حكم عن الردي

 

 

جربت في الدنيا تجاريب شايب
وعرفت خلاني وميزت الاصحاب

وعرفت طبع الناس مخطي وصايب
ماني بخبل تخدعه ضحكة الناب

وجنبت اانا العالم وبعض القرايب
البعض منهم قربهم عقرب وداب×

لو كان تعطيهم عيونك وهايب
ماينفعونك جيدهم عند الاجناب

ناس يعادونك بليا سبايب
حط الحواجز دونهم واغلق الباب

بعض البشر قلبه من الحقد عايب×
لافيه طب وقلبه اسود من غراب

عنده نجاحك من كبار المصايب
واذا سمع مدحك من الغير ينصاب

لولا الحيا سالت دموعه سكايب
مسكين من نار الحسد ماكل تراااب

اللي يذمك كل ماصرت غايب
وان جيت قدم لك تراحيب واعجاب

كبه ترى مثله مع الناس خايب
عادات ابو وجهين يكذب ويغتاب

لو تغرقه بالطيب ماهو بطايب
لاتنخدع في مثل شرواه لو طاب

تبقى الحقيقه يا زمان العجايب
الروس روس ولو يغارون الاذناب

 

• حكم عن الردي