغرام طحين
انا مثل الجبال الراسيه ما اهتز مرساها
صبور ولو يبور الوقت فيني والزمان يشين
حرام اني لاصون اسرار قلبي داخل اخفاها
عليه نذر برقبتي ومني حلف معه يمين
لموت ولادرو من وين ديرتها ومنشاها
ابكتم سرها في وسط قلبي ولويطول البين
وبحفظها عن العدوان والصدقان واحماها
غلاها بالظمير وقدرها الغالي بوسط العين
وانا لولا غلاها ماجفيت الخلق لرضاها
تحملت الجروح ولوعة الفرقا وبعد الزين
احن لشوفها واحزن لطاريها وذكراها
عليه اللوم من شرقي وطنا للحدود الصين
عسى الله مايواخذها بغلطتها ويجزاها
ابا اصبر واتجمل واتحمل فالقسى واللين
واقول الله يوفقها عدد ماسارت اخطاها
انا ليه اتبع المقفين واشحذ رحمة المقفين
وانا من روس قوم(ن) تستر الخله وترفاها
رجال(ن) يخدمون ويحتمون وينصرون الدين
على درب الهدى والخير والفزعات ممشاها
هم اللي يطعمون ويرحمون العاجز المسكين
لهم سيره قديمه من جهل بالعرف يقراها
وعلى سود الليالي والمحبه والفرااق الشين
دعيت الله يعين ويكشف الضيقه ويجلاها
يعني الصابرين اللي على درب الشقاء ماشين
ثلاث اسنين وهموم الزمان تحف ممشاها
قصيدة فيصل بن خلف بن هذال العتيبي
راقت لي فنقلتها
