قصة ماجد وعلياء

مع ماجد وعلياء هنعيش قصه جريئه رومانسيه مشوقه وفيها كوميديا خفيفه
ابطالنا الاساسين / ماجد ( مصمم ازياء شاب فى عمر ال25 ) ,
علياء / ( فتاة نشات فى مؤسسة اولاد السجينات وبعدها انتقلت الاصلاحيه عمرها 22 )
نور/ بنت صاحب مصنع لويكى للملابس الحريمى 23 سنة , رامى / صديق ماجد ( دكتور نفسى 25 سنة )
وشخصيات كتير هتقابلنا ونتعرف اكتر عنها فى القصه من خلال متابعتنا ليها
……………….
الحلقه الاولى
نبداء من جوه المصنع
ماجد : صباح الخير ياشباب , اخباركم ايه ؟ واخبار الشغل المطلوب , خلصتوا التصميم ولالسه ؟!
احد العمال : ايوة يااستاذ ماجد تقدر تشوف كده المقاسات للفستان زى ماالمطلوب ولالا !
ماجد : ايه ده ! ايه اللى انتوا عاملينه ده انا عطيتكم التصميم ومحدد ان يكون كوم الفستان زيادة ربع متر
مين اللى قال تقصروه كده , انتوا بتعملوا شغل من مخكوا ولاايه , مين اللى هبب الزفت ده كده
نور : صباح الخير يااستاذ ماجد مالك ! صوتك عالى على الصبح , خير فى ايه ؟
ماجد : البهوات بيعدلوا التصميم على مزاجهم والمفروض الموديل يجهز النهاردة وهما قاعدين يخترعولى فيه .
نور: طب هدى اعصابك روق كده , بصراحه التصميم عجبنى وحبيت ان يكون موديل للفستان ده ليا انا
وانا اللى امرتهم يعدلوه عشان يليق اكتر لانى هخده ليا والتعديلات هتخليه تحفه فنيه وجسديه
ماجد : بس انا متفق مع رؤف بيه ان هسلمه الفستان عشان الطلبيه .
نور: ولايهمك عادى خالص , بابى وانا هقنعه ومش هيستخسر فى بنته حاجة , اجدعن انت وصمم حاجة جديدة
ماجد : بس دى مش طريقة شغل , ده استهبال انا هنا شغال مش ليكى , وكلامى مع ابوكى لما يشرف
………
ماجد : وده مين كمان اللى بيتصل على الصبح , عاوز ايه ياترى !
رامى :حبيب قلبى , عارف انك فى الشغل , عاوزك باليل ضرورى نتقابل , هستناك بعد مااخلص عيادة
ماجد : طيب , اوك هعدى عليك , يلا سلام
………
السكرتيرة : استاذ ماجد رؤف بيه وصل وطالب يقابلك فى المكتب
ماجد : هو شرف , جاى اهو , ابعتى فنجان قهوة على هناك وياريت تبقى سادة
رؤف بيه :اهلا اهلا بالفنان بتاع مصنعنا , مالك يابطل قافل خلقتك على الصبح ليه ؟
ماجد : اسال بنتك , وتعرف هى عملت ايه ..
رؤف بيه : نور !, مالها تقصد قصة الفستان , ياراجل طنش بنتى الوحيدة ومعنديش الا هيا
وتطلب وتخد اللى يعجبها , مش خسارة فيها
ماجد : بس , دى مش طريقة شغل
رؤف بيه : ياسيدى خليها تخد الفستان بتعديلاتها وتصميمك هنطلعه زى ماهو , عادى ولاتزعل نفسك
ماجد : اللى تشوفه حضرتك , انتوا اصحاب الشغل وانا مجرد مصمم , بعد اذنك هقوم انا
رؤف بيه : ايوة كده , انت عاقل وعقلك كبير يافنان , اتفضل انت لشغلك
…………..
ماجد بعد يوم متعب وممل بالنسبه ليه روح البيت يتغدى ويريح شويه عشان يقابل رامى بالليل زى مااتفقوا
فى الوقت اللى ماجد فى الطريق ورايح لرامى العيادة نشوف حصل ايه ,,
……..
رامى : لسه فى حالات عندك بره ياجابر
جابر : فيه لسه انسه حلوة شبه انجرلينا جوبى , داخله لحضرتك
رامى : انسه وحلوة شبه انجرلينا جوبى .. انجلينا جولى يخرب بيتك , طيب طيب دخلها واما ماجد يجى قله الدكتور مشغول
جابر: اتفضلى حضرتك , الدكتور فى انتظارك
……………….
وخبطت الانسه على الباب وهيا داخله
رامى : ادخل , اهلا وسهلا اهلا بحضرتك اتفضلى ,, غريبه اول مرة تجينى حاله ومتسجلش اسمها
ممكن اعرف اسم حضرتك ايه ؟!!
الانسه : ميرسى لزوقك ,, وايه الغريب , اسمى شيماء
رامى : وياترى قبل مانعرف شكوتك , ندردش شوية نكسر حاجز المريض والمعالج
شيماء : اوك , زى ماتحب
…………
واثناء الحوار بيرن التليفون بتاع رامى ,
رامى : بعد اذنك , ارد على التليفون
بتقول ايه , مين ! مستشفى ايه ؟؟ وحصل ازاى ؟
مسافة السكة وجاى حالا
شيماء : خير في ايه يادكتور ,,,
رامى : ماجد صديقى عمل حادثه ونقلوه للمستشفى ولازم اروح اطمن عليه حالا
شيماء : ان شاءالله خير , انا ممكن اوصلك اتفضل هاجى مع حضرتك
……….
بتقف الحلقه لحد هنا
هنكمل باقى قصتنا,, الحلقات الجايه
متروحوش بعيد اللى جاى احلى فى قصتنا
يارب الحلقه تكون عجبتكم

• قصة ماجد وعلياء
• رواية ماجد وعلياء كاملة
• روايه ماجد وعلياء كامله