فى بلادنا العربية من الاكلات المشهورة هى المحشى وكل بلد ليها طريقة فى عمل المحشى فهنعمله على الطريقة المصرية وطبعا كل اسرة ليها نكهتها وطريقتها فى المحشى انا هاعمله بطريقة امى وان شاء الله تجربوه ويعجبكم بس امى بتعمله طبعا بسمنه بلدى وكلها fat فانا باعمله بزيت وفى الخلطة نفسها بضيف زيت زيتون والى عاوز بزبده او سمنه زى ماتحبى .
المقادير
12 كيلو ورق عنب طازجة او معلب
1 كيلو كوسة
4 حبات فلفل اخضر
4 كوب رز مصرى صغير الحبة مغسول ومنقوع
4 كوب مرقة (شوربة )ساخنة
الصلصة
2 بصل كبير مفروم ناعم
6 طماطم (مغسولين ومضروبين فى الخلاط) – 2 علبة صغيرة صلصة
ملح – فلفل اسود – زيت
خليط المحشى
2 حزمة كزبرة خضراء – 2 حزمة شبت اخضر
ملح – فلفل اسود – رشة قرفة ناعم – بهار مشكل – بابريكا حلو – زيت زيتون – 2 معلقة كبيرة صلصه
الطريقة
لعمل الصلصة
- على النار في الحلة نضع زيت والبصل المفروم حتى يديل تماما .
- نضيف عصير الطماطم والصلصة والملح والفلفل ونقلب حتى يغلى الخليط .
- نوطي النار حتى يصبح سمك الصلصة غليظ والطماطم مركزة تماما .
خليط المحشى
- نقطع الكزبرة والشبت تقطيع صغير وناعم .
- نصفى الرز من الماء ونضعه فى طبق غويط .
- نضيف الكزبرة والشبت على الرز ثم خليط التوابل وزيت الزيتون وصلصة عشان لون الرز يبقى احمر ونضبط الملح طبعا وكده الخلطة جاهزة للحشو بس فى ورق العنب هنضيف رشة نعناع ناشف بيدي نكهة .
محشى ورق العنب
- يسلق ورق العنب فى ماء مغلى على النار حوالى 2 دقيقة حتى يطرى .
- نشيله من الماء الساخن ونضعه فى ماء بارد مباشرة عشان نوقف عملية النضج بتاعه .
- ونضعه فى مصفى حتى ينزل كل الماء .
- اذا كان معلب نغسله بالماء عشان الاملاح .
- نشيل العنقود بتاع ورق العنب الموجود من تحت وانا بافضل اضع الاوراق مع بعض على حسب الحجم الصغير مع بعض والكبير مع بعض عشان يسهل عليكى الحشو .
- نضع العنقود بتاع ورق العنب فى قاع الحلة او ممكن شراح بصل وطماطم .
- نبدا نحشى الورق ونضع كمية قليله من الحشو على الجزء السفلى من ورق العنب وده شكل لقيته على النت ازاى تعرفى تحشى الورقه .
- نضع الصف الاول وده اهم صف لانه هيتبنى عليه الشكل والورق كله .
- بعد الصف الاول نضع بقيه الورق حتى ننتهى من الكمية .
- نكون مجهزين الشوربه او المرق ساخنة وعشان تضبطى مقدار السوائل كل كوب رز عليه كوب ماء وكده يطلع المقدار مضبوط معاكى .
- نضع طبق على وش ورق العنب عشان يحتفظ بشكله ونضيف الشوربة ونضعه على النار .
- يغلى نوطى النار ومانفتحش الحله خالص ولو عاوزين كل شويه نلفها .
- حوالى من 30 الى 40 دقيقة يستوى ونطفى النار ونصب السائل المتبقى من الحلة بالضغط على الطبق الموجود .
- ويقدم ساخن وبالهنا والشفا .
محشى الكوسه والفلفل
- نقور الكوسه ونخليها مجوفه من الداخل فاضيه تماما ونضعها فى الماء هى والفلفل .
- نحشى الكوسه والفلفل بخليط الرز مع مراعاه حشو نصفها فقط لان الكميه بتاعه الرز هتتضاعف عند السوى .
- ونجهز الشوربة ساخنة ونصبها على الكوسة والفلفل (طبعا الكوسة مش اطفال كثير بيحبوها محشى فانا بضيف مع الشوربة 2 معلقة كبيرة من صوص البيتزا (التوم مفروم مع طماطم ) بيديها طعم ويقدروا ياكلوها وممكن تستغنى عنها لو شخصيتك قوية وبياكلوها كده ) بس خلى بالك الكوسة مش بتاخد شوربة كثير .
- تغلى نوطى النار ونحرك الحلة كل شوية لغاية ما يستوى وما نفتحش عليها خالص.
- ويقدم ساخن وبالهنا والشفا .
افكار نهلة
- لو حسيتى ان السوائل كثير فى الرز ممكن تضعيه فى مصفاه وانتى بتحشى وكده هيبقى الرز فقط والماء كله هينزل .
- طبعا وجبة متكاملة ومع فراخ مشوية هيدعولك كلهم .
- طبعا ممكن تستغنى عن خطوة الصلصة وفيه بيكتفوا بالطماطم مقطعه قطع صغيرة على خليط الرز .
- وديه صورة لطريقة تقديمه فى العزومات بس طبعا ده بارتى محشى .
- Bio
- Latest Posts
نهلة الجداوي
مديرة موقع لمسات جميلة
انا احدى مؤسسات الموقع هاوية للطبخ ومابحبش الروتين بحب التغيير والتجديد عشان نعرف نكمل حياتنا فهنحاول نغير ونجدد من مطبخنا وكمان هحاول اقدم لكم روشتات لحياة زوجية سعيدة سواء مع الزوج او الاولاد كمان يارب اقدر افيدكم واستفيد انا كمان.
- ممكن نعرف محشي ورق العنب
