لحمة ضانى مشوية
لحمة ضاني مشوية
المقادير:
• لحمة ضاني مقطعة مكعبات متوسطة الحجم او “ريش”.
• كوب كبير عصير طماطم.
• ملعقة صغيرة فلفل اسود.
• ملعقة صغيرة شطة حمراء ناعمة.
• 10 فصوص ثوم.
• ملعقة كبيرة خل ابيض.
• ملعقة كبيرة كمون مطحون.
• 1 حبة جوزة الطيب مبشورة ناعم.
• 1 بصلة كبيرة.
• فلفل رومي اخضر.
• نص فنجان زيت.
الطريقة:
1. هنجيب اللحمة ونغسلها كويس.
2. هنجهز تتبيلة اللحمة وهي عبارة عن “الزيت + الخل + الكمون
+ جوزة الطيب + البصلة + عصير الطماطم + الفلفل الاسود +
الفلفل الاخضر + الثوم + الشطة” ونضربهم مع بعض في الخلاط.
3. بعد كده هنجيب صينية وندهنها بالخليط ده وبعد كده نبدا في
رص اللحمة في صورة طبقات وبين كل طبقة وطبقة نحط خلطة
التتبيل…
4. بعد ما نخلص من رص اللحمة نحطها وخليط التتبيل في التلاجة
لمدة 3 ساعات، بعد كده نخرجها ونشويها على الشواية الكهرباء او
الفحم…
وبالهنا والشفا
فخد ضاني في الفرن مع ارز بالخلطة
المقادير:
• فخدة ضاني.
• كيلو فلفل رومي احمر.
• 4علب زبادي.
• 5معالق صغيرة خل تفاح.
• كيلو رز.
• كوباية كبيرة زيت.
• 2 ملعقة كبيره ملح.
• 2ملعقة كبيرة عسل ابيض.
• 2ملعقة كبيرة بهارات.
• ملعقة صغيرة كاري.
• نصف كيلو بندق.
• كوباية كبيرة ماء.
• فلفل اصفر واخضر مقطع قطعا صغيرة.
• ملعقة صغيرة فلفل اسود.
• قطعتان فحم.
الطريقة:
1. هنجيب الفخدة ونعمل فيها فتحة كبيرة بالسكين، بعد كده نتبل
الفخدة بمزيج الخليط الاتي” الزبادي والملح والعسل والخل
والبهارات والفلفل الاسمر”…
2. بعد ما نتبل الفخدة بالخليط ده نحطها في الثلاجة لمدة يوم بعد كده
نطلعها من التلاجة ونجيب الفلفل الرومي الاحمر ونقطعه الى قطع
صغيرة ونحشيها بيه، بالاضافة الى باقي الخليط المنقوع فيه
الفخدة…
3. نحطها في الفرن وندهنها بالزيت ونسيبها في الفرن لمدة ساعة
او ساعة ونصف او لغاية ما لونها يبقى احمر وتستوي…
5. بعد كده نسخن قطعتين الفحم على النار لغاية لونهم ما يبقى احمر
ونحطهم على الفخدة وهي سخنة ونغطي عليها علشان تحتفظ
برائحة الفحم علشان تدي مذاق ورائحة رائعة.
6. نصفي الصوص النازل من الفخدة ونضيفه الى الرز على النار
ونقلب كويس وبعد كده نضيف اليهم كاري وملح ومية وبندق ونقلبهم
على نار هادية لمدة ربع ساعة او لغاية ما نلاقي الرز استوى.
7. هنجيب الفخدة ونقطعها شرائح ونقدمها في طبق مع الرز ونرش
من فوق شوية ملح وفلفل اخضر واصفر للتجميل.
وبالهنا والشفا
صينية الرقاق بالبشاميل
ودي كمان اكلة بسيطة ممكن اننا نعملها في العيد
المقادير:
• نصف كيلو رقاق.
بصلة مقطعة قطع صغيرة.
• نص كيلو لحمة مفرومة.
• نص كوب كبير زبدة.
• نص كوب كبير دقيق.
• 4 كوبيات لبن.
• ملح و فلفل.
• 2بيضة.
• كوب كبير شوربة لحمة.
الطريقة:
1- هنعصج اللحمة المفرومة عن طريق اننا نقطع بصلة كبيرة الى
قطع صغيرة بعد كده نضيف ليها الملح والفلفل الاسود واللحمة
ونحطهم على النار ونضيف ليهم معلقة زبدة ونسيبهم على النار مع
التقليب المتسمر وبعد نص ساعة نضيف ليها كوباية مية ونسيبها
على النار لغاية ما اللحمة تشرب المية وتستوي.
2- بعد كده هنجهز البشاميل عن طريق اننا نسخن الزبدة ونضيف
ليها الدقيق مع التقليب لغاية ما لون الدقيق يبقى ذهبي بعد كده
نضيف ليه اللبن تدريجيا مع التقيب المستمر لغاية ما يبقى قوامه
سميك بعد كده نضيف ليه الملح والفلفل الاسود بعد كده نشيله من
على النار وبعد ما يبرد نجيب بيضة ونحطها في طبق ونضربها
بالمضرب مع الملح والفلفل وبعد كده نضيفها الى البشاميل ونقلبهم
مع بعض.
3- هنجيب الرقاق ونبله بالشوربة السخنة “ممكن اننا نستبدل
الشوربة بالمية” علشان يكون خفيف.
4- هنجيب صينية فرن وندهنها بالزبدة ونرص فيها نص كمية
الرقاق الموجود عندنا ونضيف ليها اللحمة وبعد كده نص كمية
البشاميل وبعد كده نرص باقي كمية الرقاق الموجودة، بعد كده
نغطي وش الصينية بباقي كمية البشاميل الموجود عندنا.
5- هندخل الصينية في فرن متوسط الحرارة لمدة نص ساعة او
لغاية ما وشها يحمر بعد كده نخرجها من الفرن ونقطعها.
صينية اللحم في الفرن
المقادير:
• كيلو لحمة.
• 3 بصلات مقطعة شرائح.
• 3 حبات طماطم مقطعة شرائح.
• 3 فصوص ثوم مطحونين.
• ملح -كمون-ك***ة-فلفل اسود
• عود قرفة.
الطريقة:
اخلطي اللحمة مع الثوم والبهارات
والملح بعد كده حطي في الصينية طبقة من شرائح البصل
ثم طبقة من شرائح الطماطم
وبعد كده حطي اللحمة عليها
ثم باقي شرائح البصل والطماطم،
وبعد كده غطي الصينية بالورق الحراري
وحطيها في الفرن على نار هادية لمدة ساعة
او لغاية ما تحسي انها استوت..
وبالف هنا وشفا.
موزة بالفريك
المقادير :
• نصف كيلو لحم موزة خال من العظم.
• نصف كيلو فريك.
• نصف ملعقة صغيرة مبشور جوزة الطيب.
• ربع ملعقة صغيرة فلفل.
• 2 ملعقة كبيرة سمن.
• بصلة.
• عود كرفس.
• فص حبهان.
• مكسرات محمرة.
• طماطم مشوية.
الطريقة
اسلقي الموزة
وضيفي اليها اثناء السلق بصلة مقطعة اربع تربع
وعود كرفس وفص حبهان
قبل ما اللحمة تستوي بشوية ضيفي اليها الملح
لما تلاقي اللحمة استوت شيليها من “الشوربة”
وحطيها في مصفة..
في الفترة اللي فيها اللحمة بتستوي
هات الفريك ونقيه وبعد كده انقعيه في شوية ميه
بعد كده هات صينية وحطيها على النار
وضيفي اليها شوية سمنة والفريك
وقلبي الفريك في السمنة لمدة خمس دقائق
بعد كده ضيفي اليه الشوربة
وشوية بهارات وملح
وسبيه على نار هادئة لغاية ما يستوي.
بعد كده رشي على لحم الموزة المسلوقة شوية بهارات
وملح وحمريها في السمنة.
بعد كده حطي الفريك في طبق التقديم
وحطي فوقه اللحمة المحمرة
وللتجميل شوية مكسرات
والطماطم المشوية على جانب الطبق
