حلة الارز الكهربائية هي احدي الاجهزة المنتشرة حاليا في اقسام الاجهزة الكهربائية ، في فترة من الفترات اشتريتة و قبل التحدث عن طريقة استخدام حلة الارز الكهربائية حاتكلم عن المميزات و العيوب و طريقة التنظيف  :

اولا المميزات :

• اول نقطة اني عمري ما استعملته و الارز باظ مني ، كل مره ما شاء الله بيظبط و الحبة بحبتها.
• اسرع من الطريقة العادية و خصوصا لو بتسوي فيه محشي و بتزيد السرعة لما بتضيفي الماء ساخن.
• في خاصية في الجهاز انه طالما موصول به الكهرباء ، بيحافظ علي درجة حرارة الارز ساخن ، اول ما يستوي الارز يفصل التسوية و يشغل المحافظة علي الحرارة اوتوماتيك.
• جربت تسوية الارز العادي و البرام و المحاشي و النتيجة هايلة ( ما عدا ان الرز المعمر بيكون من غير وجه محمر ).
• الماركة عموما مش بتفرق ، جهازي صيني و كفائتة ممتازة ، و عموما سعرة مناسب و مش غالي .
• مع الحلة عادة شبكة بلاستيكية ، ممكن تسخني عليها الطعام او تسوي عليها بطريقة الطهر بالبخار ،.

عيوبة :

• اكبر عيب فية حجمة ، بيستهلك مساحة مش بسيطه في المطبخ ، فاذا قررتي تشتريه  راعي النقطة دي جدا لانه حيكون عبء عليكي في وجوده.

طريقة التنظيف :

• بعد الانتهاء من غرف الارز ، انقعي الحلة الداخليه ( بعد رفعها من الجهاز ) في ماء لفصل اي حبات ملتصقة و تسهيل تنظيفها و غالبا لن يلتصق منك شيء.
• التنظيف دائما بسائل جلي الصحون و اسفنجة ناعمة ، لا تستخدمي الناحية الخشنة ، حتي لا تتجرح طبقة التيفال ، لانها لو اتجرحت مش حتكون نتيجتها زي قبل كدة .
• الجهاز من بره تنظيفة سهل جدا باي قطعة قماش قطنية و جلانس ( ملمع زجاج )

طريقة استخدام حلة الارز الكهربائية

•  بتضيفي عيار الماء العادي لو حتطبخي علي الغاز + نصف كوب اضافي ، احتياج الماء هنا اعلي من الطبيعي
• تضعي الارز و الماء و الملح و السمن ، و تغلقي الجهاز ، و تشغلي الزر و اتركية و هو حيقوم بكل الخطوات و عند الانتهاء سيتوقف وحدة و يشغل خاصية الحفاظ علي درجة الحرارة .

اهم نصيحة : لو مش محتاجاة ما تشتريهوش ، لو الرز مش بيظبط معاكي او بيشيط منك او بتشتغلي و نفسك ترجعي تنامي ساعة و تلاقي الاكل جاهز حيكون مساعد قوي ليكي.

فكرة مجربة :

يمكنك تحمير الشعرية في السمن بكمية كبيرة ، و حفظها في علبة زجاجية او بلاستيك و استعمالها مع الارز لتوفير وقت التحمير ( لانك بتضطري تحمري برة جهاز الارز ، علي البوتاجاز )  بانك تضيفيه مع الارز و الماء و الملح و السمن و تقلبية و تشغلي الجهاز عادي ، نفس الفكرة بتحمير البصل بني و حفظة في الفريزر بعد طحنه ناعم و اضافته الي الارز بنفس الخطوات .