حلويات رمضان المصريه
كيك بجيلي المانجو
المقادير:
- كوب زبدة
- 2 كوب سكر
- كيس جيلي بالمانجو
- 4 بيضات
- 1/2 كوب مانجو مهروس او مضروب في الخلاط بدون ماء
- 3 الا ربع كوب دقيق
- 2 ونصف ملعقة صغيرة بيكينج باودر
- ملعقة صغيرة فانيليا
- كوب لبن
للحشو:
- جيلي مانجو بارد (في قالب بنفس مقاس قالب الكيك)
الطريقة:
1- اخلطي الزبدة مع السكر بالمضرب لغاية ما يبقى الخليط عامل زي الكريمة، وبعد كده ضيفي حبيبات الجيلي مع الاستمرار في الخلط، لغاية ما كل المكونات تتجانس مع بعضها.
2- بعد كده ضيفي بيوريه المانجو والبيض مع الاستمرار في الخلط.
3- اخلطي الدقيق مع البيكينج باودر والفانيليا، وبعد كده ضيفيهم للخليط السابق مع الاستمرار في الخلط، وبعد كده ضيفي اللبن واضربي كل المكونات مع بعضها لغاية ما تحسي ان كلها تجانست.
4- هاتي الصينية اللي هتعملي فيها الكيك وادهنيها بالقليل من الزبدة وشوية دقيق، وبعد كده تخلصي من الدقيق الزيادة، وبعدين صبي فيها خليط الكيك اللي جهزتيه، وساوي السطح.
5- دخلي الصينية في فرن ساخن على درجة حرارة 180، وسيبيها تستوي لمدة نصف ساعة او لغاية ما تحسي انها استوت.
6- طلعي الكيكة من الفرن وسيبيها لغاية ما تبرد خالص تماما، وبعد كده اقسميها بالعرض الى 3 طبقات متساوية في الارتفاع.
7- حطي اول طبقة من الكيكة في طبق التقديم، وافردي عليها طبقة من جيلي المانجو، وبعد كده حطي طبقة تانية من الكيكة وكرري نفس الحركة مع باقي الطبقات، وبعد كده ممكن تزيني سطح الكيكة بالكريم شانتيه وقطع المانجو وقدميها.. وبالهنا والشفا.
كاسترد بالمكسرات
المقادير:
- 4 اكواب لبن كامل الدسم
- 1/4 كوب سكر
- 3 ملاعق كبيرة بودرة كاسترد
- 1/2 1 ملعقة صغيرة حبهان مطحون
- مكسرات للتزيين؛ اي نوع انت بتحبيه (جوز او فستق او عين جمل او جوز الهند او زبيب)
الطريقة:
1- سخني اللبن والسكر والحبهان في اناء، وسيبيهم على نار هادية لغاية ما يغلوا مع التقليب المستمر.
2- دوبي بودرة الكاسترد في حوالي 4/1 كوب مية، وضيفيها تدريجيا الى خليط اللبن والسكر والحبهان، وخدي بالك انك في الوقت ده تكون النار هادية، وتقلبي بملعقة خشبية باستمرار علشان الخليط ما يلزقش.
3- سيبي الخليط ده يغلي على النار كويس، وبعد ربع ساعة شيليه من على النار، وضيفي اليه ماء الورد، ورجعيه تاني على النار لمدة خمس دقائق كمان مع التقليب المستمر.
4- بعد كده هاتي اطباق التقديم وصبيه فيها، وبعد ما يبرد زيني الاطباق بالمكسرات، وحطيه في الثلاجة وطلعيه عند التقديم.
السمبوسك الحلو
المقادير:
- 1/2 لفة جلاش
- 1/2 كوب زبد سايحة
- 1/2 كيلو جبنة ريكوتا
- 2 ملعقة كبيرة سكر
- 3/4 كوب شربات
- 2 ملعقة كبيرة فستق مفروم للتزيين
مقادير الشربات:
- 1/2 كوب سكر
- 3/4 كوب مية
- عصير ليمونة
- فانيليا
الطريقة:
1- اخلطي الجبنة الريكوتا مع السكر في طبق.
2- حطي رقائق الجلاش على سطح مستوي وقطعي كل ورقة جلاش لمربعات عرضها حوالي 4-5 سم.
3- خدي كل مربع وحطي فيها 2 ملعقة صغيرة من خليط الريكوتا في الوسط، واطوي كل الاطراف للداخل علشان تبقى على شكل وردة مربعة وبداخله الحشو، وبتكرري نفس الطريقة دي لغاية ما تخلصي كل اللي عندك.. وادهني طرف كل واحدة بشوية زبدة علشان تلزق.
4- هاتي صينية فرن وادهنيها بالزبدة، وحطي فيها مثلثات السمبوسك، وادهني سطح السمبوسك بالزبدة.
5- سخني الفرن على درجة حرارة عالية (220 مئوية)، ودخلي الصينية الفرن لمدة 30 دقيقة او لغاية ما تلاقي ان وش اللفائف بقى ذهبي، وممكن انك تحمريها في الزيت بدلا من وضعها في الفرن.
6- خرجيها من الفرن، وصبي على كل واحدة ملعقة من الشربات البارد ورشي عليها فستق.
كنافة مقلية بالكريمة والفاكهة
مقادير الكنافة:
- 1/2 كيلو كنافة
- زيت للقلي
- كوب شربات
- كوب كريمة مخفوقة
- كوب فاكهة مشكلة (مانجو – تفاح – جوافة – كريز)
مقادير الشربات:
- 1/2 كوب سكر
- 3/4 كوب ماء
- عصير ليمونة
- فانيليا
طريقة عمل الشربات:
حطي السكر والمية كلهم مع بعض في اناء على نار هادئة لمدة ربع ساعة، وبعد كده ضيفي الليمون، وسيبيه لمدة 5 دقائق لغاية ما يغلي، وحطي الفانيليا وشيليه من على النار، وسيبيه لغاية ما يبرد.
طريقة عمل الكنافة:
1- اقلي الكنافة في زيت ساخن لغاية ما لونها ياخذ اللون الذهبي.
2- بعد ما لونها يبقى ذهبي شيليها من على النار وحطيها على ورق لامتصاص الزيت الزائد.
3- هاتي طبق الحلويات، وحطي فيه طبقة من الكنافة واسقيها بالشربات وهي سخنة وحطي طبقة تانية من الكريمة والفاكهة وطبقة اخرى من الكنافة وزينيها من فوق بالكريمة والفاكهة.
جيلي بالفواكه والبسكويت مغطى بالقشطة والشيكولاتة
المقادير:
- فواكه مشكلة مقطعة الى مربعات صغيرة
- 4 علب جيلي (نوع واحد)
- 3 علب بسكويت
- علبة قشطة
- شيكولاتة مبشورة
- كاس من الكريمة المخفوقة
الطريقة:
1- هاتي الفاكهة اللي عندك وقطعيها الى مكعبات صغيرة، وبعد كده رصيها في الاطباق اللي هتقدمي فيها.
2- فضي محتويات علب الجيلي في اناء كبير فيه 3 اكواب من المية المغلية على نار متوسطة الحرارة مع التقليب المستمر لمدة عشر دقائق، او لغاية ما تلاقي ان الجيلي بدا يتقل، وبعد كده صبي شوية جيلي فوق الفاكهة.
3- بعد كده هاتي البسكويت ورصيه فوق الفاكهة والجيلي، بعد كده صبي باقي الجيلي فوق البسكويت، بعد كده حطي الطبق ده في الثلاجة لمدة 4 ساعات او لغاية ما الجيلي يتجمد.
4- هاتي علبة القشطة وعلبة الكريمة واخلطيهم مع بعض كويس، وطلعي الطبق من الثلاجة، وادهني وشه بخليط الكريمة والقشطة، وبعد كده رجعيه الثلاجة تاني لمدة ساعة.
5- بعد ما تلاقيه جمد خرجيه من الثلاجة وحطي على وش الطبق شوية فاكهة او شوية شوكولاتة مبشورة.
لقمة القاضي
المقادير:
- كوب دقيق
- كوب لبن
- معلقة صغيرة خميرة
- ذرة ملح
- 1/4 كوب زيت ذرة
مقادير الشربات:
- 1/2 كوب سكر
- 3/4 كوب مية
- عصير ليمونة
- فانيليا
الطريقة:
1- اخلطي الدقيق مع الخميرة مع الملح، وضيفي اليهم تدريجيا اللبن وهو دافئ.. واعجني المقادير دي كلها مع بعضها كويس، وبعد كده غطيها وسيبيها لمدة 3 ساعات علشان تتخمر.
2- بعد مرور 3 ساعات سخني الزيت، وبعد كده خدي معلقة صغيرة من العجينة دي واقليها في الزيت، وكرري الموضوع ده لغاية ما العجينة تخلص.
3- شيلي لقمة القاضي من الزيت، وحطيها وهي ساخنة في العسل او الشربات، وبعد كده شيليها منه، وحطيها في مصفاة علشان تتخلص من العسل او الشربات الزيادة.
4- بعد كده رصيها في طبق التقديم.. وبالهنا والشفا.
طريقة عمل الشربات:
حطي السكر والمية كلهم مع بعض في اناء على نار هادئة لمدة ربع ساعة.. وبعد كده ضيفي الليمون وسيبيه لمدة 5 دقائق لغاية ما يغلي، وحطي الفانيليا وشيليه من على النار وسيبيه لغاية ما يبرد.
كيكة بصوص الشيكولاتة
المقادير:
كوب سكر
كوب زيت
كوب ماء
4 ملاعق كبيرة لبن بودرة
4 ملاعق كبيرة كاكاو خام
2 بيضة
باكو فانيليا
كوب دقيق
باكو بيكينج باودر
الطريقة:
1- اول حاجة نضع كوب السكر وكوب الماء وكوب الزيت والكاكاو واللبن والفانيليا في الخلاط، ونضربهم مع بعض لحد ما يبقوا متجانسين ويدوبوا كلهم والسكر يدوب، وكمان ممكن تحطي المكونات دية شوية شوية علشان ما تبقاش كتيرة على الخلاط ويدوبوا كويس.
2- بعد كدة ناخد من الخليط ده كوباية كاملة ونخليها على جنب لوحدها.
3- نجيب بيضتين ونكسرهم على باقي الخليط اللي في الخلاط ونضربه تاني كويس.
4- نحط الخليط اللي ضربناه مع البيض في وعاء بلاستيك ونضيف عليه كوباية الدقيق والبيكينج باودر، ونعجنهم مع بعض جامد بالملعقة.
5- بعد كده نصب العجينة في الصينية وندخلها الفرن لحد ما تستوي (العجينة بتبقى سايلة شوية).
6- اول ما العجينة تستوي وتخرجيها من الفرن، بنجيب كوباية الصوص اللي كنا سيبينها على جنب وبنصبها على وش الكيكة وبنسيبها شوية.
7- بعد ما الكيكة تبرد ممكن نحطها في الثلاجة،
السويسرول
المقادير:
4 بيضات.
3/4 كوب دقيق.
3/4 كوب سكر.
ملعقة كبيرة ماء فاتر.
ملعقة صغيرة فانيليا.
ملعقة صغيرة ملح.
مربى للحشو.
الطريقة:
1 اضربي البيض بالمضرب كويس جدا لغاية ما حجمه يزيد، وبعد كده تضيفي السكر واضربيه تاني بالمضرب لغاية ما تلاقي البيض لونه افتح وعمل زي الكريمة.
2 ضيفي الفانيليا والملح للبيض والسكر واخلطيهم مع بعض كويس وبالراحة جدا، وبعد كده ضيفي كمية الدقيق شوية شوية مع التقليب المستمر من تحت لفوق وبهدوء جدا.
3 احضري صينية مدهونة سمن وحطي فيها ورق زبدة ورشي عليها طبقة من الدقيق، وبعدين صبي فيها العجينة وافرديها كويس جدا بحيث يكون سمك العجينة متساوي في كل جوانب الصينية.
4- دخلي الصينية في فرن ساخن، وسيبيها لمدة من 10 الى 15 دقيقة لغاية ما لونها يحمر شوية وتعلى، واوعي تسيبيها كتير في الفرن لانها ممكن تنشف منك.
5- في الوقت اللي العجينة فيه هتكون في الفرن، احضري المربى وحطيها في طبق وقلبيها كويس لغاية ما تبقى سايلة وكثافتها قليلة علشان تعرفي تفرديها على العجينة.
6- بعد ما تطلعي الصينية من الفرن حطي على وشها ورق زبدة واضغطي عليها بصينية تانية، وبعد كده قطعي بالسكينة الاطراف بحيث تكون متساوية.
7- افردي المربى على الوش، بس خلي بالك انك تسيبي الاطراف نظيفة من غير ما تفردي عليها المربى.
8- لفي السويسرول بالراحة وممكن انك تقطعي بالسكينة جزء صغير مسافة واحد سم من الناحية اللي هتلفي من عندها؛ لان الطريقة دي هتسهل عليك اللف، وكمان ورقة الزبدة اللي من تحت هتساعدك وانت بتلفيه، وبعد كده حطيه في الثلاجة.
9- بعد ما السويسرول يبرد قطعيه لشرائح وقدميه.. وبالهنا والشفا.
