مساكين هم من لا يحبون الكزبرة 🙂 … فعلا الكزبرة الخضراء رااائعة بكل المقاييس ليها عطر رائع وجميل يحسسك ان الدنيا ربيع والجو بديع
ده غير ان له العديد والعديد من الفوائد الصحية ومنها انه
مضاد للاكسدة , مضاد للاكتئاب والقلق , يحسن المزاج , يحسن النوم , يقلل من معدلات السكر فى الدم ويساعد مرضى السكر , زيت الكزبرة مضاد للفطريات بالفم , مضاد للبكتريا , قد يساعد فى حالات انسداد الشرايين , .. وغيرها الكثير من الامراض اسالوا عنها العم جوجل
انا اعرف ناس بتحط ورق الكزبرة الخضراء بين اسنانها لتعطير الفم … فعلا رائع ورائحته جميلة جدا جدا وانا مهووسة بالكزبرة الخضراء
واليوم لاشباع هوسي بالكزبرة هاقدم لكم طبقين مقبلات او من الاطباق الجانبية السهلة جدا جدا باستخدام الكزبرة الخضراء
اول طبق هو : سلطة الطماطم بالكزبرة
هنحتاج الاتى
٢-٣ حبات طماطم جامدة مش طرية
فصين توم مفرومين
١ معلقة كبيرة زيت زيتون
١ معلقة صغيرة عصير ليمون
كبشة كزبرة مقطعة صغير
ملح على حسب الذوق
رشة كمون – اختياري
فقط اخلطوا المكونات مع بعضها جيدا ونسيبها نصف ساعة حتى تتبل الطماطم جيدا وتاخد ريحة الكزبرة … واستمتعوا باسهل واحلى سلطة
يا سلام عليها مع العيش المحمص روعة فعلا .. من نعم الله علينا الكزبرة دى
ثانيا :: سلطة البطاطس بالكزبرة الخضراء والاعشاب
هنحتاج الاتى
٣-٤ حبات بطاطس متوسطة – مغسولة ومقطعة مكعبات
١ معلقة صغيرة توم مفري
٢ معلقة كبيرة زيت زيتون
١ معلقة صغيرة روز مارى ناشف
١ معلقة صغيرة ريحان ناشف
١ معلقة صغيرة زعتر ناشف
رشة ملح
كبشة كزبرة مقطعة
نسخن الفرن على درجة حرارة ٣٥٠ فهرنهايت وفى هذه الاثناء نخلط المكونات مع بعض جيدا ما عدا الكزبرة ثم نضعها فى الفرن حتى تستوى البطاطس جيدا ممكن نضيف للصينية ٢/١ كوب ماء حتى لا تحترق البطاطس
عند الانتهاء نتركها تبرد قليلا ثم نضيف عليها الكزبرة ونخلط جيدا
وتقدم بالهنا والشفا
ودلوقتى مع نصيحة بسيطة لحفظ الكزبرة
لو اشتريتوا كزبرة كتير وعايزين تحفظوها ممكن تحفظوها فى مكعبات الفريزر وتحطوا معلقة كبيرة من الكزبرة المقطعة فى كل مكعب ونضيف عليها ماء او ممكن عصير ليمون ونحفظها بالفريزر وتستخدم وقت اللزوم بس مش فى السلطات يعني تنفع فى الطبخ او الشوربات وخلافه
