هتكلم عن البوتوكس والحقن بالفيلر، وامتى نبدا نستخدم العلاجات دي.. وازاي نحافظ على بشرتنا في سن مبكرة.
ايه هو البوتوكس
البوتوكس هو مادة بتستخدم في حقن العضلات المسببة للتجاعيد والكرمشة، وبعد ما يتم حقن هذه العضلات بالبوتوكس بيساعدها على الارتخاء، وبتخلي الوجه مستريح اكتر ومافيش اثر للتجاعيد، وده بنستخدمه لحقن المنطقة العليا فقط في الوجه يعني عند منطقة الجبهة والمنطقة بين الحاجبين وجانب العين وتحت العين، لكن مابيستخدمش في منطقة الخدود او الفم، وكمان الرقبة ممكن يستخدم لحالات معينة لكن مش كل الحالات.
وهو علاج غير دائم، وبيستمر مفعوله في الفترة بين 4 : 6 شهور، وبيتحقن كل فترة.
امتى نبدا نستخدم البوتوكس كعلاج ؟
وبالنسبة للبنات اللي بتسال امتى ممكن نبدا نحقن بوتوكس؛ فانا شايفة انه كل ما كان بدري كل ما يبقى افضل؛ لان لو تعبيرات الوش جامدة شوية ممكن مع الوقت بتحفر في الجلد نفسه وبتسيب اثر، حتى بعد ما يتم حقنها بالبوتوكس بتحتاج علاج تاني علشان الحفر او الخطوط دي تتشد، فوقت ما نبدا نحس ان تعبيرات وشنا هتسيب علامة يبقى لازم نحقنها بالبوتوكس.
الاثار الجانبية للبوتوكس
طبعا زي اي علاج تاني البوتوكس بيكون له اثار جانبية، ولكن ده بيتوقف على الدكتور المعالج ومدى خبرته وكفاءته في الحقن؛ لان حقن البوتوكس بيكون له مقاسات معينة ومقدار معين، يعني مثلا لو اتحقن في عين زيادة عن العين التانية ممكن يخلي حاجب مرفوع عن التاني وهكذا، لكن الشيء المطمئن ان مفعوله بيستمر 4 شهور فقط، وبعدين هيرجع تاني عادي بعد ما تخلص المدة دي.
كمان كتير من البنات بتخاف من حقن البوتوكس؛ لانها بتحس ان ده هيخلي تعبيرات الوش ثابتة كانها لابسة ماسك، وده طبعا زي ما قلنا اننا ماينفعش نحقن به كل منطقة في الوش واللي ممكن لما تتحقن يبقى شكلها ونتيجتها غير مقبولة زي مثلا المنطقة تحت الحاجب او عند الفم؛ لان دي مابتخليش فيه حرية في التعبير بالحاجب او في الابتسامة، كمان بعد فترة العضلات دي بتضعف ومش بينفع معاها بوتوكس او غيره.
****************************** *****
ايه هو الفيلر
بالنسبة للفيلر فده بنستخدمه للتجاعيد اللي في الخدود، وده عبارة عن تعبئة للجلد، وكانت في الاول التعبئة دي بمادة الكولاجين لكن بعد كده بقت بمادة الهايلرونيك اسيد؛ ودي اكتر مادة امنة حاليا، بتستخدم علشان نملا الكسرات اللي جنب الشفايف والخدود واللي ممكن تخلي شكلنا اكبر في السن، لكن بعد ما نعمل الفيلر بيخلي الوش صافي ومشدود، وبيستمر مفعوله فترة طويلة، وكل مدة بيزيد مفعوله اكتر.
نفس المادة دي بنستخدمها لحقن الشفايف، وطبعا لازم ناخد بالنا اننا مانزودش اوي في حقن الشفايف؛ لان بيبقى شكلها غريب ومش مقبولة نهائي، يعني مثلا الممثلات الغربيات دايما بيستخدموا الحقن ده ولكن بشكل صحيح؛ لان حقن الشفايف بيستخدم علشان يوصل الشفايف لنسب معقولة وطبيعية، واحيانا فيه بنات بتكون عندها شفة اكبر من التانية او بتكون رفيعة جدا، لدرجة انها بتكون مش باينة، وفي الحالات دي بنحقنها فيلر علشان يخلي شكلها احلى وفي نفس الوقت طبيعية.
نتيجة الفيلر بتظهر تقريبا في نفس اليوم، وهي امنة جدا، والشيء الجيد في الموضوع ده هو انه مافيهوش جراحة او تخدير، ولو حصل اي حاجة غير متوقعة بتكون تحت السيطرة، الا في حالة انه حدثت حساسية مفاجاة ودي حاجة مانقدرش نتوقعها قبلها، ودي من الاثار الجانبية لحقن الفيلر بالاضافة لمدى حساسية الطبيب ومدى قدرته على ملاحظة العيب اللي في الوش والنسب اللي الوش هيحتاجها علشان يبقى متجانس تماما، ودي بتحتاج موهبة للدكتور بالاضافة للدراسة والخبرة.
فيه خطا شائع ان الخدود السفلية او اللي عند منطقة الذقن وحولها ممكن نحقنها علشان تبقى منفوخة، وده طبعا شيء غير صحيح؛ لان الخدود بتتحقن عند منطقة عظمة الخد او المثلث اللي بيكون تحت العين فقط، لكن لو الخدود اتحقنت من تحت هتخلي الشكل غير طبيعي زي الشخص اللي بيعالج بالكورتيزون اللي بيسبب انتفاخ الوجه كله.
امتى نقدر نستخدم البوتوكس والفيلر
طبعا مش مجرد ما نبدا ندخل في الثلاثينات نلجا للعلاجات دي على طول، ولكن فيه مراحل تانية ممكن نمر بها؛ وهي مرحلة العناية بالبشرة؛ بمعنى اننا نستخدم لبشرتنا الحاجات اللي بتكون محتاجاها زي مثلا:
1 / الصن بلوك:
وده من غيره هيكون البوتوكس والفيلر عديم النفع؛ لان الجلد هيكون محروق ونسبة التجاعيد كبيرة جدا مانقدرش نتحكم فيها، وعلشان كده مهم اننا نستخدم الصن بلوك؛ بحيث اننا لما نلجا للعلاج بالبوتوكس او الفيلر تكون البشرة مستعدة وجاهزة ومستجيبة للعلاج.
والصن بلوك اللي بانصح بيه هو “ماط فورميلا” وهو مخصوص للبشرة الدهنية؛ لانه مابيحتويش على اي دهون او زيوت ويبيقى لونه شفاف، وده بيتحط بعد ما نغسل وشنا قبل ما نحط اي ماكياج، ولو هتحطي كريم مرطب يبقى تحطي الكريم الاول وبعدين الصن بلوك، يعني تحاولي تخليه اخر طبقة كريم على الوش؛ لانه بيعمل حماية ووقاية للبشرة.
والهدف من الصن بلوك مش انه يحمي من اشعة الشمس الجامدة في الصيف؛ لكن الهدف هو الوقاية من الاشعة فوق البنفسجية الناتجة من الشمس سواء في الصيف او الشتاء؛ لان الاشعة دي بتدمر خلايا البشرة شكلا ووظيفيا، والاشعة دي بتحول خلايا الجلد وتسرطنها، وعلشان كده سرطان الجلد منتشر جدا في اوروبا رغم ان الشمس فيها مش قوية، ولكنها بتحتوي على الاشعة فوق البنفسجية بنسبة كبيرة، يمكن الاشعة دي مش موجودة عندنا بنسبة عالية ومش بتسبب سرطان الجلد، ولكنها بتاثر على الملامح وتغير شكل الجلد.
2/ كريم بديل البوتوكس:
الكريم التاني اللي ممكن نستخدمه قبل ما نبدا علاج البوتوكس والفيلر هو كريم بديل للبوتوكس؛ لانه بيعمل نفس التاثير وهو انه بيرخي العضلات المسببة للتجاعيد، ولكن طبعا حقن البوتوكس بيكون تاثيره اكبر واسرع وبيعمل شلل للعضلات، ولكن الكريم بنستعمله في مرحلة مبكرة شوية علشان يريح العضلات، يعني مثلا لو بنت في العشرينات وتعبيرات وشها جامدة تقدر تستخدم الكريم عادي، وده هياخر السن اللي ممكن تحتاج فيه لحقن البوتوكس.
3 / كريم تقشير:
كمان بنات كتير بتشتكي دايما ان وشها لونه مش موحد او انه فيه نمش او فيه مناطق غامقة، والحالات دي بنستخدم لها كريمات مقشرة، وهنبقى نتناول موضوع التقشير ودرجاته وانواعه في حلقات قادمة، ولكن الكريمات المقشرة دي ابسط حاجة نقدر نستخدمها، وهو يعتبر مقشر لطيف للبشرة بيستخدم يوميا علشان يخلص البشرة من البقع، وبيعمل تجديد دايما لخلايا البشرة، ويعمل على ازالة للخلايا الميتة او المحروقة ويطلع خلايا جديدة، وهو امن جدا في الاستخدام.
4 / مقوي اظافر:
من المشكلات الشائعة ايضا للبنات هو موضوع الاظافر وانها مابتطولش او انها بتتكسر، ودي من المشكلات اللي بتضايق كتير من البنات، وبتضطر انها تقص اظافرها علشان تتفادى المشكلات دي، وعلشان نعالجها لازم نستخدم مقوي اظافر، وده غير المنتجات اللي بتستخدم لتجميل الاظافر او المادة الملمعة اللي بندهنها على الاظافر، ولكن ده كريم بنحطه على راس الاظافر او منطقة التقاء الاظافر مع الجلد؛ والمنطقة دي هي المسئولة عن انتاج الاظافر، والكريم ده بيستخدم علشان يقويهم ويطلع اظافر صحية واقوى مع الاستمرار في الاستخدام.
* من الحاجات المهمة اللي بانصح البنات بيها هو اننا مانملش ان العلاج ممكن يطول؛ لان خلايا البشرة بتتغير بالسنين والعلاج بيحتاج شهور، فلازم نستمر في العلاج لحد ما يجيب النتيجة اللي احنا عايزينها، يعني مش ننتظر ان النتيجة تبان بشكل فوري وسريع.
****************************** *************
* ملحوووظة *
* الكريم بديل البوتكس :
اسمه Max من ماركة Genove الاسبانية , و بيتجاب من الصيدلية
ومقوى الاظافر : nail repair
