اشهی اكلات رمضان منال العالم

طريقة عمل الديك الرومى محشى بطريقة منال العالم
نقدم لكم اشهى و اجمل وصفات و اكلات منال العالم من خلال منتدى انوثتك ,, ان شاء تعجبكم
اول حاجه سيبته يفك براحته خالص فى ميه وشوية ملح صغيرين علشان ميتهريش و بعدين خلطت ملح ودقيق وخل مع بعض وغسلته بيهم كويس من جوه ومن بره وسيبته منقوع فيهم ربع ساعه علشان اى زفارة وبعدين غسلته كويس

ركزوا بقى علشان احنا حنعمل مقادير لتلات حاجات مختلفة ( الصينيه اللى هنسوى فيها – الحشو – تتبيلالديك )
الصينية الاول : هنقطع بصل حلقات وجزر شرايح سميكة لو عايزة وانا محطيتهاش لان جوزى مش بيحبه ومعاهم بقدونس وكسبرة وشبت مفرومين و 10 فصوص توم مقطعين شرايح لو مفيش يبقى مفروم زى مانا عملت ومية تقريبا تلت الصينية ونسيبها على جنب

الحشو بقى :
انا الديك بتاعى كان صغير تقريبا 4 كيلو لو اكبر من كده هتضاعفى الكمية
1/22 اتنين ونص كوب رز مصرى
1/2 كيلو كبد فراخ وممكن معاها قوانص وهنقطع معاها الكبده والقلب بتوع الديك
1/2 معلقة كبيرة بهارات – 1/2 معلقة كبيرة زعتر ناشف
1 معلقة صغيرة قرفة – 1/2 معلقة صغيرة حبهان – ورقتين لورا مقطعين صغير
1 معلقة كبيرة ملح – 1/4 معلقة صغيرة فلفل اسود
1 معلقة صغيرة كمون – 1 معلقة صغيرة كزبرة ناشفة
1/4 كوب زيت ذرة – 1/4 كوب زيت زيتون
2 بصلة كبيرة مفرومة – 3 فصوص توم مفرومين
1 قرن فلفل اخضر مقطع مكعبات صغيرة
1/2 طمطماية مقطعه مكعبات ( او فلفل اصفر واحمر حلو بدالها)
بقدونس وشبت وكزبرة مفرومين ربع كوباية
1/4 كوبايه زبيب – ولو عندك مكسرات وحبيتى تحطى ماشى ( لوز وصنوبر)

هننقع الكبده فى خل وفلفل اسود علشان الزفارة ربع ساعة ونغسلهم ونقطعهم
وننقع الرز نص ساعة ونصفيه
هنسخن الزيت ( الذرة والزيتون) ونشوح فيه البصل والتوم واول ريحتهم متبدى تطلع نقلب معاهم الكبدة تقليبة وبعدين نقلب عليهم الفلفل الرومى والطماطم والبقدونس والشبت والكزبرة ونقلب كويس وبعدين نضيف الرز ونقلب كويس وبعدين نص كمية البهارات بس ونقلب كويس ونحط ميه يدوب تغطيه ونوطى عليه يدوب يشرب ميته ونطفى عليه
بعد كده هنقلب عليه الزبيب والمكسرات لو استخدمناها

على الرز ميستوى نص سوا هنتبل الديك بتاعنا

2/1 كوباية زبدة – 1/2 معلقة كبيرة ريحان مفروم
2/1 معلقة كبيرة زعتر ناشف – 1/2 كوباية عصير ليمون
2/1 معلقة كبيرة بشر ليمون – 5 فص توم مفروم
باقى البهارات بتاعتنا – 1 معلقة صغيرة شطة

هنقلب كله على بعضه وندهن بيهم الديك كويس قوى من جوه ومن بره ومن تحت الجلد بس نفتح من تحت الجلد من ناحية الرقبة مش ولو فضل شوية من اللتتبيله دى منرميهاش هنسيبها ونرشها على الديك بعد منحشيه .

هنحشى الديك بخلطة الرز بتاعتنا ومنكبسهوش قوى علشان الرز لسه هيزيد حجمه شويه ونضم رجليه مع بعض بفويل ونشيله هيلا بيلا ونحطه فى الصيبنية اللى مجهزينها من البدايه بحلقات البصل ونرش باقى التتبيلة والميه اللى فى القالب المفروض تبقى واصلة لنص الديك على الوش ونغطيه بفويل ونحطه فى فرن عالى جدا لمدة ساعتين ونص لتلات ساعات انا خد معايا 3 ساعات علشان يبقى مستوى كويس ونبص عليه كل شوية لو المية نشفت شوية نسخن ميه ونزوده وبعدين دقيقتين تحت الشواية وريحته كانت روووووووووووووووووعه والصوص بتاعه كان جامد جداااااا.

وادى صورة المرحوووم ….

انا معملتش معاه رز لاننا اكتفينا بالرز بتاع الحشو وعملت معاه سلطة خضرا وبسله بالجزر وسلطة زبادى وبرده انا اللى عامله الزبادى فى البيت …….. وبس خلاص

وصورة جماعية …….

وكمان واحده علشان خاطركوااااااا……..

=============================