طريقة عمل سجادة من بقايا القماش

جبت نص متر من قماش الكنفاه من محل ( كل شئ ب2.50 )

ملحوظه : هتلاقوا منه مربعات واسعه و مربعاته ضيقه هاتوا الواسعه احسن زي اللي في الصوره كده

و بعدين اختاري الخيط اللي عاجبك و اي الوان تحبيها مع بعض وممكن لون واحد انا اخترت الاسود و النبيتي بناءا طلب خطيبي

و جيبي ابره كروشيه رقم 3 و مقص

وشوفي انتي حابه تعملي طول فتله السجاده اد ايه وهاتي كرتونه بالعرض اللي يناسبك انا جبت ورقه كوتشينه و ممكن تحتاجي توك شعر عشان تعرفي تشتغلي بس مش تضحكوا ع موضوع التوك ديه لانكم لوعملتوا السجاده هتفهموا قصدي

و ديه كل الادوات مع بعض

ثانيا : الخطوات:
اول حاجه تجيبي قلم الوان و حددي ع الكنفاه الرسمه اللي حابه تكون شكل السجاده عليها

تاني حاجه تجيبي الخيط و لفيه ع الكرتونه او ورقه الكوتشينه اللي جبتيها كده

و بعدين تبتدي تقصيه من جهه واحده بس

و هيبقى كده

و اول خطوه دخلي الابره من تحت الخط اللي العريض اللي في قماشه الكنفاه
ملحوظه: مش تشتغلي في الخط الرفيع اللي في القماش خليكي في المربعات الكبيره بس

اثني الخيط و اشبكيه الخيط في اول الابره

بعدين اسحبي الابره بالخيط زي ما هو واضح في الصوره كده

مش تطلعي الابره من الخيط جيبي الجزء التاني من الخيط و اسحبيه داخل الجزء الاول و اعقدي

بس و هتبقى بالشكل ده

اول جزء لازم تعمليه في السجاده هو الحواف بتاعت السجاده عشان قماشه الكنفاه مش تفك منك
ملاحظه: لما تخلصي اول سطر من حواف القماشه و تبتدي في السطر اللي بعده اربطي كل خيط في السطر التاني مع خيط من السطر الاول ضمانا انها مش هتفك منك

بس و كرري الخطوات ديه لحد اما تخلص كل الفراغات اللي في قماشه الكنفاه و هتطلع كده