علمنى الحب ، بقلم الكاتبة : سحابة نقيه ..
السلام عليكم و رحمة الله و بركاته
الكاتبه المتالقه / سحابة نقيه ذات قلم واعد و مبشر بموهبه ادبيه مبدعه
لفت نظرى اسلوبها السهل الخفيف رغم افكار قصصها التى تعرض قضايا هامه و مؤثره فى كل مجتمعاتنا
اشاركم اولى قصصها .. رواية “علمنى الحب ”
ان شاء الله تقضوا وقت لطيف مع القصه
بسم الله نبدا
الجزء الاول
يا غشاشه .. بتعرفى شو الحق على انا الى بلعب معك
ضحكت غاليه و هى بتقول لهبه .. انا مو غشاشه بس انت الى مابتعرفى تلعبى ولما بتخسرى بتتهمى الكل بالغش
كلام غاليه صح … كان هدا رد لجين على هبه وقالت لها . . خلص هبه لا تكبرى القصه خليها شغلت تسلايه مو ربح وخساره
قامت هبه من عندهم معصبه ورمت اوراق الشده وطلعت من الغرفه
الله يهديها خربت علينا المود ههههه هلا كيف بدنا نلعب..؟؟ انا وانت ما بنكفى
طلعت فيها لجين وعطتها نظره .. مو الحق عليك لازم يعنى تفوزى بكل لعبه خلص بتعرفيها بتدايق خليها تفوز ولو مره منشان نتم مبسوطين
تخصرت لها غاليه وقالت بالله شو بدك نلعب متل الولاد الصغار… كملت وهى بتلوح بايديها متل الى بلقى محاضره… وين الحماس وين روح المنافسه.. قسم بالله بتبيخوا اللعبه انتوا …. ااااف منكم وقامت غاليه وتركت لجين المستغربه من الى صار…هلا الكل زعل يعنى!! والله غريبه حالت هالخوات …. قامت لجين ولمت ورق الشده الى رموه خواتها وهن معصبات و راحت نزلت لتحت تشوف امها وابوها
بالصالون لقت امها بتحكى بالتلفون وابوها ماسك اللاب توب وبشتغل … مشيت لجين لعند ابوها و جلست جنبه ومالت عليه وقالت بصوت واطى .. بابا وين الكل ؟
ابوهبه من غير مايرفع راسه من اللاب توب رد عليها.. هبه بالحديقه قال بدها تسقى الوردات و غاليه بتعمل لنا قهوه
ردت لجين اااه طيب …. بهالحظه دخلت غاليه شايله صينية القهوه ولما شافت لجين قالت … لجون الله يخليك جيبى الحلو من المطبخ …. قامت لجين ركض عالمطبخ ورجعت معها صحن الحلو……كانت غاليه بتصب القهوه التركى بفناجين وبتعطى ابوها وامها لما حطت لجين الحلو جنبها عالطاوله قالت لها غاليه: بتريدى ؟ ردت لجين اذا فى صبيلى فنجان
صبتها غاليه فنجان وعطتها اياه وقالت لها طبعا في اصلا عملت قهوه بتكفى لكلنا .. وبالحظه هى دخلت هبه من باب الحديقه الخلفى الى بطل على الصاله ولما شافتها غاليه صبت لها فنجان من غير ما تسالها وعطتها اياه وهى بتقول تفضلى ست هبه بس ان شاء الله تكونى روقتى
ماردت عليها هبه واخدت الفنجان وهى بتشكرها وجلسوا الكل يشربوا قهوتهم وياكلوا حلو ع الساكت لان امهم لسى على التلفون والله وحده بعلم مع مين بتحكى وابوهم مشغول باللاب توب تبعه
هدا السناريوا منعاد كل عصر يوم احد .. خناقه صغيره وبتنتهى بالصلح على فنجان القهوه
عائلة ابو هبه عيله صغيره مكونه من الاب غسان ال… ابو هبه والام ندى ال.. ام هبه و البنت الكبيره هبه 21 سنه .. بتدرس هندسه طبيه …. وبعدين بتجى وراها غاليه 17 سنه بتدرس بالمرحله الاخيره بالثانيويه و اخر العنقود لجين 16 سنه كمان بتدرس بالثانوية
عائلة ابو هبه عايشين فى امريكا من فتره طويله كتير … ابو هبه تزوج من ندى بعدين هاجر الى امريكا ليكمل دراسته العليا وهنيك انجب كل بناته … ابو هبه دكتور بالجامعه فى قسم الفيزياء والكيمياء وهو مشهور جدا باعماله وابحاثه
عيشته بالغرب ما اثرت على كونه عربى مسلم فهو من الناس المحافظين جدا تعاون هو وام هبه على تربية بناته احسن تربيه اسلاميه وماخلاهم ولا لحظه ينسوا جذورهم العربيه … فبناته يتكلموا اللغه العربيه بطلاقه وبامريكا علمهم قرات القران الكريم على ايد شيخ هناك وبناته محافظات على الحجاب الشرعى والكل بشكر باخلاقهم وتربيتهم
طيب اكيد هلا انتوا متشوقين تتعرفوا زياده على شخصيات البنات
خلونا نبدا بهبه البنت البكر … بنت حلوه كتير واحلى شى فيها جسمها الى متل عارضات الازياء وكتير خواتها بنقهروا منها لان مهما اكلت ما باثر فى جسمها بشرتها بيضا و شعرها اسود عيونها بنى كبار و لها غمازه بذقنها بس اسوا شى بهبه عصبيتها وروح المنافسه الشديده الى عندها مابتحب تخسر بشى ولا ممكن حدا يدوس لها على طرف طبعها كتير بشبه طبع ابوها و هى شديدة الذكاء دائما متفوقه بدراستها و هلا هى باقى لها سنتين وبتتخرج مهندسه
اما البنت الوسطى غاليه سماها ابوها على اسم امه لان بتشبها كتير يعنى جمالها جمال بنات الشام طولها متوسط وجسمها حلو كتير شعرها عسلى وبشرتها بيييضا احلى شى فيها عيونها لانهم وساع كتير ورموشها غزيره وطويله ولونهم بنى.. قد ما تكون اجمل وحده من خواتها بس جمالها بلفت النظر ولها جاذبيه غريبه خاصه لما بتبتسم لان تمها حلو ولها صفت اسنان كتير حلوه بس احلى شى فيها روحها المرحه اذا سمعت صوت ضحك هدا اكيد غاليه واذا سمعت نقاش عالى هدا اكيد غاليه هى انفعاليه بس قلبها ابيض وبتحب كل الناس
لجين هى احلى وحده من خواتها عيونها خضر فاتحه بس مو كتير كبار..شعرها اشقر غامق موج بالوان الشقار يعنى تحسه كانه مصبوغ عدت الوان طولها مابين هبه وغاليه .. جسمها ملفوف شوى و بشرتها بيضا و لها غمازه وحده على خدها اليمين … البنت هى هادئه كتير ومسالمه ومابتحب المشاكل على عكس غاليه الى مابتقدر الى تدخل بكل شى
قالت غاليه بملل وزهق وهى بتحط راسها بحضن امها …يالله متى بده يجى موعد السفر
ردت عليها امها وهى بتمسح على شعرها… كلها اسبوع وبنكون بسوريا
يعنى لو سبقناكم انا ولجين مو كان هيك احسن ما تضيعوا علينا اسبوعين من الصيفيه منشان الست هبه
هون ردت عليها هبه وهى بتطلع فيها بعصبيه يعنى بدك تنزلى لحالك حبيبتى ماشاء الله ماشاء الله شو التحرر هدا
قالت غاليه بنرفزه وهى بتعدل جلستها يعنى الى بسمعك بقول حننزل لحالنا ونقعد ببيت لحالنا مو كان نازلين عند ستى وانت بتعرفى ستى مابتخلى حدا يتنفس من كتر ماهى شدييييده بس على الاقل مو نقعد هون لا شغله ولا عمله انا ولجين بس نستنى حضرتك تخلصى اختباراتك
طيب مدام ستى مارح تخليك تتنفسى شو بدك تروحى لعندها ولا بس نق على الفاضى
لا حبيبى مو نق بس وانا عند ستى بجو كل البنات لعندنا وبنتسلى انا ولجين اما هون مافى شى نعمله انت متسليه بالدراسه ونحن كل صاحباتنا سافروا على بلادهم انت بتعرفى ان المدارس الاسلاميه هون بتسكر بكير قبل المدارس الحكوميه
ردت عليها هبه بمسخره وهى بتقوم لتطلع على غرفتها …. اما تسلايه الدراسه مو كان رح تطلع روحى بالمتحانات هى …غيرت نبرت صوتها وهى بتلف لعند امها … ماما انا طالعه ادرس والله يخليك مابدى حدا يزعجنى طيب
ردت عليها ام هبه… طيب ماما الله يوفقك
غاليه لما شافت اختها هبه دارت ظهرها و بتطلع على الدرج مدت لها لسانها بقهر مين شاف الحركه هى لجين فضحكت شاركتها غاليه الضحكه وهى بتقترح…… شو رايك نسبح منشان نضيع الوقت ؟
ردت عليها لجين … ليش لا والله الجو بجنن .. يالله قومى
قضت غاليه ولجين فتره العصر بالسباحه وماطلعوا من المسبح لحتى هلكوا وماعاد لهم حيل يكملوا اكتر دخلوا على البيت وغيروا ملابسهم و اكلولهم لقمه وعلى طول على النوم ( بتعرفوا اهل بره بحبوا النومه بكير)
يوم السفر…
الكل كان مبسوط وخصوصا غاليه الى كانت بتنط بكرسى الطياره من الفرح …يالله اخير مو مسدقه حالى اخيرا بدى اشوف ستى وجدوا وكل البنات والله اشتقت للكل..
رد ابوها وهو ببتسم لها ابتسامه حلوه .. كلها ساعات وبتصيروا عندهم الصبر الصبر يا غاليه
ابتسمت غاليه لابوها وهزت راسها بطيب ….لفت لعند لجين لان لجين كانت جالسه جنب الشباك وهى بالنص وابوها جنبها اما امها واختها كانوا بالكراسى الى قدامهم وجنبهم وحده ست اجنبيه
لجين شو اكتر شى مشتهيه انك تعمليه اول ماتصلى على سوريا؟
ردت عليها لجين وهى بتتفرج من الشباك … انام
انصدمت غاليه بجواب لجين وقالت لها مستغربيه … نعم …..تنامى !!!
ردت لجين بعد ماالتفتت على اختها … ليش انت خليتينى انام اخر يومين من كتير ماانت متحمسه للسفره سهرتى البيت كله
ردت عليها غاليه وهى بتدفشها … يالله ما اغلزك
مرت الساعات ووصلت عائلة ابوهبه على سوريا وكان الكل بستقبلهم بالمطار وعليت الاصوات بالترحيب والتقبيل والصراخ بين البنات والكل يحاول يهدى فيهم مافى فايده … كان الوقت لسى العصر منشان هيك الكل رجع عند بيت الجد ابوه لابوهبه منشان يسلمو على الواصلين
الجد ابو صالح عنده 3 اولاد وبنت وحده
صالح ابو محمد متزوج وعنده 3 شباب و2 بنات
غسان ابو هبه
و انس كمان متزوج وعنده بنتين و صبى واحد
اما عليا اخت ابو هبه فهى اكبر من ابو هبه ومتزوجه وعنده 4 شباب و4 بنات ومعظم ولادها متزوجين
اما عائلة ام هبه ندى فابوها متوفى وامها عايشه عند اخوها الكبير مصطفى ابو خالد وهو متزوج وعنده 5 شباب
ام عبد الرحمن هى اخت ام هبه الكبيره وعندها ولد واحد و5 بنات
فاطمه 29 متزوجه وعندها 3 بنات
مريم 26 سنه متزوجه وهلا حامل
عبد الرحمن 25 سنه مهندس كمبيوتر
لينا 21 سنه بتدرس صيدله
سوسن 18
وسوزان 17
ام سامر اصغر من ام هبه وعندها 3 ولاد وبنت وحده
ابراهيم اخو ام هبه الصغير عمره 30 سنه لسى مو متزوج بس مستقل بحياته عن اخوته وعايش لحاله ببيت صغير
نرجع للجميع فى بيت الجد ابو صالح ابوه لابو هبه الكل كان مجتمع عنده طبعا والى قدر يجى من اهل ام هبه للمطار رجع معهم لبيت ابوصالح و الكل حاول جهده يهدى طوشت البنات بس مافى امل على الساعه 8 حطوا العشا والكل تعشى وعلى الساعه 10 كان الكل رجع لبيته منشان يخلى المسافرين يرتاحوا شوى من تعب السفر
- رواية علمني الحب للكاتبة سحابة نقية
- روايات سحابة نق
- تحميل رواية علمني الحب لسحابة نقية
- تحميل روايات رومانسية جريئة pdf
- قصص سحابه نقيه
- نق مبسر
- تحميل روايات سحابة نقية pdf
- جديد الكاتبه سحابه نقيه
- روايات رومنسية بقلم سحابة نقية
- روايات سحابة نقية
