اجمل ما في الخطوبة العزومات الرومانسية .. على احلى محلات اكل في البلد .. واللي عمرك ما هتشوفيها بعد الجواز .. المهم نصائحي لك عند اي عزومة مع خطيبك…
1- الاول لازم تعرفي ان الشوكة والسكينة بيتمسكوا من ايديهم من الطرف يعني مش من الوسط ولا من البوز زي الخنجر ولا من فوق طبعا 
2- العيش اوعي تفضحينا وتقطعيه بسنانك .. ولا الرغيف نصين بايدك وكل نص لقمة وتحشري .. اوعي .. العيش بيتقطع بالسكينة في الطبق .. وبعدين تاخدي لقمة .. لقمة .. بالعافية .. قال يعني نفسك مسدودة .. اضغطي على اعصابك جدااا . وبعدين لما تروحي.. ابقي كلى زي مانت عايزه….
3- الشوووربة .. ابوس ايديك .. بند الشوربة ده مهم جداااا .. الشوربة تتشرب من غير صوت خالص .. ومن غير ماتقعدي تنفخي فيها .. زي القهوجي اللي بينفخ في الحجر .. وطبعاااااا عايزكى تنسى تماما .. السلطانية اللي بتقيميها على بقك في البيت .. وتدلدقي على روحك .. وبدون صوت .. سخنة ولعة برضه بدون صوت .. وتسيبي تلت الطبق ع الاقل ..
4- الرز طبعا .. بيتاكل بالشوكة .. اوعي ايدك تتمد ع الملعقة 
5- المكرونة .. الاسباكتي .. برضه بالشوكة .. تتلف على طرف الشوكة .. لحد ما تخلص وبعدين تحطيها فى فمك من سكات .. مش تشفطي المكرونة عود عود . 
6- السمك .. مشكلة .. شوفي .. بتفصلي اللحم عن الشوك .. ازاي .. ؟؟ تقطعي اللحم من النص .. بالطول وبعدين تفردي اللحم ع الجانبين ولما تخلصي ناحية .. متقلبيش السمكة .. شيلي السلسله بالشوكة والسكينة , وحطيها ف جنب الطبق وكملي اكل النص التاني .. وبدل الفيلم الهندي ده .. نصيحة .. ماتكليش السمك خالص .. قولي مابحبش السمك وخلصي نفسك .. 
7- الجمبري .. -اذا كنتي عارفاه – .. اول ماطبق الجمبري ينزل .. بصيله بصه فيها ازبهلال واستغراب كدا .. ال يعني زهقانة من كتر اكل الجمبري الجامبو ف بيت بابااااا .. واتنهدي جامد وقولي .. برضه .. ؟؟؟ وتروحي قاطعة راس الجمبريياية .. بالشوكة .. انا ف عرضك انسي المصمصة دلوقتى ..
8- البطاطس سواء مسلوقة او محمرة .. اوعي تهرسيها وتدبيها ع الرز وتبدي .. لا .. لا .. لا .. بالشوكة حتة حتة وانت زي ما تكوني هاتعيطي من كتر ما البطاطس صعبانة عليكي ..
9- الفاكهة .. لو الفاكهة فيها بذر .. طلعيه من فمك وحطيه فى ايدك وهي مقفولة .. وبعدين ف طفاية السجاير اللي على الترابيزه .. اوعي ياحبيبتي من نظام التفتفة للبذر .. انسي .. 
10- ولما تخلصي اكل تحطي ايدك على بطنك .. – اللي عصافيرها بتصوصو من العينات اللي كلتيها – .. وتقولي له مش ممكن .. انا عمري ما اتفجعت كدة .. انا قدامى اسبوع .. هابطل اكل فيه ..
وبعدين تمسكي الفوطة اللي دايما موجودة على التربيزة من غير لازمة .. وتبوسيها .. ال يعني بتمسحي بؤك .. وبعدين تستاذني منه ومن بابا او اخوكى يعنى تستاذنى من اللى قاعدين لدخول التوليت لاصلاح ما افسده الاكل .. وتخشي التواليت وتطلعي من شنطة ايديك .. لفة الفول والطعمية اللي جايباها معاكي .. وبالهنا والشفااااااااااااا 
