حقك علي لو كنت زعلان

 

((حقك علي ان كنت زعلان….))

للكاتبه: ماعاد بدري…

بعد معارك طاحنة مالها اول من اخر مع المواعين ..
مسحت ارض المطبخ …. ورتبت كراسي طاولة المطبخ ورفعت طرف قميصها بيدها وحطت رجلها على اول سنة من الدرج وقالت: الله يستر لاتطلعلي شغلة جديدة اكرف لها وانا مالي خلق…
وسبحان الله كان قلبها دليلها يوم وصلت لباب غرفتها الا وهي تسمع صوت دايم هالصوت يذكرها بالهم..

… : رهف عسى ماشر وين؟؟.
رهف: ولا مكان يمه بس بدخل غرفتي عشان…
… : لامعليش الله لايهينك خذي ثوب ابوك واكويه واذا كويتيه انزلي علقيه بالشماعة اللي بالصالة عشان لاقام الصبح يروح للدوام يلبسه.
رهف: …خلاص طيب هاتيه.

وتروح رهف بكل تعب وقلة جهد تشبك المكوى وتكوي ثوب ابوها ويوم خلصت نزلت مثل ما انطلب منها وعلقت الثوب بالشماعة ورجعت من طريقها ركض لغرفتها..
دخلت رهف غرفتها اللي كانت تعتبرها مملكتها المتواضعة كانت غرفتها صغيرة جدا رمت نفسها على سريرها بكل تعب وغمضت عيونها واخذت نفس عميق وكادت تستلم للنوم لكنها تذكرت انه بقالها هم ثاني بس هالهم شوي خفيف على قلبها …
التفتت رهف للدرج اللي جنب راسها وفتحته وطلعت…..

( دفترالتحضير)

—————————————————————————–
———————————

اهم بطلة لاول قصة اكتبها بحياتي…
رهف: بنت هادية وحبابة وناعمة وخدومة وحنونة وضعيفة شخصية بشكل كبير وعلى قدر من الجمال مدرسة مادة احياء وكل بنات الثانوية المراهقات ميتات عليها..

سلطان: ابو رهف انسان عايش لياكل ويشرب وينام اناني وكريه ومنافق ونقال حكي ويتكلم في اعراض الناس وكذا مرة سبب مشاكل بين رجال جماعته حتى اخوانه مقاطعينه ولا يحبونه وانسان هدفه بالحياة انه يجمع الفلوس من كل حدب وصوب وباي طريقة, مسوي نفسه قوي ولكنه ماحد يقدر يكسر كلمته الا شخص واحد فقط هو… منيرة
منيرة: منيرة زوجة سلطان الثانية تزوجها بعد وفاة ام رهف انسانة متسلطة وظالمة وممثلة بارعة اول ماتزوجت سلطان رفضت رهف وقالت خل امك تربيها وبعد ماماتت جدة رهف كل الناس قاموا يتكلمون فيها رجعت بكل كراهية خذت رهف واجبرتها انها تسميها (يمه) عشان توري الناس انها تحب هالطفلة والعكس صحيح..

ابرار: هي اخت رهف اولى كلية قسم جغرافيا لا وبعد انتساب؟؟ انسانة داجة لابعد المقاييس همها في الحياة برامج تلفزيون الواقع عالتلفزيون وانها تنام عالتلفون بالساعات اتكالية جدا وام مشاكل ونسخة مصغرة لاطباع امها واللي تبي تسويه تسويه ولا عليها من احد.

اثير: الاخت الثانية لرهف ثاني ثانوي انسانة لعابة وينلعب عليها بس خوافة وبعض الاحيان حبوبة تخاف من ابرار وتسمع كلامها..

افنان: الاخت الثالثة لرهف سادس ابتدائي فوضوية جدا ودلوعه وكسلانة بدراستها
ومشهورة بالتفتين على اخوانها لدرجة انه طلعولها اخوانها بالبيت عيارة محترمة ((الجمرة الخبيثة))…

صالح: هو ولد سلطان الوحيد ثاني جامعه قسم قانون اسمه المحبب لدى امه ((صلوحي)) لكن هو يكره هالدلع ويقولها انا مو بزر, شاب هادي جدا
من حاله في شانه مايحب ازعاج خواته ولا هذرة امه ولايحب يجلس مع ابوه ابدا..

—————————————————————————–
—————————————-

الجزء الاول:

بكل ضمير فاتحة درج الكومدينة وقاعدة تحوس فيه لدرجة انه بعض الاشياء طاحت عالارض ..
رهف: افنان اشقاعدة تسوين؟؟
افنان: …….
رهف: اشقاعدة تسوين؟؟
افنان بكل برود:ابي اخذ طوقك اللي فيه فراشة صغيرة عالجنب…
رهف:طب اللي يبي شي مو لازم بستاذن يا افنان
افنان:خلاص مالقيته باطلع..
وتطلع افنان وتترك درج الكومدينة وراها مفتوح والاغراض اللي طاحت عالارض ماشالتها تعوذت من ابليس رهف وقامت تلم الاغراض وترجع كل شي مكانه…
وكملت لبس عشان ما تتاخر على دوامها..
لبست عباتها من غرفتها ونازلة الدرج وهي منشغله بشنطتها تتفقد اغراضها لايكون نست شي,, فجاه لفت انتباها شي وابتسمت ابتسامة استغراب..
الطوق اللي بغت تاخذه افنان على راس اثير ناظرت اثير برهف من فوق لتحت وقالتلها بكل شر: خير يا رهف فيني شي يضحك؟؟
رهف: لا ابد سلامتك بس بعد ما تجين من مدرستك وتفصخين الطوق لا ترجعينه غرفتي عطيه افنان..
منيرة وهي طالعة من المطبخ وشايلة كاسة الشاهي المر لزوجها:
يالله صبح خير وشفيك انتي وياها ..
شوي ولا سلطان جاي من برا يركض :يللا يللا يارهف السواق جا اطلعي لا تتاخرين عليه..
رهف:يلا مع السلامه
مارد احد على رهف الا ابوها بكلمتين: لا تتاخرين الظهر..

>>طبعا ابو صالح مو فاضي لاحد ابدا يوديه ويجيبه رامي بناته عالباصات وبما انه رهف مدرسه دور وحاس الدنيا الين لقى كورولا” قديمة جدا راعيها مصري رضى انه يودي رهف ويجيبها بمبلغ بسيط جدا ضغط عليه ابو صالح انه يرضى فيه ويوديها مع بناته اللي كانوا طالبات بنفس مدرسة رهف الثانوية ووحدة منهم في المتوسطة اللي ورى مبنى مدرسة رهف وطبعا كانت السيارة ماساة دايم تخرب عليهم ومكيفها خربان والمسكينة رهف بالصيف تموت حر الين توصل..

منيرة: الحين انت ما استاجرت لها سيارة عشان تفتك من مشاويرها واقف في الشارع برا من صباح الله خير تستنى سواقاها وجاي تركض لها اطلعي يارهف سواقك برا مرة ثانية اذا جا يدق الجرس وهي تطلع له الله لايهينها وقفتك في الشارع برا مالها داعي..

سلطان وهو ياخذ الشاهي من يد منيرة: يابنت الحلال شغلت السيارة عشان احميها ولا سمعت السيارة وقفت عند الباب طلعت اتاكد والا هو بس هذا اللي صار.

منيرة:المهم ماعلينا انا ابيك تعطيني فلوس بتجيني حرمة هي وحريم عيالها اول مرة تدخل علي وما ابي اضيفها اي كلام ابي شي يبيض وجهي قدامها..

سلطان: اقول اقول دام السالفة فيها فلوس انا اتاخرت عالشغل مع السلامة..

منيرة وهي تمسك ابوصالح من كم ثوبة: والله والله ياسلطان ماتطلع من البيت الا وانت معطيني فلوس

سلطان:ماعندي..
منيرة:يابو صالح الله يصلحك هذي لطيفة خالة امي اول مرة تجيني وتدخل بيتي وهي راعية خير وعايشة بعز ولا ودي انها تدخل بيتي اول مرة وتعيب علي هي وحريم عيالها وتلقاني اقل منها وبعدين هي الحرمة الوحيدة اللي بقتلي من ريحة امي الله يرحمها..

سلطان:يالله صبح خير من وين طلعتنا خالة امك ذي اول مرة اسمع فيها..

منيرة:هي كانت ساكنة مع ولدها الوسطاني بحايل ,وباقي عيالها ساكنين هنا في الرياض المهم ولدها هذا اللي هي ساكنة معه نقل هنا الرياض وجابها معه هي وزوجته وخلاص استقروا هنا ويوم استقروا دقت علي تبشرني وقالت انها بتزورني وبعدين ياسلطان احمد ربك انا حلفت عليها انها تتعشى عندي بس هي قالت بعدين

سلطان: اقول يا كثر بربستك هذي فلوس وانزلي مع سواق رهف العصر انا بدق عليه عشان يوديك وها لا تنسين لا تخلين شي ماتقشينه وبذري الفلوس كلها..

وقام ابوصالح وترك منيرة وهي مو راضية ابد على كم هالمية اللي عطاها اياها بس قالت يالله نمشي الحال فيها دامها قهوة وشاهي وبس..

—————————————————————————–
——————————-
(في المدرسة يوم الاربعاء)
رهف:بسم الله عليك ياخلود وشفيك معصبة؟؟
خلود:ياشيخة هالبنات فيهم قلة ادب حشى مو متربين في بيوت حسبي الله على اهاليهم..
رهف:يابنت الحلال لاتتحسبين على احد الحين هذولي مراهقات مايمشي معهم العند وتمشية الراي تفاهمي معهم باللتي هي احسن
خلود:يارهف انتي تعرفين انه اكره ما اكره بحياتي اني اعصب على احد او اصغر عقلي معاه بس يارهف انا حامل وتعبانة واعصابي تلفت وانا احاول امشي غلطاتهم لكن خلاص والله مايمشي معهم الا تخسيف هالدرجات..
رهف:ياخلود مساكين
خلود:المهم يارهف ماعلينا منهم اشقلتي في الموضوع؟؟
رهف نزلت عيونها بالارض:بعدين ياخلود انا عندي انتظار الحين بروحله.
خلود:يارهف لك يومين وانتي تصرفيني بس تدرين انا بروح معك هالانتظار عشان اشوف اشسالفتك؟؟
رهف:لاتكفين اجلسي خلاص عالفسحة ابجي ونتفاهم…

(في الفسحة)
خلود:ها رهف اشقلتي؟؟
رهف: ياخلود وشتبيني اقول
خلود:رهف وليد متمسك فيك ويبيك وصدقيني انا مابالغت باي شي قلته له بس هو يبيك وانا للمرة الثالثة وانا افاتحك بالموضوع وانتي تقابليني بالصمت والسرحان ترى انتي مو صغيرة يارهف
رهف: …….
خلود: وشفيك يابنت الناس تكلمي
رهف: ماودي اكره ابوي
خلود:نعم خير وشو مافهمت شدخل ابوك بالسالفة.
رهف:شوفي خلود انتي اعز صديقة عندي انا بعترف لك اعتراف انا من هذاك اليوم وليد ماراح عن بالي ابدا..
خلود:وشو اي يوم مافهمت؟؟؟
رهف:شوفي خلود تبين تقولين عني قليلة ادب تبين تقولين وقحة كيفك بس مثل ماوليد يبيني هم انا بعد ابيه
خلود: لحظه لحظه اول شي اشتقصدين اي يوم بعدين انا بقرر انتي قليلة ادب او لا
رهف:يوه خلود لا تستهبلين الحين انا كم مرة شفت وليد بحياتي
خلود:اااااه تقصدين يوم ما جا السواق ياخذك وانا ووليد وصلناك
رهف:ايوا برافو عليك
خلود: اخس يا الحب من اول نظرة
رهف: صدقيني مو حب يمكن حبيته زي اخوي او اعجبت بشخصيته وشهامته لما مارضى اني اركب ليموزين اواني انلطع بالمدرسة استنى ابوي لما ينتهي دوامه الساعه اربع العصر
خلود:طب وشتقصدين بانك تخافين تكرهين ابوك؟؟
رهف:اخاف ابوي يرفضه ويفشلكم وانا خلاص تعبت من حركات ابوي هذي بس ماوصلت معي للكره واخاف رفضه لوليد يخليني اكره ابوي واكره نفسي
خلود: اسمحيلي يارهف انتي معطيه ابوك وجه بزياااااادة حارمك من الطلعة والنزلة وبخيل عليك وقاسي معاك وفوق كل هذا والادهى والامر انه ماخذ بطاقتك الصراف وماكل راتبك اكال الوفات تنكب بحسابك شهريا ما تشوفين منها الا كل كم شهر ميتين ولا ثلاثمية وجوالك بطاقة سوا اذا خلصت هو يشحنلك بعد موشح تهزيئ ياشيخة لويهودي ماسوى ببنته كذا.,
رهف:خلود الله يخليك اللي فيني مكفيني لا تقلبين علي المواجع كل هذا انا عارفته وانتي بهالكلام بس تجرحيني لااكثر ولا اقل.. شكواي لله ياخلود
خلود: شوفي رهف اخوي وليد عارف بكل ظروفك والله وشاريك ويبيك وهو عارف انك اكبر منه بسنتين وهذا الشي مو مسببله مشكله ابدا انتي بس هاتي رقم جوال ابوك ووليد بيكلمه ومارح يقوله انه انتي صديقتي بيقوله انه سمع عن اخلاقك وعن سمعتكم الطيبة ويبيك وانشالله يارهف الله بيسهل
رهف:ما ادري ياخلود انا سرت اخاف من هالموضوع
خلود: والله مو مدهور حالتك الا خوفك من ابوك يالله بس ترى رن الجرس وانا عندي الرابعة بروح عند قرودي الحين
رهف:قرودك؟؟
خلود: اقصد طالباتي ههههههههههههههههههههه
رهف:هههههههههههههه حرام عليك ياخلود قرود مرة وحدة
خلود: والله يازين القرود عندهم بس خليني ساكته

—————————————————————————–
———————————————-
(في كارفور)
افنان: يمه تكفين ابي مناكير لون اورانج واحمر خلينا نروح عند المكياج
منيرة: انا مو نازلة اشتري هالخرابيط انا نازلة اقضي اغراض ضرورية للبيت وللضيوف وبعدين انا مانزلت حزة العصر وخواتك اثير وابرار نايمات الا عشان افتك من هالطلبات دفي الترولي وانتي ساكته
افنان: اوووووف والله لو اني دارية اني بقعد ادفلك الترولي مثل الشغالة كان ما جيت معك وكان نمت بالبيت ازين…
منيرة:اقول امشي بلا دلع ياللاه

———–
(في البيت)
ابرار:رهف وين امي؟؟
رهف وهي تسفط جلال الصلاة: ما ادري قمت من نومة العصر ما لقيتها لاهي ولا افنان في البيت
ابرار:ااااه ياراسي شكلي نمت نومة غلط بروح اسويلي نسكافية
رهف: اقول ابرار اكمل تسفيط جلال الصلاة ولا بتجين تصلين؟؟؟
ابرار: لا لا سفطيه
وعطت ابرار ظهرها لرهف بعد ما عطتها نظرة استحقار وراحت وخلتها
رهف تقول فنفسها: الله يهديك يا ابرار عمرك سار 19 والى الان ماتصلين الا في رمضان والا ايام الاختبارت
***شوي ولا دخلت منيرة الصالة وهي شايلة كم كيس بيدها ومن دون سلام
منيرة: اقول رهف الله لا يهينك شوفي ترى عبد الرزاق(السواق المصري اللي يودي رهف مدرستها) حط الاغراض عند بابا الحوش روحي يا بنيتي شيليهم ودخليهم المطبخ افنان ما فيها حيل تشيلهم تعبت يا حياتي من المشي
رهف:انشالله يمه
راحت رهف شالت الاكياس ويوم دخلتهم المطبخ كانت وراها منيرة
منيرة: اقول رهف الفاكهة والعصاير دخليها الثلاجة والكاسات الجديدة حطيهن بالدرج والتمر الحين بيجيبه عبدالرزاق عطيته فلوس بيرجع يجيبه بعد ساعه لاجابه لا تحطينه مع القديم حطيه لحاله , وشوفي تراني وصيته يجيب لنا كم صحن حلى وكم صحن فطاير حطيهم على جنب لين بكرة وانتي بعد يارهف يا بنيتي مابيك تنامين الا وانتي مزينة كم صينية حلا قهوة تعرفين صعبة يجون الضيوف ماياكلون من ورى ايدين هل البيت شي وانا الظاهر اني خلاص طفيت ابطلع اريح على سريري الين انام لا جا ابوك قوليله اني فوق
رهف وهي محولة من كثر الاوامر:…..طيب,طيب
منيرة: ولاتنسين لاتنامين الابعد ماتنظفين الحمامات وتكنسين البيت وترتبينه
رهف بعد ما استوعبت كثرة هالاوامر: ليه يمه كل هذا من بيجينا بكرة؟؟
منيرة:خالة امي المهم لاتنسين اللي وصيتك..
رهف: طيب
منيرة: الا صح وين خواتك؟؟
رهف:ابرار توها قامت من نومتها واثير من يوم ما جت من المدرسة نايمة
منيرة: طيب لاجا صالح زينيله شي ياكله واذا ابوك يبي يتعشى زينيله اللي يبي
رهف:….طيب
بعد ماراحت منيرة لفوق قعدت رهف تتذكر الاوامر وتشتغل على مهلها حبة حبة وتفكر بنفسها وتقول:
ياربي اشلون منيرة ساكته على ابرار؟؟ الحين قاعدة بالبيت لاهي جايبة خبر دراسة ولا يحزنون وتواصل الين الساعه عشر الصبح وتنام الين المغرب او العشاء
وكمان اثيرمن يوم ماتجي من مدرستها الين العشاء نايمة لا وقال ايش اذا جا صالح زينيله اكل
وهوصالح ينشاف اصلا..

بعد ماخلصت رهف من الشغل قعدت تنزل اكمام قميصها ودخلت الصالة وشافت افنان تلعب بلاي ستيشن
رهف: افنان الساعة 1الليل ماتبين تنامين
افنان وعيونها حمر وتعبانة:مالك دخل
رهف: اي والله انك صادقة مالي دخل بس رحمتك لانك من يوم مارحتي المدرسة مانمتي بس ياللاه كيفك
وكملت طريقها وهي تطلع الدرج والا تسمع صوت ضحك من المقلط وكان طالع من تحت الباب ضوء خفيف..
فتحت رهف الباب بشويش تبي تشوف من هاللي يضحك والا رهف تنصدم من المنظر الغريب اللي قدامها!!!
كانت اثير وجهها احمر ومتكية على ايديها الثنتين وعاظة شفتها ومنسجمة مع ابرار بكل مافيها وكانت ابرار في ايدها جوالها القديم وقاعدة اتكلم فيه وتضحك بصوت ناعم وكله غنج اول مرة رهف تسمع ابرار تتكلم بهالطريقة واللي خلاها تستغرب اكثر انه جوالها الحالي اللي شاريته لها امها محطوط قدامها عالارض..
انتبهت اثير لرهف ودقت ابرار على ركبتها ابرار خافت والتفتت عالباب وبسرعه قفلت الخط..
ابرار:نعم رهف خير
رهف: لا ولا شي انتم فيكم شي؟؟
ابرار: لا مافينا شي بس ياليت تطلعين وتصكين الباب وراك..
رهف مو حست انه فيه شي الا تاكدت وقفلت الباب بكل هدوء وقالت بنفسها:
الله يهديكم طب عالاقل روحوا غرفتكم وصكوا الباب موقاعدينلي بالمقلط الله يستر

——–
(اليوم الثاني)
ام صالح اللي هي منيرة متحمسة جدا وقالبة البيت فوق تحت من اول ماقامت الظهر…
سلطان: اقول حشى ميب خالتك اللي جاية كونداليزا رايس من يوم ماقمتي وانتي مشقية عمرك وتتامرين يارهف حطي يارهف شيلي..
منيرة:بسم الله على خالتي من ذيك الشرية
سلطان: اقول منيرة انتي وشعندك؟؟
منيرة: وش اللي وشعندي مافهمتك؟؟
سلطان:منيرة بلا لف ودوران انتي في حياتك ماسرتي سنعه كل ذا السنع وكريمة ياكثر الحريم اللي يجونك ماقد سويتيلهم ربع اللي قاعدة تسوينه ولا تقولين لي من ريحة امي ماقد جبتي خبر امك اصلا عشان تجيبين خبر خالتها..
ابتسمت منيرة وقعدت جنب سلطان:
والله يا سلطان مايفهمني الا انت اجل بقولك وش اللي بخاطري
سلطان: قولي انا اعرف ماتسوين شي لله
منيرة:شوف يا سلطان خالتي هذي عندها خمس عيال تزوجوا اثنين وبقوا ثلاث عزاب وكلهم يا بوصالح مناصب ولا واحد منهم راتبه اقل من العشرة الاف الا الصغير اللي بالجامعة توه بزر يدرس
سلطان: طيب انا الان موب فاهم انتي وشاللي محمسك لهالدرجة
منيرة:يابوصالح انت ماتدري ان بيتك مليان بنات؟؟
سلطان:ااااه يعني انتي تبين هالثلاثة ياخذون بناتي رهف وابرار واثير
منيرة بكل عصبية: لا وماودك تعطيهم افنان مجانا ويدخلون السحب على سيارة جيب؟؟؟
سلطان:وشفيك عصبتي يامرة وشقلت انا؟؟
منيرة:شوف يا سلطان ان تم اللي براسي وتقدم واحدن منهم لبناتي ماياخذ الا ابرار او اثير وبنتك رهف ماعليه بيجيها نصيبها وانا مابتعب كل هالتعب الا عشان اقرب خالتي مني واستفيد منها وافيد بناتي وبنتك ماشالله مستغنية مدرسة ماتحتاج واحد من عيال خالتي يصرف عليها ولا تنسى لا زوجت بنتك رهف اول من بيخسر انت خلها عندك ازينلك..
سلطان:…..
منيرة: ياللاه انا بروح اكمل باقي الشغل
***وتطلع منيرة عند غرفة بناتها وتدق الباب: اثير ابرار افتحوا
وتفتح اثير الباب وابرار كانت ممدة عالسرير تحوس فجوالها
منيرة: مابعد زينتي اللي قلتلك انتي وياها؟؟
ابرار: يووووه يمه شنزين؟؟
منيرة:تروشوا اكووا ثيابكم اللي بتلبسونها ترتبوا زينوا شعوركم
ابرار: يمه احنا جمعات العجايز ما نحبها
منيرة: اقول هذي اللي جايه مو اي وحدة ياغبية انتي وهي هذي انشالله اذا جت وشافتكم بتنفتح لك انتي واختك ابواب الرزق
اثير: مافهمت يمه
منيرة: المهم تزينوا عشان لاشافتكم تخطبكم
ابرار:صدق يمه عندها عيال شباب
منيرة:ايه وانا امك لااوصيكم في التزين والتسنع ابيكم تبيضون الوجه طيب
ابرار بغت تموت من الفرحة وعلى طول انقزت لدولاب الملابس تطلعلها لبس واثير راحت تاخذ روب الحمام والمنشفة عشان تتروش واللي يشوفهم يقول انه هالمرة اللي جاية صدق جاية تخطبهم مو بس جاية زيارة بريئة..

—————————————————————————–
————————————–

خلود: ياخوي سم بالرحمن ودق لاتخاف
وليد:اخاف اني ادق بوقت مو بزين
خلود: يا وليد الحين وقت الظهر وفيوم خميس يعني لادوامات ولا هو وقت صلاة وكل الناس بهالوقت فاظين وقاعدين وبالذات ابو رهف تلاقيه قاعد يطالع ذا الاسهم اخضر واحمر دق بس وانشالله مايسير الا كل خير
وليد: اقولك خليها بكرة بعد صلاة الجمعة ادق عليه يمكن الحين بيجيه ناس او مشغول او شي
خلود:ياوليد تراك تعتبني وانا ترى مابت عندكم من امس وتاركه رجلي لحاله بالبيت الا عشان اكون جنبك في اللحظة اللي انت تكلم فيها ابو رهف واشوف وشيسير بعيني ياللاه ياوليد توكل على الله ودق ولا تنسى ترى ولده الكبير اسمه صالح ناده ابوصالح
وليد: توكلت على الله ياللاه هذا تلفونه يرن
**ابوصالح: سم
وليد: السلام عليكم
ابوصالح: وعليكم السلام
وليد: العم ابو صالح
ابوصالح: اي نعم سم
وليد: معاك وليد ابن سالم
ابوصالح:ياهلا بك سم يا ولدي
وليد: بصراحة ياعم صالح بغيتك بموضوع خاص وابي اجيك الما بيتك واقابلك اذا تسمحلي
ابوصالح: تجي بيتي ؟؟ وفموضوع خاص؟؟ بس انا ابي اعرف وشهالموضوع الخاص قبل ماتجي وادخلك بيتي؟؟
**وليد هنا تلعثم وخاف وحس بنبرة صوت سلطان تغيرت من بعد ما كان يتكلم بكل احترام انقلبت لهجته للهجة تحقيق
وليد: بصراحة ياعم انا سمعت عنكم وعن طيب اخلاقكم من طرف حريم يقربونلي يعرفون عايلتك وانا ودي اجي يمك واطلب ايد بنتك الكبيرة
ابوصالح:…….
وليد: معي ياعم ابو صالح؟؟
ابوصالح:يسير خير انشالله كلمني بعد صلاة الجمعة بكرة وانا اوصفلك البيت ومتى ما جيت حياك الله
وليد: وهو مصدق نفسه انشالله ياعم ابوصالح بعد صلاة العصر اكون عندكم
ابوصالح: على خيرة الله
…
…….
وقفل وليد السماعة وهو مومصدق ان اول خطوة تمت بسلام وانشالله ان باقي السالفة كلها تعدي على خير ويسير هو رهف تحت سقف واحد…
خلود:وليد تكلم وشقالك؟؟
وليد:يقول دق علي بعد صلاة الجمعة ومتى ماجيت حياك الله
خلود: احلف يا وليد
وليد: وليه اكذب عليك يا خلود هذا الكلام اللي قاله لي
خلود: اجل خلني ادق على ر هف واقولها ان ابوك رحب بوليد وقاله انه يجي
وليد: طب انتي وين قايمة
خلود: استح على وجهك تبيني اكلم البنت قدامك بروح اكلمها من غرفة خواتي وانت ياعريس قول لامي وابوي عشان ابوي يروح معك بكرة
..
….
دقت خلودعلى رهف مرة ومرتين وثلاث لكن رهف كانت حاطة جوالها فوق بغرفتها وهي بالحوش قاعدة تغسله بالهوز وتمسحه لحالها لان امها السيدة منيرة قالتلها انا باكمل عنك شغل المطبخ وانتي روحي غسلي الحوش كله تراب..
**
*&*
مرت الساعات وكل شي جاهز وام صالح طلعت من العوده الغالية اللي مخبيتها للمناسبات المهمة وقعدت تلف بالبيت تدخنه.. بعد ماتاكدت ان كل شي جاهز
طلعت عند بناتها فوق ..
منيرة: ها تجهزتوا لبستوا زين؟؟
اثير: اي يمه انا خلصت
منيرة: وابرار وينهي؟؟
اثير: بالحمام تستشور شعرها
منيرة: هالبنت ماتفهم كم مرة اقولها اذا بغيتي تستشورين شعرك سشوريه بغرفتكم بس ماتفهم
اثير: يمه ابرار تقول ان ارض الغرفة بعدين بتمتلي شعر وهي ماتبي تكنس فتقول بالحمام اصرف
… ابرار طلعت من الحمام وهي وجهها احمر من المعارك الطاحنة مع كشتها:
ها يمه وشفيك تزاعقين
منيرة : مابعد خلصتي؟؟
ابرار: لا بس بقى الميك اب وخلاص
منيرة وهي تصك باب الغرفة: اسمعي انتي وهي لا تقعدونلي سندريلات كل وحدة حاطة رجل على رجل واختكم قايمتن قاعدة يعننها ام السناعة وانتوا قاعدات اقعدوا باشروا عالحريم وصبوا القهوة والشاهي وضيفوا الحلا ولا تقعدون كل شوي تطالعون بجوالاتكم ولاتداحرون بعض يا ويلكم ابيكم مؤدبات وسنعات اذا جوا لاتخلون رهف تدخل المطبخ ابد انتوا ضيفوا كل شي فهمتوا؟؟
اثير:لاتوصين حريص
ابرار: ياسلام يعني نكرف وهي الاخت مرتزة هاه؟؟
منيرة: شوفي يا ابرار هالبنية من امس وهي تحوس بالبيت وانتي مازينتي شي يعني لاقمتي وقعدتي ساعتين بس قدام هالحريم وبيضتي وجهي مابيضرك شي؟؟
ابرار: اووووف طيب
…
…..
رجعت منيرة ودخلت على رهف وهي قاعدة تكوي ثوب صالح…
منيرة: من ذا ثوبه؟؟
رهف: ثوب صالح يقول انه بيطلع بعد شوي
منيرة: طب هو تغدى؟؟
رهف: هنا جوى بالبيت ماتغدى بس يمكنه تغدى برا
منيرة: طب اذا خلصتي البسي بسرعه وتعالي اقعدي معنا لاجوا الحريم
رهف وهي مرهقة:انشالله
**راحت منيرة لغرفة الجلوس ولقت صالح متمدد وسرحان كعادته..
منيرة: صالح حبيبي وينك ماشفناك عالغدى؟؟
صالح يقوم ويحب راسه امه وايدها:
هلا يمه كنت معزوم عالغدى عند صديقي
منيرة: يا هالاصدقا ياولدي اللي خذوك مني من يوم مادخلت هالجامعة
صالح: لا تخافين على ولدك يمه كلنا شباب وجلسات عزاب مافيها شي اروح اغير جو واذاكر..
**رهف وهي شايلة ثوب صالح: خلاص صالح كويته
ياخذ صالح الثوب من ايدها بدون اي كلمة شكر
ويلبسه من تحت ورهف ماسكه له ياقة الثوب من فوق وتناظر فيه بكل محبة وحنان طول ماهو يلبس
صالح:ياللاه استاذن
منيرة: وين بعد بتروح توك جاي؟؟
صالح: الحين انتم مابيجيكم حريم وشقعد ازين هنا ابطلع
منيرة:طب اقعد مع ابوك بالملحق ؟؟
صالح: ابوي اي يبلغ لاخلاص انا طالع
منيرة:طيب مر عليه ترى له يومين ماشافك؟؟
صالح وهو طالع وعيونه بالارض ويحك راسه بيده معصب شوي: مايحتاج
قعدت رهف سرحانة وتطالع بخوها الين طلع من باب الحوش وتقول بنفسها:
يارب احميه,,, ياترى اشفيك يا صالح دايم حزين ومعصب ومالك شهية للاكل ولا لك خلق تسوي اي شي بالحياة اه يا صالح ياليتك ترجع زي ماكنت بالمتوسطة حبيب وطيب وتسولف معي وتقعد معي وتمزح وتفرح وتنبسط الحين ابتسامتك مانشوفها..
منيرة:وانتي للحي قاعدة ماودك تقومين تلبسين؟؟
رهف:هاه….انشالله هذا انا قايمة
**
وطلعت رهف لغرفتها وخذت منشفتها ودخلت تتروش بس عصبت من المنظر اللي شافته…
رهف: زي كل مرة يا ست ابرار ماتبطلين حركاتك..
كان الحمام حالته حاله كل المغسلة مليانة شعر من كشة ابرار وسشوارها محطوط على طرف المغسلة وشباصات الدنيا موزعة على البانيو ومراية المغسلة واطراف المغسلة..
رهف: حشى موب سشوار شعر حرب قامت في هذا الحمام..
خلصت رهف ترويش ودخلت غرفتها طلعتلها تنورة بني وبلوز تركواز ناعمة ونشفت شعرها بسشوار خفيف ولمت اطرافه بشباصة بنيه ولبست حلقان فيها خرز فيروزي وكحلت عيونها وحطت جلوس زهري
بعد ماخلصت رهف طلعت من غرفتها ودقت باب غرفة خواتها ودخلت….
لما دخلت رهف ما استوعبت الشي اللي قدامها ماكان من رهف الا انها تقول في نفسها (توووووووو متش)
رهف: اشهذا انتوا وين رايحين عرس اشهالفل ميك اب؟؟
ابرار: لا تبين اشكالنا كنا رايحين عزى وبعدين لو سمحتي انا كم مرة قلتلك ذوقنا يختلف عن ذوقك فعشان كذا ريحي نفسك وخلي نصايحك لك..
وطلعت ابرار من الغرفة ودفت رهف اللي كانت واقفة عند الباب…
بعدين تذكرت انها ما قالت اهم شي..
ابرار: اي والاهم من هذا كله انه عمرنا مو بعمرك عشان تبين الناس يسيرون زيك…
رمت ابرار هالكلام القاسي على رهف ونزلت تحت….
رهف وهي مو قفة سرحانة عند الباب..
اثير: رهف بغيتي شي؟؟
رهف: اي صح بس بغيت اسال عطري انسلنس اللي بشنطة المدرسة وينه؟؟
اثير: اي صح ارسلنا افنان تاخذه من شنطتك عشان نتعطر فيه ونسينا نرجعه معليش
خلاص تقدرين تاخذينه هذا هو عالكومدينة يارهف
**رهف خذت العطر وطالعه من باب الغرفة..
اثير: رهف استني شوي..
وتطير اثير لباب الغرف وتصكه وتمسك رهف وتجلسها عالسرير ورهف طايرة عيونها..
اثير: رهف صدق شكلي غلط؟؟
رهف وهي مبتسمة: لا بسم الله عليك تهبلين يا اثير..
اثير: طب وش اللي موب زين بشكلي؟؟
رهف: بالعكس كل مافيك حلو بس انتي لو تخففين من الظل الفاقع الثقيل هذا وتبقين بس على الكحل والمسكرة انعم تدرين ليه لانه هالزيارة زيارة عصر مو بسهرة وبعدين يا اثير انتي لسه عمرك 17يعني هالمكياج كله بيكبر سنك ويشوهك..
اثير: طب يعني قصدك اخفف من هالظل وبس ؟؟
رهف: ايوا وياليت كمان بدل هالاثقال اللي باذانيك تحطين حلقان خفيفة وناعمة مرة رح يكون شكلك كيوت..
اثير بعد ما اقتنعت بكلام رهف: طيب خلاص اطلعي وصكي الباب وراك
رهف ضحكت على هالطردة المحترمة وخذت عطرها وطلعت برا الغرفة…
ودخلت غرفتها وتعطرت ورجعت العطر مكانه بالشنطة وانتبهت انها من زمان ما مسكت جوالها خذت جوالها ولقت فيه ثلاث مكالمات لم يرد عليها من خلود..ومسج
كاتبة فيه (رهف بسرعة دقي علي ابيك ضروري)
خافت رهف وعورها قلبها قالت الله يستر لايكون ابوي كلمه وليد وهزاه وبسرعه دقت على خلود بس تذكرت انها ماعندها رصيد فارسلت لها كول مي
وثواني ولاخلود تدق على رهف:
خلود:انا لله انتي وهالسوا
رهف: خلود اشفيه خوفتيني
خلود: مافيه الا كل خير وشفيك انتي خايفة؟؟
رهف:طب اشفيه تكلمي
خلود: اول شي الناس اذا يبون احد مايعطونه كول مي ثاني شي الناس يقولون السلام عليكم وعليكم السلام كيفكم شخباركم ماهو ها وشفيه كني اصغر عيالك
رهف: تكفين ياخلود لايكون ابوي هزا وليد ولا قالكم شي
خلود: يا بنت الحلال مخوفتنا من ابوك عالفاضي ابوك ما قال شي
رهف:يعني اشلون ماقال شي
خلود: يعني قال حياك الله ياوليد عندي بكرة وهذي كل السالفة
رهف:خلود انتي تمزحين
خلود: والله يا رهف ما امزح وانشالله باذن الله وليد عندكم وانتي الصيفية الجاية عندنا..
رهف سرحت ومشاعر الدنيا كلها قامت تحوس بقلبها ماتدري فرح ولا حزن ولا خوف ولا احساس بالاستقرار…
خلود: اقول لوانه انتي اللي داقة ما قعدتي معي كل هالوقت ياللاه تبين شي
رهف وهي مبتسمة : لا سلامتك
خلود: تدرين لما يتزوجك وليد اول شي انطلعك بطاقة جوال بالفواتير بدل هالسوا والازعاج
رهف تضحك وفي حالة ذهول للان مو مستوعبة اللي قالته لها خلود..
خلود: شكلك متنحة انا اعرف ضحكتك لا تنحتي؟؟
رهف: خلود انا خايفة
خلود:لا تخافين يارهف دام وليد جايك بكرة وانشالله مو بطالع من عندكم الا وهو محدد الملكة والزواج بعد..
رهف: الله يقدم اللي فيه خير
خلود: ياللاه رهف اخليك الحين انا في السيارة مع زوجي وراجعة بيتي مع السلامة
رهف :….. مع السلامة
….
…..
ماجد: هذي رهف اللي بيخطبها وليد
خلود وهي تتنهد: اي هذي هي ياماجد
ماجد: الحين وراها ذي مستعجلة عالعرس انا اعرف البنات ماتدري من اللي خطبها الا لما يجونها اهلها ويقولون فلان خطبك
خلود: ياماجد رهف هذي اطيب انسانه على الوجود لكن الله طيحها باب سيئ جدا ماكنه ابوها من يوم ماتخرجت من الجامعة كل ماخطبها احد رفض يقول ليه ماحد خطبها وهي تدرس ليه ماخطبتوها الا بعد ما توظفت والبنت عايشة معه هي وزوجته عيشة الشغالات لا تلومها ياماجد اذا تتطمن انه ابوها وافق على الخطبة او لا..
ماجد: الله يعينها ويفرج كربها وكرب بنات المسلمين
خلود: امين ويتمم هالخطبة على خير…

—————————————–
(دق جرس البيت)
ودخلوا الضيوف مجلس الحريم..
منيرة: يالله حي من جانا تو مانور البيت ياخالة..
لطيفة: البيت منور باهله يا ام صالح
منيرة: تفضلوا العصير هذي بنتي ابرار..
كانت ابرار تقدم العصير بكل حياء ونعومة مصطنعة الحريم قعدوا يطالعونها من فوق لتحت صحيح انهم سلموا على بنات منيرة عند الباب بس برضك مامنع انهم يطالعونهم ويتفحصونهم بعد ماجلسوا بالمجلس..
لطيفة: ماشالله يا منيرة بناتك اكبروا اتذكر اخر مرة شفتك يوم ابرار عمره سنتين وانتي حامل في الثانية
منيرة: اي ياخالتي الايام تمشي والحمدلله اللي جمعنا فيك مرة ثانية هذي ابرار الكبيرة اولى كلية وهاللي جالسة اثيرواللي جنبها اخر العنقود افنان
لطيفة:اي ماشالله عليهم..
******
**********
..نبذة عن عائلة لطيفة ام عبدالرحمن..
لطيفة: امراة قوية شخصية وقوية باس ذكية جدا ياكثر ماغلبت رجال مات زوجها وهو كان في احدى مزارعه يراقب العمال اثر احد العمال اللي كان راكب دركتر موجود بالمزرعة وكان صوت الدركتر عالي والعامل يمشي بالدركتر مو منتبه انه ابوعبدالرحمن كان مدنق عالارض ويشيل شي من الارض ومن قوة الصوت ما انتبه ابو عبدالرحمن ان الدركتر قرب منه وللاسف انصدم ابوعبدالرحمن وتوفى حالا بعد ماجابت منه لطيفة خمس عيال وتركلهم فلوس واراضي واملاك لاتعد ولا تحصى ,,تحب عيالها حب جنوني كريمة معهم ربتهم احسن تربية وطلعتهم رجال كل واحد وظيفته احسن من الثاني..
عبدالرحمن: هو الولد الاكبر للطيفة يشغل منصب كبير في مجلس الشورى رجل مطيع لامه لابعد الحدود يعشقها عشق الجنون كريم ومن النوع البارد يدور خاطرامه في كل شي يسويه..
منى: زوجة عبدالرحمن انسانه عاقلة ومطيعة وفيها شوفة نفس اول ماتزوجت عبدالرحمن كانت تختلف مع امه كثير بس ادبها عبدالرحمن بطرقه الخاصة وسارت تسمع كلامه وتطيع امه,, عندها هي وعبدالرحمن اربع عيال اسيل واسماء وفيصل ومحمد..
تركي:الولد الثاني للطيفة دكتور بجامعة الملك سعود انسان طيب وربته امه عالطاعة والولاء يحب زوجته حب الجنون..
ايمان:زوجة تركي كل يوم تعيشه مع تركي تعتبره يوم عسل ومثل منى اول ماتزوجت تركي ما عجبها الوضع مع امه لكن تركي قوى قلبه وخيرها بين البقاء او الرجوع لبيت اهلها لكن اختارت البقاء مع حبها الابدي فيها شوية لقافة,, وعندها هي وتركي توم بنات سارة وسيرين وولد اسمه عبدالرحمن على اسم اخوه الكبير..
خالد: الولد الثالث للطيفة هو غير اخوانه كلهم يختلف عنهم بكل المقاييس مايمشي الا اللي في راسه ماحد في الوجود يقدر يغصبه على شي هو مايبيه ابدا قوي شخصيه ومتمرد جدا هو االوحيد اللي يعاند امه في كل شي يعشق السفر للخارج والسهر مع زملاءه لكنه ناجح بحياته العملية مهندس في شركة للبتروكيماويات..

عبدالاله: نقيب طيار الولد الرابع للطيفة اعزب انسان عملي ونفس تربية اخوانه عبدالرحمن وتركي ساكن بجدة ويزور اهله كل ما اخذ اجازة..

مشاري: اخر العنقود شاب مطيع لامه لدرجة انه حريم اخوانه يسمونه بينهم دلوع الماما اتكالي جدا لو تقوله امه ارمي نفسك في النار اول شي يزعل ويبرطم بعدين يقول (OK MAMY…..) كلمة توديه وكلمه تجيبه ثالث جامعه حاسب الي..
………
…………..
…..
منيرة: ماعرفتينا ياخالتي ام عبدالرحمن على حريم عيالك.؟؟
لطيفة : تامرين يا ام صالح هذي منى زوجة ولدي عبدالرحمن والثانية ايمان زوجة تركي..
منيرة: اي ماشالله لا اله الا الله مازوجتي الا اثنين من عيالك بس؟؟
لطيفة: اي يا ام صالح وعبدالاله في الطريق..
منيرة بلمت ومو فاهمة وشقصدها انه في الطريق..
لطيفة: خطبناله وحدة من اقاربنا وانشالله زواجه بالصيفية
منيرة انقلب وجهها وخربت ملامحها وقالت بنفسها هذا عبدالاله وراح وانا بغيت عبدالاله لاثير وخالدلابرار بس الظاهر يا اثير ان مالك بالطيب نصيب ياللاه بس الحمدلله اهم شي خالد وانشالله باذن الله يا ابرار انه من نصيبك واثير بيجيها رزقها..
لطيفة: الا اقول ماشالله بيتكم هذا ملك يا ام صالح؟؟
منيرة: اي الحمدلله يا خالتي
لطيفة: الا صح انا اتذكر انك تزوجتي ابو صالح وهو عنده بنت من زوجته الاولى الله يرحمها وينها اعرست..
وتتذكر منيرة انها قايلة لرهف تنزل قبل ما يجون بس وينهي الله يفشل العدو لا يحسبوني الحين طاردتها لاتقعد معنا وياخذون فكرة اني شريه عليها..
منيرة: لا والله يا خالتي ما اعرست ما بعد جاها نصيبها وهي فوق الظاهر انها تصحح ولا تحضر افنان وانا امك روحي نادي اختك؟؟
منى: ليه هي ماشالله مدرسة
منيرة:…هاه اي اي مدرسه….
….
……..
وتطلع افنان وتدخل على رهف وتلقاها جالسه على طرف السرير وعيونها عالارض سرحانة تفكر بوليد اذا جا بكرة وابوها هل بيسوي مثل كل مرة ويطرده..

افنان: ماشالله انا شغالة سايرة طالعة نازلة اناديك ياست رهف
رهف: احد يدخل من غير مايدق الباب ويصرخ على الناس؟؟
افنان: اقوووول انا مو وحدة من طالباتك عشان ادق عليك الباب وبعدين خير ليه ماتنزلين الناس تحت وانتي قاعدة مسويه عمرك سندريلا ومرة ابوك مخبيتك ياللاه اخلصي انزلي امي تبيك..
رهف:يووه نسيت,, الحين الله يعيني على امي منيرة بتقعد تقولي ليه مانزلتي عاونتي خواتك؟؟
..
…
وتنزل رهف بعد ماشافت نفسها نظرة اخيرة بالمراية وتدخل مجلس الحريم …
رهف: السلام عليكم
الجميع بعد تتنيح استمر لمدة ثواني :….. وعليكم السلام
جت رهف ومسكت ام عبدالرحمن وسلمت عليها وعلى راسها وبعدين على حريم عيالها …
وجلست على كنبة لشخص واحد وعينها بالارض كعادتها..
ام عبد الرحمن لا اراديا قعدت متنحة في رهف ,,,,
ونست انها خلصت كاسة عصيرها قامت مدت ايدها الما الطاولة وهي عينها مانزلت من على رهف وخذت الكاسة وحطتها على فمها تستنى العصير ينزل بس التفتت منى زوجة ولدها عليها :
ياعمه عصيرك خلص كاستك فاظية مافيها شي عطشانه تبينهم يزيدونك
ام عبدالرحمن: هاه لا لا خلاص ارتويت
ام عبدالرحمن: ماشالله انتي رهف
رهف: اي نعم
الكل: ماشالله تبارك الله
منيرة طارت عيونها وعلى طول التفتت على رهف: رهف وانا امك شيلي كاسات العصير وجيبي الحلا والقهوة..
رهف: انشالله
وقامت رهف تشيل كاسات العصير وتحطها بالصينية والكل عيونهم مانزلت من عليها..
منيرة يوم شافت انه نظرات الاعجاب تزداد بهالرهف عصبت وتذكرت انه المفروض تقوم بناتها وبس مو رهف..
منيرة بعصبية: ابرار اثير قوموا ساعدوا اختكم..
….
……
وتمت الجلسة سوالف وحش وهذي تزوجت وهذي تطلقت وهذي ماتت وهذي انكسرت وهذي انمصعت وكل شوي عيون ام عبدالرحمن تطيح على رهف وهي ساكته ولا تتكلم وتنقل نظراتها بكل وحدة تتكلم بالمجلس واذا طاحت عيونها بعيون ام عبدالرحمن استحت ونزلت راسها على عكس ابرار اللي كانت ضحكاتها رنانة وتتكلم عن ستار اكاديمي وعن الموضة وعباية الراس وعباية الكتف وانه الغطا مو شي اكيد على ان البنت محترمة ومؤدبة وهالكلام ماعجب ام عبد الرحمن ابدا…
كان الكل يسولف الا رهف سرحانة وبعالم ثاني كل تفكيرها منحصر ببكرة وايش رح يسير بين وليد وابوها وكل ماجت تقوم للمطبخ جلستها ام صالح وقالتله ارتاحي خواتك بيزينون كل شي..
****
…….
:::::::::::
:::::::::::::::
ايمان:ولا ها يارهف انتي وشرايك..
رهف تطالع وهي طايرة عيونها ولاتدري اش السالفة,,,,,,
منى: لارهف ابد مو معنا الظاهر كل تفكيرها بالمدرسة وطالباتها او انها خلاص طفشت منا ومن سوالفنا وتبينا نروح..
رهف: لا والله ابد بالعكس منورين بس يمكني مصدعه شوي
ايمان:لا سلامتك ماتشوفين شر بس احنا نحكي عن سواقة الحريم للسيارات بالسعودية..
قامت رهف ابتسمت وقالت فنفسها اشوا اني كنت سرحانة لان الموضوع جدا سخيف..
ايمان: هايارهف قوليلنا رايك في هالموضوع..
رهف: والله يا ايمان الراي لاصحاب الراي مجلس الشورى والامير نايف الله يحفظه ,,,,,احنا عندنا بالسعودية السواقة ممنوعة منعا باتا ..
ابرار: دارين انها ممنوعة ماجبتي شي جديد بس المفروض مايمنعونها لان السواقة لنا شي ضروري وخلاص احنا عدينا من مرحلة التخلف والواحد يصك على بناته ولا في طلعه الا يا معاه يا مع اخوها الحين البنت لها حاجيات ومشاوير لازم الوحدة تقضيها بنفسها مو تقعد تستنى رحمة هالرجال..
قامت رهف ابتسمت وقالت: لا سمحوا بالسواقة ذيك الساعة يسير خير,,,,
منى :بس انتي ماقلتيلنا لا سمحوا للسواقة بتسوقين يا رهف؟؟
رهف: لا والله معليش انا خوافة مرة ما اتخيل نفسي ورى دركسون واسوق واذا صار هالشي اتوقع انه نص شباب الرياض بيكونون بالمستشفيات لاني مابخلي احد مابصدم فيه..
الكل ضحك والتفتت منى على اثير: وانتي يا اثير بتسوقين؟؟
اثير: والله انا ما اعرف الا اسوق بالبلاي ستيشن سبيد ويخب علي..
تعالت الضحكات بزيادة بعد تعليق اثير البريء
ابرار: لا والله انا الصراحة اذا سمحوا بالسواقة والله والله مابخلي مكان سوق قهوة ما اروحها ولا اخلي شارع ما افرفر..
هنا منيرة ناظرت في ابرار نظرات كلها تهديد ودها تقوم تسطرها عشان تستحي على وجهها وتبطل كلام هالمراهقات اللي مايمشي عند العجايز امثال ام عبدالرحمن.
منى:الا صح يارهف انتي شتدرسين؟
رهف:ادرس مادة احياء
منى: او ماشالله
ايمان:كم لك سنه تدرسين الحين يارهف؟
رهف: خمس سنين
منى: ماشالله تبارك الله
—–
———
مرت الزيارة على سلام وجا سواق ام عبد الرحمن وراحت بعد ما خذت من ام صالح وعد انها تزورها هي وبناتها ورهف…
***
*****
*******
وليد: ها يبه اشقلت؟؟
ابو وليد: والله ياولدي الراي رايك والشور شورك دام اختك متاكدة من اخلاق البنت والبنت سمعتها طيبة توكلنا على الله..
بس اسمع ياولدي هما البنية تقول ان ابوها شري وكذا مرة فشل ناس جو يخطبونها وشاللي يضمنك انك ماتلحق اللي قبلك .. وبعدين ياولدي ياكثر بنات جماعاتنا وشزينهم وشحلاتهم وبنات رجال اذا تبي طالبة واذا تبي موظفة وناس سمعهتم طيبة وهذي على حد علمي انها اكبر منك بسنتين خذلك وحدة اصغر منك ياولدي ازين تدلعك وتدلعها وتشيلك اذا كبرت ..
وليد: يبه انا ابيها هالبنية حتى لو ماكانت منا وفينا وحتى لو اكبر مني سبحان الله مع اني لاقد شفتها ولا حتى سمعت صوتها الا اني متعلق فيها بمجرد ماتكلمت عنها خلود كذا مرة… وبعدين يا يبه اذا على سالفة اكبر مني لاتنسى ان الرسول عليه الصلاة والسلام تزوج خديجة رضي الله عنها وهي اكبر منه بعشرين سنه مو بس سنتين وبعدين يا يبه البنيه كريمة مابخلت على ابوها وهو مذوقها الويل,,,و انشالله اذا الله كتبلي بنصيب اني اتزوجها بتساعدني ولا تنسى يا يبه انه وظيفتي مو لاهناك..
ابو وليد بعد صمت: ….. الله يقدم اللي فيه الخير الحين الوقت تاخر روح وانا ابوك ريح ونام وبكرة الله يحلها… الا صح متى بنروح عندهم؟؟
وليد: انا اباخذ الوصف بعد صلاة الجمعة والروحة عندهم بعد صلاة العصر..
ابو وليد: على خير انشالله..
——-
———-
عبدالرحمن: هايمه كيف قرايبك اللي رحتيلهم اليوم؟؟
ام عبدالرحمن: اي ماعليهم الله يستر عليهم
عبدالرحمن: عسى استانستوا
ام عبدالرحمن: ايه الحمد للله الا ما كلمك اخوك عبدالاله ,,اليوم انا ماسمعت صوته؟؟
عبدالرحمن:الا يمه كلمني ودق على جوالك بس انتي ناسيته فوق مكتبة التلفزيون
ام عبدالرحمن: شخباره
عبدالرحمن :يسلم عليك بعدين يا يمه هو كل يوم يكلمك بياثر لو مر يوم ماسمعتي صوته؟؟
ام عبدالرحمن: ياولدي لو يمر يوم ماسمعت فيه صوت واحد منكم ابنهبل
عبدالرحمن: طب وخالد ياكثر مايغيب عليك بالاسابيع وانت ماتسمعين صوته
ام عبدالرحمن: خل خالد دواه عندي بس اسمع ماقالك عبدالاله ابو خطيبته متى يبي العرس باي شهر؟؟
عبدالرحمن: لاوالله ماظنيت انه فاتحه بهالموضوع لو فاتح عمه وحدد معه شي كان قالي
ام عبدالرحمن: ايه زييين اشواا
عبدالرحمن: ليه اشوا انتي ودك العرس يتاجل يمه بس اللي اعرفه انك مستعجله على زواج عبدالاله اكثر منه؟؟
ام عبدالرحمن: لا ما ودي يتاجل بس ودي يستنى اخوه خالد الين نخطبله ويعرسون مع بعض
عبدالرحمن يضحك ويناظر لامه بعين عتب:
يا الله يا يمه ما تعبتي من هالسالفة رجعتي على سالفة انك تخطبين لخالد
ام عبدالرحمن: شوف يا عبدالرحمن اخوك هذا بيتزوج مع اخوه الصيفية الجاية لا وبيتزوج البنت اللي اختارها له مو اي وحدة وبيسمع كلامي زيه زيكم اخوه عبدالاله اصغر منه بثلاث سنين بيعرس وهو معند ولا يبي ليه وشعنده..
عبدالرحمن:يايمه انتي ماتعبتي من المشاكل ريحي عمرك ولاعليك منه والزواج يايمه مايجي بالغصب ومصيره بيتزوج الحين ولا بكرة
ام عبدالرحمن ساكته وسرحانه:
الله يهديه هالولد ماحد تعبني منكم زي ماتعبني هالولد وهبل فيني لكن ماش البنية دخلت براسي وبيعرس مع اخوه على هالبنية يعني بيعرس عليها
عبدالرحمن: اي بنيه يمه؟؟
ام عبدالرحمن: شفت بنت اختي اللي رحت عندها اليوم؟؟ ماشالله ياعبدالرحمن يارجلها عنده بنية تاخذ العقل مزيونة ومحترمة ورزينة وعاقلة لا وبعد مدرسه واذا ماخاب ظني انها ماهي بصغر منه بواجد اويمكنها في سنه بعد ..
عبدالرحمن: في سنه وللحين ماتزوجت لايكون تعبانه يمه ولا سمعتها ماش تكفين يمه الولد يالله يالله قدرنا نمسكه لاتخلينا ندبسه بوحدة ماتصلح همن يجيب العيد لا اخذها ويقول هذي خيرتكم تكفين يايمه الا الزواج يبيله اختيار صح
ام عبدالرحمن: لا لا ياعبدالرحمن انا نظرتي ما تخيب وياكثر ماشفت بنات مزايين ومارتحت لهن ولا خطبتهن لكم وبالاخير طلعت نظرتي فيهن صح وهذا انا اخترت لك وللثاني وللثالث وكلكم مرتاحين معهن صح ولا لا؟؟
بعدين ياولدي باين على ذا البنية انها بنت حلال وبنت اخيتي موريتها الويل منيرة واعرفها من يوم هي صغيرة كلبتن جربا وانا اعرف شطانتها وقلة ادبها ولعانتها خطبها ولد عمها وهبلت فيه وفي امه وفي عمها ولا تحشم لا صغير ولا كبير الين ولد عمها عرف لعمره وطلقها قبل لا يتوهق ورجع اخذها سلطان ابو هالبنية عشان تربيله بنته وتعاونه فيها ويوم اخذها مسكت البنت وعذبتها وطردتها عند جدتها ام ابوها ويوم ماتت الجدة الناس كلوا وجهها هي ورجلها ورجعت خذتها عندهم
وباين من عيون هالبنية انها مطيعة وحشيمة والدليل انها مستحملة العيشة مع منيرة وابوها..
عبدالرحمن:ابوها ليه اشفيه ابوها بعد وشمزين؟
ام عبدالرحمن: ابوها سامعتن عنه من يوم انا لسه بحايل وعن لعانته يقولون ان كل ما جا احد تقدم لهالبنية المسيكينة رفظة ومسح فيه الارض كل هذا طمع براتبها واللي اسمعه ان المسكينة ساكته ولا تقدر تقوله حرف ومسلمه امرها لله
عبدالرحمن: اعوذ بالله طيب يمه انتي ماتخافين لارحتي تخطبينها يسوي نفس اللي سواه باللي قبلنا وبعدين يمه انتي بتزوجين خالد عشان تفككين عقد بنات الناس وتصلحين الكون؟؟
ام عبدالرحمن: لا تنسى ان منيرة بنت اختي وانا اعرف اشلون اخليها توافق وهي لاوافقت سلطان غصبن عنه بيوافق,,,, وانا مابي افكك عقد احد على قولتك او اصلح الكون ,,البنت عاجبتني وانا احس انه مابيعقل خالد الا هالبنية..
عبدالرحمن:بالاول خلي خالد يوافق بعدين ابدي اقنعي منيرة على قولتك

• حقك علي ان كنت زعلان
• رواية حقك علي أن كنت زعلان
• لو كنت زعلان