طريقة مربى الجزر

المقادير : كيلو جزر . كيلو برتقال بلدى . كيلو سكر . 2 ليمونه . 2 قرنقل او كبديل وده اللى عملته عندى عشان مش عندى القرنفل حطيت معلقه صغيرة فانيليا
بس للامانه انا عملت نص الكميه عشان مفيش غير انا وجوزى بس
ادعولى بقا ربنا يكرمنى بالذريه الصالحه عشان اعمل بالعشرين كيلو

الخطوات بقا : نقشر الجزر ونبشرة ونحط عليه السكر ونقلبه ونسيبة فى التلاجه لتانى يوم عشان يكون نزل ميته وده هيكون شكله

ناخده بقا ونصفى الجزر من الميه وده شكله لما فصلت الميه من الجزر

ونضيف عصير البرتقال واليمون لميه الجزر دى

ناخد الميه دى بقا ونحطها على النار لمده 10 دقايق وبعديها نضيف الجزر ونسيبه لحد ما يستوى
بياخد تقريبا زى ساعه على النار واذا حسيتى ان الميه نشفت ضيفى شوية صغيرين وده شكله وهو على النار

بعد الصور دى سبته زى 10 دقايق وطفيت عليه وسبته لما يبرد شوية

وهو دافى فضيته فى البرطمان وحطيته فى التلاجه

ووقت التقديم فضيتها فى الطبق بجد طعمها لذيذ اوى وبالف هنا وشفا